Kethireddy Pedda Reddy: కేతిరెడ్డి పెద్దారెడ్డి తాడిపత్రిలో అడుగు పెట్టడం కష్టమేనా?

అనంతపురం జిల్లాలోని తాడిపత్రి (Tadipatri) నియోజకవర్గం రాజకీయంగా ఎప్పుడూ వార్తల్లో నిలుస్తూ ఉంటుంది. వైసీపీ (YCP) నేత, మాజీ ఎమ్మెల్యే కేతిరెడ్డి పెద్దారెడ్డి (Kethireddy PeddaReddy) తాడిపత్రిలోని తన సొంత ఇంటికి వెళ్లేందుకు చేస్తున్న ప్రయత్నాలు ప్రతిసారీ విఫలమవుతూనే ఉన్నాయి. టీడీపీ నేత, మున్సిపల్ ఛైర్మన్ జేసీ ప్రభాకర్ రెడ్డి (JC Prabhakar Reddy) హెచ్చరికలు, పోలీసుల భద్రతాపరమైన చర్యలు, హైకోర్టు జోక్యం లాంటివి పెద్దారెడ్డికి ఆటంకంగా మారాయి. తాజాగా ఏపీ హైకోర్టు (AP High Court) సింగిల్ బెంచ్ ఇచ్చిన ఆదేశాలపై డివిజన్ బెంచ్ మధ్యంతర స్టే ఇవ్వడంతో కేతిరెడ్డి ఇప్పట్లో తాడిపత్రిలో అడుగుపెట్టే అవకాశం కనిపించడం లేదు.

తాడిపత్రి నియోజకవర్గంలో కేతిరెడ్డి పెద్దారెడ్డి, జేసీ ప్రభాకర్ రెడ్డి మధ్య రాజకీయ శత్రుత్వం దశాబ్దాలుగా కొనసాగుతోంది. 2019 అసెంబ్లీ ఎన్నికల్లో వైఎస్ఆర్‌సీపీ తరపున కేతిరెడ్డి పెద్దారెడ్డి, టీడీపీ అభ్యర్థి జేసీ అస్మిత్ రెడ్డిపై 7,511 ఓట్ల మెజారిటీతో విజయం సాధించారు. అయితే, 2024 ఎన్నికల్లో పెద్దారెడ్డి ఓడిపోయారు. అస్మిత్ రెడ్డి గెలిచారు. రాష్ట్రంలో కూటమి ప్రభుత్వం అధికారంలోకి రావడంతో కేతిరెడ్డి తాడిపత్రిలో అడుగుపెట్టడం కష్టతరమైంది. కూటమి ప్రభుత్వం ఏర్పడినప్పటి నుంచి.. టీడీపీ నాయకులు, ముఖ్యంగా జేసీ ప్రభాకర్ రెడ్డి, కేతిరెడ్డిని తాడిపత్రిలోకి రాకుండా అడ్డుకుంటున్నారు.

కేతిరెడ్డి పెద్దా రెడ్డి తాడిపత్రి వెళ్లేందుకు అనుమతి ఇస్తూ హైకోర్టు సింగిల్ బెంచ్ ఆదేశాలు జారీ చేసింది. పెద్దారెడ్డి ఆగస్టు 18న ఉదయం 10 నుంచి 11 గంటల మధ్య తాడిపత్రిలోని తన నివాసానికి వెళ్లేందుకు పోలీసు భద్రత కల్పించాలని స్పష్టం చేసింది. ఈ మేరకు పెద్దారెడ్డి తాడిపత్రిలో అడుగు పెట్టేందుకు ప్రయత్నించారు. కానీ కుదరలేదు. మరోవైపు సింగిల్ బెంచ్ ఆదేశాలను సవాలు చేస్తూ అనంతపురం ఎస్పీ జగదీష్ హైకోర్టు డివిజన్ బెంచ్‌లో పిటిషన్ దాఖలు చేశారు. శాంతిభద్రతల సమస్యలు తలెత్తే అవకాశం ఉందని వాదిస్తూ, సింగిల్ బెంచ్ ఆదేశాలపై స్టే ఇవ్వాలని కోరారు. ఈ పిటిషన్‌పై విచారణ జరిపిన డివిజన్ బెంచ్, సింగిల్ బెంచ్ ఆదేశాలపై మధ్యంతర స్టే ఇస్తూ ఇవాళ ఉత్తర్వులు జారీ చేసింది. ప్రతివాదులకు నోటీసులు జారీ చేయాలని ఆదేశించింది. తదుపరి విచారణను మూడు వారాలకు వాయిదా వేసింది.

కేతిరెడ్డి పెద్దారెడ్డి తాడిపత్రిలో అడుగుపెట్టడం వల్ల శాంతిభద్రతల సమస్యలు తలెత్తే అవకాశం ఉందని పోలీసులు ఆందోళన వ్యక్తం చేస్తున్నారు. గతంలో కూడా కేతిరెడ్డి తాడిపత్రి వచ్చినప్పుడు జేసీ ప్రభాకర్ రెడ్డి వర్గీయులతో ఘర్షణలు జరిగాయి. 2024 మేలో జరిగిన ఎన్నికల సమయంలో తాడిపత్రిలో టీడీపీ, వైసీపీ వర్గీయుల మధ్య హింసాత్మక ఘటనలు చోటుచేసుకున్నాయి. కేతిరెడ్డి ఇంటిపై టీడీపీ జెండా ఎగురవేయడం, సీఐ మురళీకృష్ణ సహా పోలీసులకు గాయాలు కావడం, ఎస్పీ వాహనం ధ్వంసం కావడం వంటి సంఘటనలు జరిగాయి. ఈ నేపథ్యంలో, పోలీసులు తాడిపత్రిలో భారీ బలగాలను మోహరిస్తున్నారు. ఆగస్టు 18న కేతిరెడ్డిని నాగిరెడ్డిపల్లె వద్ద అడ్డుకుని, శాంతిభద్రతల సమస్యలను కారణంగా చూపి అనుమతి నిరాకరించారు. దీంతో కేతిరెడ్డి రోడ్డుపై కుర్చీ వేసుకుని ఆందోళన చేపట్టారు, ఆరు గంటల పాటు అక్కడే ఉండిపోయారు.

టీడీపీ నేత జేసీ ప్రభాకర్ రెడ్డి కేతిరెడ్డి పెద్దారెడ్డిని తాడిపత్రిలోకి అడుగుపెట్టనివ్వబోమని స్పష్టం చేశారు. కేతిరెడ్డి వైసీపీ హయాంలో దౌర్జన్యాలకు పాల్పడ్డారని, అక్రమంగా నిర్మించిన ఇంటిని కూడా చూసుకోవాలని ఆయన హితవు పలికారు. జేసీ వర్గీయులు శివుడి విగ్రహావిష్కరణ కార్యక్రమం నిర్వహించడం, కార్యకర్తలను భారీగా తరలించడం వంటి చర్యలతో తాడిపత్రిలో ఉద్రిక్త వాతావరణం నెలకొంది. కేతిరెడ్డి పెద్దారెడ్డి మాత్రం తనను అడ్డుకోవడం దుర్మార్గమని, పోలీసులు జేసీ ప్రభాకర్ రెడ్డి ఆదేశాలకు తలొగ్గుతున్నారని ఆరోపించారు. “ప్రజలు నన్ను అడ్డుకుంటే నా ఇల్లు రాసిస్తాను” అంటూ ఆయన సవాల్ విసిరారు. హైకోర్టు ఆదేశాలను పోలీసులు ధిక్కరిస్తున్నారని, టీడీపీ నేతల కుట్రలో భాగంగా తనపై ఆంక్షలు విధిస్తున్నారని ఆయన ఆవేదన వ్యక్తం చేశారు.

తాడిపత్రిలో కేతిరెడ్డి పెద్దారెడ్డి ప్రవేశం చుట్టూ ఉద్రిక్తత కొనసాగుతోంది. హైకోర్టు డివిజన్ బెంచ్ మధ్యంతర స్టే ఇవ్వడంతో ఆయన ఇప్పట్లో తాడిపత్రిలో అడుగుపెట్టే అవకాశం కనిపించడం లేదు. రాజకీయ శత్రుత్వాలు, శాంతిభద్రతల సమస్యలు, పోలీసుల తీరు, హైకోర్టు జోక్యం ఈ వివాదాన్ని మరింత సంక్లిష్టం చేస్తున్నాయి. మూడు వారాల తర్వాత జరిగే తదుపరి విచారణ ఈ విషయంలో ఏ మేరకు స్పష్టత వస్తుందో వేచి చూడాలి.