Janasena: పుంగనూరులో పెద్దిరెడ్డి పై పోరుకు సై అంటున్న జనసేన..

ఆంధ్ర రాష్ట్ర రాజకీయాల్లో ఆసక్తికరమైన పరిణామంగా జనసేన పుంగనూరు సభ (Punganur) మారింది. వైసీపీ (YCP) సీనియర్ నేత, మాజీ మంత్రి పెద్దిరెడ్డి (Peddi Reddy) నియోజకవర్గంలో జనసేన భారీ బహిరంగ సభ నిర్వహించేందుకు సన్నాహాలు పూర్తయ్యాయి. ఫిబ్రవరి 3న జరిగే ఈ సభ ద్వారా పెద్దిరెడ్డిపై పోరాటానికి జనసేన(Janasena) శంఖారావం పూరించనుందని పార్టీ నేతలు చెబుతున్నారు. ఈ సభతో రాయలసీమలో జనసేన తన బలాన్ని ప్రదర్శించేందుకు సిద్ధమైంది.

ప్రస్తుతం రాష్ట్రంలో కూటమి పార్టీలు రాజకీయ వ్యూహాలను వేగంగా అమలు చేస్తున్నాయి. టీడీపీ, జనసేన కలిసి వైసీపీపై మూడింటి గట్టి పోరాటానికి సిద్ధమవుతున్నాయి. ఇప్పటికే అవినీతి కేసుల ద్వారా వైసీపీ నేతలపై ఒత్తిడి పెంచిన కూటమి, ఇప్పుడు రాజకీయంగానూ మరింత దూకుడు ప్రదర్శిస్తోంది. ఇటీవల టీడీపీ కడపలో మహానాడు నిర్వహించేందుకు నిర్ణయం తీసుకోగా, మరోవైపు జనసేన కూడా అదే ప్రాంతంలో, పుంగనూరులో బహిరంగ సభను ఏర్పాటు చేయడం రాజకీయంగా చర్చనీయాంశంగా మారింది.

రాయలసీమలో వైసీపీకి ఎప్పటి నుంచో గట్టి పట్టు ఉంది. టీడీపీ స్థాపించిన నలభై ఏళ్లలోనూ ఈ ప్రాంతంలో పార్టీ పూర్తిస్థాయిలో బలపడలేకపోయింది. కడప, కర్నూలు, చిత్తూరు ఉమ్మడి జిల్లాల్లో టీడీపీ చెప్పుకోదగిన స్థాయిలో విజయాలు సాధించలేకపోయింది. కానీ 2024 ఎన్నికల్లో వైసీపీపై ప్రజల్లో ఉన్న వ్యతిరేకతను సద్వినియోగం చేసుకున్న కూటమి, రాయలసీమలో కూడా భారీ విజయాన్ని సాధించింది. ఉమ్మడి అనంతపురం జిల్లాలో మొత్తం సీట్లు గెలుచుకోవడమే కాకుండా, కడపలో ఏడు, చిత్తూరు, కర్నూలు జిల్లాల్లో 12 సీట్లు సాధించింది. ఇంతటి విజయం టీడీపీకి ఈ ప్రాంతంలో ఎన్నడూ రాలేదు. ఈ ఫలితాలతో ప్రస్తుత బలాన్ని మరింత బలోపేతం చేసుకోవాలని టీడీపీ వ్యూహాలు రచిస్తోంది.

ఇక రాయలసీమలో జనసేన విస్తరణకూ సమాయత్తమైంది. రాష్ట్ర రాజకీయాల్లో కీలకమైన నేతలపై కూటమి దృష్టి సారించినట్టు తెలుస్తోంది. జగన్ సొంత జిల్లాపై టీడీపీ దృష్టి పెట్టినట్లే, మరో వైపు పెద్దిరెడ్డి ఇలాకాపై జనసేన పోరుకు సిద్ధమైంది. వైసీపీ అధికారంలో ఉన్నప్పుడు రాయలసీమలో పెద్దిరెడ్డి కుటుంబ ప్రభావం స్పష్టంగా కనిపించింది. ఆయన నియోజకవర్గంలో వైసీపీకి పోటీ ఇవ్వడం సులభమని ఎవరూ భావించలేదు. అలాంటి చోట జనసేన భారీ బహిరంగ సభను నిర్వహించడం రాజకీయంగా ప్రాధాన్యం సంతరించుకుంది.  ఈ సభ విజయవంతం కావడానికి జనసేన రాయలసీమ క్యాడర్‌ పూర్తి స్థాయిలో కృషి చేస్తోంది. పార్టీ శ్రేణులు ప్రజలను భారీగా రప్పించేందుకు కష్టపడుతున్నాయి. ఈ నేపథ్యంలో సభకు ఎంతమంది ప్రజలు హాజరవుతారన్నది ఆసక్తికరంగా మారింది. జనసేన పుంగనూరులో చేసే ఈ ప్రదర్శన భవిష్యత్ ఎన్నికల వ్యూహాలకు కీలకంగా మారనుందని విశ్లేషకులు భావిస్తున్నారు.