YS Arjun Reddy : జగన్ బంధువు అర్జున్ రెడ్డి అరెస్ట్..!

ఆంధ్రప్రదేశ్ రాజకీయాల్లో, వైఎస్ కుటుంబ వ్యవహారాల్లో మరో కీలక పరిణామం చోటుచేసుకుంది. వైసీపీ అధినేత, మాజీ సీఎం వైఎస్ జగన్ మోహన్ రెడ్డికి (YS Jagan) అత్యంత సమీప బంధువు, వైఎస్ కుటుంబంలోని కీలక వ్యక్తి వై.ఎస్. అర్జున్ రెడ్డిని పోలీసులు అదుపులోకి తీసుకోవడం రాజకీయ వర్గాల్లో సంచలనం సృష్టించింది. సోషల్ మీడియాలో అనుచిత పోస్టుల కేసులో లుక్-అవుట్ నోటీసులు ఎదుర్కొంటున్న అర్జున్ రెడ్డిని, సోమవారం రాత్రి శంషాబాద్ ఎయిర్ పోర్టులో ఇమ్మిగ్రేషన్ అధికారులు అడ్డుకుని గుడివాడ పోలీసులకు అప్పగించారు. అయితే, ఇది కేవలం సోషల్ మీడియా పోస్టులకు సంబంధించిన వ్యవహారమేనా? లేక దీని వెనుక మాజీ మంత్రి వై.ఎస్. వివేకానందరెడ్డి హత్య కేసు దర్యాప్తు కోణం కూడా దాగి ఉందా? అన్నది ఇప్పుడు ఆసక్తికరంగా మారింది.

గత కొంతకాలంగా విదేశాల్లో తలదాచుకున్న అర్జున్ రెడ్డి, సోమవారం హైదరాబాద్ చేరుకోగానే ఇమ్మిగ్రేషన్ విభాగం అప్రమత్తమైంది. గుడివాడ పోలీసులు జారీ చేసిన లుక్ అవుట్ సర్క్యులర్ (LOC) ఆధారంగా ఆయన్ను నిలిపివేశారు. వెంటనే గుడివాడ నుండి ప్రత్యేక పోలీస్ బృందాలు శంషాబాద్ చేరుకుని ఆయన్ను అదుపులోకి తీసుకున్నాయి. అయితే, ముందస్తు న్యాయ సలహాతో సిద్ధంగా ఉన్న అర్జున్ రెడ్డి తరపు న్యాయవాదులు అక్కడికి చేరుకోవడంతో, పోలీసులు ఆయనకు సీఆర్‌పీసీ సెక్షన్ 41A కింద నోటీసులు జారీ చేసి విచారణకు హాజరు కావాల్సిందిగా ఆదేశించారు. ఇది తాత్కాలిక ఉపశమనమే అయినప్పటికీ, ఆయనపై రాష్ట్రవ్యాప్తంగా, ముఖ్యంగా కడప జిల్లాలో పలు కేసులు నమోదై ఉన్నట్లు సమాచారం.

అర్జున్ రెడ్డి కేవలం జగన్ బంధువుగానే కాకుండా, వైసీపీ సోషల్ మీడియా విభాగంలోనూ క్రియాశీలక పాత్ర పోషించారు. వైసీపీ సోషల్ మీడియా ఇన్-చార్జ్ సజ్జల భార్గవ్‌రెడ్డితో కలిసి ఆయన పనిచేశారని పోలీసుల దర్యాప్తులో తేలింది. ముఖ్యమంత్రి చంద్రబాబు, ఉప ముఖ్యమంత్రి పవన్ కళ్యాణ్, మంత్రి నారా లోకేష్ వారి కుటుంబ ఆడపడుచుల చిత్రాలను అసభ్యకరంగా మార్ఫింగ్ చేయడంలో, వాటిని సామాజిక మాధ్యమాల్లో విస్తృతంగా ప్రచారం చేయడంలో అర్జున్ రెడ్డి కీలకంగా వ్యవహరించారన్నది ప్రధాన ఆరోపణ. గత ఏడాది నవంబర్‌లో గుడివాడలో నమోదైన ఈ కేసుకు సంబంధించి అరెస్టు భయంతో ఆయన విదేశాలకు పారిపోయారు. ఇప్పుడు ఆయన రాకతో వైసీపీ సోషల్ మీడియా విభాగానికి సంబంధించిన మరిన్ని కీలక విషయాలు, కంటెంట్ సృష్టి, వివేకా కేసు వ్యవహారాలకు సంబంధించిన మూలాలు బయటపడే అవకాశముంది.

సోషల్ మీడియా కేసులు ఒక ఎత్తైతే, మాజీ మంత్రి వై.ఎస్. వివేకానందరెడ్డి హత్య కేసులో అర్జున్ రెడ్డి పాత్రపై వస్తున్న ఆరోపణలు అత్యంత తీవ్రమైనవి. వైఎస్ జగన్‌కు బాబాయ్ వరుసయ్యే వైఎస్ ప్రకాష్ రెడ్డి మనవడైన అర్జున్ రెడ్డి, వివేకా హత్య జరిగిన రోజు రాత్రి అనుమానాస్పద రీతిలో ఫోన్ కాల్స్ మాట్లాడినట్లు సీబీఐ రికార్డుల్లో ఉంది. వివేకా హత్య కేసులో ప్రధాన నిందితుల్లో ఒకరైన సునీల్ యాదవ్ సోదరుడు కిరణ్ యాదవ్ తో అర్జున్ రెడ్డికి సాన్నిహిత్యం ఉంది. హత్య జరిగిన రోజు రాత్రి వీరిద్దరి మధ్య పలుమార్లు ఫోన్ సంభాషణలు జరిగాయని ఆరోపణలు ఉన్నాయి.

ఇటీవల హైదరాబాద్‌లోని నాంపల్లి సీబీఐ కోర్టు, ఈ ఫోన్ కాల్స్ డేటాపై సమగ్ర దర్యాప్తు జరపాలని, అవసరమైతే సప్లిమెంటరీ ఛార్జ్ షీట్ దాఖలు చేయాలని సీబీఐని స్పష్టంగా ఆదేశించింది. ఈ నేపథ్యంలో అర్జున్ రెడ్డి ఇండియాకు రావడం, అదే సమయంలో గుడివాడ పోలీసులు అదుపులోకి తీసుకోవడం యాదృచ్ఛికం కాదని విశ్లేషకులు భావిస్తున్నారు. వివేకా హత్య కేసులో ఆయన పాత్రపై సీబీఐ కూడా త్వరలోనే విచారించే అవకాశం లేకపోలేదు.

అర్జున్ రెడ్డిపై జరుగుతున్న ఈ చర్యలు వైఎస్ జగన్ కుటుంబం చుట్టూ, ముఖ్యంగా ఆయన సన్నిహిత వర్గాల చుట్టూ న్యాయపరమైన ఉచ్చు బిగుస్తోందనడానికి సంకేతం. ఒకవైపు రాష్ట్ర పోలీసులు సోషల్ మీడియా వేధింపుల కేసుల్లోనూ, మరోవైపు సీబీఐ వివేకా హత్య కేసులోనూ దర్యాప్తును వేగవంతం చేయడం అర్జున్ రెడ్డికి రెట్టింపు సంకటంగా మారింది. వివేకా హత్య జరిగిన సమయంలో నిందితులతో జరిగిన సంభాషణలపై అర్జున్ రెడ్డి ఇచ్చే సమాధానాలు ఈ కేసులో అనేక కొత్త మలుపులకు దారితీయవచ్చు. ఏది ఏమైనా, రాబోయే రోజుల్లో ఈ కేసు విచారణ ఏపీ రాజకీయాల్లో పెను ప్రకంపనలు సృష్టించే అవకాశం ఉంది.