Jagan: జగన్–షర్మిల వివాదం..చరిత్ర పాఠాలు గుర్తు చేస్తున్న ప్రజలు..

ఆంధ్రప్రదేశ్‌ (Andhra Pradesh) రాజకీయాల్లో మరోసారి వారసత్వం అనే పదం చర్చకు వస్తోంది. వైసీపీ అధ్యక్షుడు వైఎస్ జగన్‌ (YS Jagan) , ఆయన సోదరి, ఏపీ కాంగ్రెస్‌ అధ్యక్షురాలు షర్మిల (Sharmila) మధ్య రాజకీయ వారసత్వంపై బహిరంగ పోరు మొదలైంది. ఇద్దరూ తమతమ రీతిలో వైఎస్ రాజశేఖరరెడ్డి (YS Rajasekhara Reddy) వారసత్వం తమకే చెందిందని చెబుతున్నారు. షర్మిల స్పష్టంగా “మా తండ్రి నిజమైన రాజకీయ వారసుడు మా కుమారుడే” అని ప్రకటిస్తుంటే, జగన్‌ మాత్రం ముఖ్యమంత్రి స్థాయికి ఎదిగిన తర్వాత కూడా తాను వైఎస్‌ వారసత్వాన్ని కొనసాగిస్తున్నానని చెబుతూ ప్రజల ముందుకు వస్తున్నారు.

ఇద్దరి వాదనలతో ప్రజల్లో సందిగ్ధత సృష్టించినా, తుది నిర్ణయం మాత్రం ప్రజల చేతుల్లోనే ఉంటుంది. ఎవరు నిజంగా వైఎస్‌ వారసత్వాన్ని నిలబెట్టగలరు అన్నది ప్రజల నమ్మకంపై ఆధారపడి ఉంటుంది. కానీ ఈ వారసత్వం కోసం అన్నాచెల్లెలు బహిరంగంగా ఒకరిపై ఒకరు విమర్శలు చేసుకుంటూ రోడ్లెక్కితే, ఆ తగాదాలను ప్రజలు సహించరని రాజకీయ విశ్లేషకులు చెబుతున్నారు.

ఇలాంటి పరిణామాలు గతంలోనూ చూశాం. నందమూరి తారకరామారావు (NTR) మరణం తర్వాత ఆయన వారసత్వంపై పోరు మొదలైంది. హరికృష్ణ (Harikrishna) “నేనే అసలు వారసుడిని” అంటూ కొత్త పార్టీ ఏర్పాటు చేశారు. మరోవైపు లక్ష్మీ పార్వతి (Lakshmi Parvathi) కూడా తనకే వారసత్వం ఉందని చెబుతూ మరో పార్టీని ప్రారంభించారు. కానీ ఈ ఇద్దరి మధ్య తగాదాలను ప్రజలు సహించలేదు. చివరకు తెలుగుదేశం పార్టీ (TDP) ని ప్రజలు చంద్రబాబు నాయుడు (Chandrababu Naidu) చేతుల్లో ఉంచారు. ఫలితంగా హరికృష్ణ, లక్ష్మీపార్వతి రాజకీయంగా వెనకడుగు వేసారు.

ఇక 2019 ఎన్నికలలోనూ ఇదే పాఠం కనబడింది. అప్పట్లో చంద్రబాబు (Chandrababu), పవన్ కళ్యాణ్ (Pawan Kalyan), బీజేపీ (BJP) నేతలు ఒకరిపై ఒకరు విమర్శలు చేసుకున్నారు. ఆ కీచులాట వల్ల ఈ మూడు పార్టీలను ప్రజలు పక్కన పెట్టేశారు. అయితే 2024లో కలిసి పోటీ చేయడంతో మళ్లీ ప్రజల నమ్మకాన్ని గెలుచుకున్నారు. ఇది స్పష్టంగా ఒక విషయాన్ని చూపిస్తోంది – ఏపీ ప్రజలు కీచులాటలను ఇష్టపడరు, సహించరు.

అందుకే ఇప్పుడు జగన్‌, షర్మిల ఇద్దరూ జాగ్రత్తగా నడవాల్సిన అవసరం ఉందని నిపుణులు చెబుతున్నారు. షర్మిల ఎంత విమర్శించినా ఆమెకు లాభం కానీ నష్టం కానీ తక్కువే. కానీ ముఖ్యమంత్రి పదవిలో ఉన్న జగన్‌ ఈ వివాదాల్లో మరీ లోతుగా దిగితే మాత్రం ఆయనకే పెద్ద దెబ్బ తగిలే అవకాశముంది. అదే వైసీపీ (YSRCP) భవిష్యత్తుపైనా ప్రభావం చూపుతుంది. కాబట్టి ప్రతి అడుగు ప్రజల నాడి దృష్టిలో వేసుకోవాల్సిన అవసరం ఉందని విశ్లేషకుల అభిప్రాయం.మొత్తం మీద వైఎస్‌ వారసత్వం ప్రశ్నకు సమాధానం ఎవరూ చెప్పలేరు. చివరికి ప్రజలే నిర్ణయిస్తారు. ప్రజలు నమ్మితేనే వారసత్వం నిలుస్తుంది, లేకపోతే అది కేవలం నినాదంగానే మిగిలిపోతుంది.