Ambati Rambabu: రెడ్ బుక్ బెదిరింపులకు లొంగను.. అంబటి..

వైసీపీ (YCP) సీనియర్ నేత, మాజీ మంత్రి అంబటి రాంబాబు (Ambati Rambabu) మరోసారి తీవ్ర వ్యాఖ్యలతో వార్తల్లో నిలిచారు. ప్రభుత్వం తనపై కేసులు పెట్టి భయపెట్టే ప్రయత్నం చేస్తోందని, కానీ తాను భయపడే వ్యక్తి కాదని ఆయన స్పష్టంగా చెప్పారు. రాజకీయాల్లోకి వచ్చిన రోజునుంచి తాను ఎదురుదెబ్బలకు సిద్ధంగా ఉంటానని నిర్ణయించుకున్నానని గుర్తు చేశారు. గత ప్రభుత్వంలో మంత్రిగా పనిచేసిన సమయంలోనే అవినీతి చేశాడని చెప్పి ఇప్పుడు విచారణలు మొదలుపెట్టడం పూర్తిగా కుట్రలో భాగమని ఆయన అభిప్రాయపడ్డారు.

ఇటీవల విజిలెన్స్ విచారణకు ఆదేశాలు ఇవ్వడం వెనుక మంత్రి నారా లోకేశ్ (Nara Lokesh) ఉన్నారని, ఆయన ప్రణాళిక ప్రకారమే మీడియా కూడా తప్పుడు వార్తలు ప్రసారం చేస్తోందని అంబటి ఆరోపించారు. 14 నెలల తర్వాత అకస్మాత్తుగా తనపై ఆరోపణలు గుర్తుకు రావడం ఆశ్చర్యకరమని వ్యాఖ్యానించారు. ముఖ్యమంత్రి చంద్రబాబు నాయుడు (Chandrababu Naidu) సూచనలతోనే విజిలెన్స్ నివేదిక ముందే సిద్ధమై ఉందని, దానిని ఆధారంగా చేసుకుని ఏసీబీ (ACB) కేసులు నమోదు చేస్తుందని ఆయన అనుమానం వ్యక్తం చేశారు.

నారా లోకేశ్ చూపిస్తున్న రెడ్ బుక్ (Red Book) బెదిరింపులకు తన కుక్క కూడా భయపడదని అంబటి ఘాటుగా వ్యాఖ్యానించారు. వైసీపీకి వ్యతిరేకంగా ముగ్గురు మీడియా ఛానల్ యజమానులు, ముఖ్యమంత్రి చంద్రబాబు, లోకేశ్ కలిసి పనిచేస్తున్నారని ఆయన ఆరోపించారు. జగన్ మోహన్ రెడ్డి (Jagan Mohan Reddy)ముఖ్యమంత్రిగా పదవిలో ఉన్న సమయంలో ఆయనతో ఉన్న అధికారులను, నేతలను ఒక్కొక్కరిని లక్ష్యంగా చేసుకుని ఇబ్బందులకు గురి చేస్తున్నారని విమర్శించారు.

తనపై లిక్కర్ కేసులో కాకుండా ప్రత్యేకంగా విచారణలు ప్రారంభించడం వెనుక కూడా రాజకీయ లెక్కలే ఉన్నాయని అన్నారు. ఇరిగేషన్ శాఖలో అవినీతి జరిగిందని వెతికినా తనపై ఒక్క ఆధారమూ దొరకదని ఆయన ధీమా వ్యక్తం చేశారు. తనను ఎలాంటి కుట్రలతోనైనా ముంచే ప్రయత్నం చేస్తే అది తిరగబడి వారినే తాకుతుందని అంబటి హెచ్చరించారు.

తనను “అంబోతు” అంటూ మీడియాలో ప్రసారం చేస్తున్నారని, కానీ తనకంటే పెద్ద “అంబోతు” ఈ రాష్ట్రంలో ఎవరూ లేరని వ్యాఖ్యానించారు. గతంలో తాను డ్యాన్స్ చేస్తూ ఆనందించానని, ట్రెక్కింగ్ చేస్తూ ఎంజాయ్ చేశానని, ఇప్పుడు జైలులో వేసినా “జైలింగ్”ను కూడా ఎంజాయ్ చేస్తానని ఆయన వెటకారంగా అన్నారు. కేసులు పెడితే తాను ఇంకా బలంగా నిలబడతానని, భయపడనని మరోసారి స్పష్టం చేశారు.

తాను తప్పు చేశానా లేదా అన్నది ప్రజలు దేవుడే తేలుస్తారు, కానీ చంద్రబాబు లేదా లోకేశ్ చెప్పేది కాదని అంబటి రాంబాబు స్పష్టం చేశారు. బతికితే హీరోలా బతకాలని, పిరికి మనిషిలా జీవించబోనని సంకల్పంతో ముందుకు వెళ్తానని తెలిపారు. తనపై జరుగుతున్న కుట్రలన్నిటినీ కోర్టులోనే తేల్చుకుంటానని చెప్పిన ఆయన, రాబోయే రోజులు తమకే అనుకూలంగా మారతాయని ధైర్యంగా ప్రకటించారు.