Dharmana Family: శ్రీకాకుళం రాజకీయాల్లో హాట్ టాపిక్.. ధర్మాన కుటుంబం అంతర్గత తగాదాలు..
- Published By: techteam
- August 21, 2025 / 04:40 PM IST
శ్రీకాకుళం (Srikakulam) జిల్లాలో ధర్మాన కుటుంబం ఎప్పటినుంచో రాజకీయాల్లో కీలక పాత్ర పోషిస్తూనే ఉంది. అయితే తాజాగా ఈ కుటుంబంలోనే విభేదాలు బయల్పడుతున్నాయన్న చర్చ సొంత పార్టీ వర్గాల్లోనే జోరుగా సాగుతోంది. ముఖ్యంగా ధర్మాన ప్రసాదరావు (Dharmana Prasada Rao), ధర్మాన కృష్ణదాస్ (Dharmana Krishnadas) ఇద్దరూ వైఎస్సార్ కాంగ్రెస్ పార్టీ (YSRCP)లోనే ఉన్నప్పటికీ రాజకీయ నిర్ణయాల విషయంలో వేర్వేరు దారుల్లో వెళ్తున్నారనే అభిప్రాయాలు వినిపిస్తున్నాయి.
2019 ఎన్నికల్లో నరసన్నపేట (Narasannapeta) నుంచి గెలుపొందిన కృష్ణదాస్, అలాగే శ్రీకాకుళం నియోజకవర్గం నుంచి విజయాన్ని సాధించిన ప్రసాదరావు, ఇద్దరూ ఒక దశలో జగన్ మోహన్ రెడ్డి (Y. S. Jagan Mohan Reddy) కేబినెట్‌లో మంత్రులుగా సేవలందించారు. కానీ గత ఎన్నికల సమయంలో ఇద్దరూ తమ వారసులకు టిక్కెట్లు దక్కేలా చూడాలని యత్నించారు. అయితే అధిక పోటీ కారణంగా జగన్ ఇద్దరి అభ్యర్థనలకూ అంగీకరించలేదు. దాంతో మళ్లీ స్వయంగా పోటీ చేసిన ఈ ఇద్దరు నేతలు కూటమి ప్రభావం కారణంగా ఓటమిని చవిచూశారు.
ఇప్పుడిక ఓటమి తర్వాత పరిస్థితులు మారిపోయాయి. కృష్ణదాస్ మాత్రం ఇంకా పార్టీ కార్యక్రమాల్లో చురుకుగా పాల్గొంటున్నారు. కానీ ప్రసాదరావు మాత్రం చాలా వరకు వెనకంజ వేశారు. ముఖ్యంగా పార్టీ సమీక్షలు, ముఖ్యనేతల సమావేశాలు, లేదా మీడియా ముందు కూడా ఆయన కనిపించడం లేదు. గతంలో తరచూ తన అభిప్రాయాలు వ్యక్తపరిచిన ఆయన ఇప్పుడు మౌనంగా ఉండటమే కాకుండా, రాబోయే ఎన్నికల నాటికి పార్టీ మారే ఆలోచనలో ఉన్నారని ప్రచారం జరుగుతోంది. తన కుమారుడికి అవకాశం కల్పించుకోవడం కోసం ఇలా ఆలోచిస్తున్నారని రాజకీయ వర్గాల్లో అభిప్రాయాలు వ్యక్తమవుతున్నాయి.
ఈ విషయమే కృష్ణదాస్ అభ్యంతరానికి కారణమైందని అంటున్నారు. వైసీపీ తనకు, తన అన్నకు కూడా మంత్రివర్గంలో అవకాశం కల్పించింది. అలాంటి పార్టీలో కొనసాగకపోవడం సరికాదన్నది కృష్ణదాస్ అభిప్రాయం. పైగా తమ కుటుంబం వై.ఎస్. రాజశేఖర రెడ్డి (Y. S. Rajasekhara Reddy) కాలం నుంచి ఆయన కుటుంబానికే అంకితమైందని, ఇప్పుడు జగన్‌ను వదిలిపెట్టడం కుటుంబానికి ప్రతిష్టా నష్టం తేవచ్చని కృష్ణదాస్ వాదిస్తున్నట్టు సమాచారం.
ప్రసాదరావు అయితే రాజకీయాల్లో అవకాశం దొరికినపుడు వేరే మార్గం ఎంచుకోవడం తప్పేమీ కాదని భావిస్తున్నారని టాక్. ఈ కారణంగానే ఇద్దరి మధ్య సంబంధాలు చల్లారిపోయాయని, మాట్లాడుకోవడం కూడా తగ్గిపోయిందని రాజకీయ వర్గాల్లో చర్చ నడుస్తోంది.ఈ పరిణామాలను జగన్ దగ్గరగా గమనిస్తున్నారని చెబుతున్నారు. పార్టీకి అంకితభావంతో ఉన్నవారు ఎవరూ, వేరే దారులు చూసే వారు ఎవరూ అన్న లెక్కలు వేసుకుంటున్నట్టు తెలుస్తోంది. అయితే ఎవరి నిర్ణయాల్లోనూ తాను జోక్యం చేసుకోనని సంకేతాలు ఇస్తున్నారని పార్టీ వర్గాలు చెబుతున్నాయి. చివరికి ధర్మాన ప్రసాదరావు ఏ దిశలో అడుగులు వేస్తారనేది ప్రస్తుతం ఆసక్తికరంగా మారింది.
