Free Bus Scheme: షరతులతో కూడిన ఫ్రీ బస్సు స్కీం.. పెదవి విరుస్తున్న ప్రజలు..

ఆంధ్రప్రదేశ్‌లో ప్రభుత్వం మహిళల కోసం ప్రారంభించబోతున్న ఉచిత బస్సు పథకం గురించి చర్చలు, విమర్శలు కొనసాగుతున్నాయి. ఈ నెల 15వ తేదీన ఆర్భాటంగా ప్రారంభించబోతున్నామని అధికార యంత్రాంగం ప్రకటించినా, వాస్తవంలో ఇది ఎంత వరకు అందరికీ ఉపయోగపడుతుందనే ప్రశ్నలు వస్తున్నాయి. ఇక ఈ ఉచిత బస్సు స్కీం పై సోషల్ మీడియాలో పలు రకాల మీమ్స్ వైరల్ అవుతున్నాయి. “మైసూర్ బోండాలో మైసూర్ లేనట్లే… ఫ్రీ బస్సు స్కీం లో ఫ్రీ లేదా” అనే కామెంట్లు పెద్ద ఎత్తున షేర్ అవుతున్నాయి.

ప్రచారంలో ఉన్నంతగా ఈ పథకం రాష్ట్రమంతా సమానంగా అందుబాటులో లేదని చాలా మంది చెబుతున్నారు. ఎందుకంటే, అన్ని రకాల బస్సులకు ఇది వర్తించడం లేదు. ముఖ్యంగా, ఏపీఎస్ ఆర్టీసీ (APSRTC) నడిపే పల్లె వెలుగు (Palle Velugu) బస్సులకు మాత్రమే ఎక్కువగా వర్తింపజేయడంతో, అవి ఎక్కడి వరకు వెళ్తాయో అందరికీ తెలిసిందే. గ్రామీణ ప్రాంతాలకు వెళ్లే ఈ బస్సులు చాలాసార్లు గమ్యానికి చేరుకోవడానికి ఎక్కువ సమయం పడుతుంది.

అలాగే నగర ప్రాంతాల్లో మెట్రో ఎక్స్‌ప్రెస్ (Metro Express), సిటీ బస్సుల (City Buses) విషయంలో కూడా పరిమిత మార్గాలకే ఉచితం వర్తించడం వల్ల ప్రయాణికులు అసంతృప్తి వ్యక్తం చేస్తున్నారు. ఒక ప్రదేశం నుంచి ఇంకో ప్రదేశానికి వెళ్లాలంటే మధ్యలో పలుమార్లు బస్సులు మారాల్సి రావడం, సమయాన్ని వృథా చేయడం వంటి సమస్యలు ఉన్నాయి.

ప్రజలు ముఖ్యంగా దీన్ని ఎన్నికల హామీతో పోలుస్తున్నారు. ఎన్నికల సమయంలో “రాష్ట్రమంతా మీకు కావాల్సిన చోటుకి ఉచిత బస్సులో వెళ్లవచ్చు” అని చెప్పి, వాస్తవంలో అనేక ఆంక్షలు పెట్టడం వల్ల విస్మయం వ్యక్తం చేస్తున్నారు. ఉదాహరణకు, తిరుపతి (Tirupati) చేరుకున్న తర్వాత తిరుమల (Tirumala) వెళ్లాలంటే మళ్ళీ టికెట్ కొనాల్సి రావడం, ఆ మార్గంలో ఉచిత పథకం వర్తించకపోవడం వంటి అంశాలు చర్చకు వస్తున్నాయి. మరి కొంతమంది చంద్రబాబు పథకాలు అన్ని ఇలాగే ఉంటాయి.. ముందు చెప్పేది ఒకటి అమలులోకి వచ్చేసరికి ఆంక్షలు లెక్కలేనన్ని ఉంటాయి అని అంటున్నారు.

కొన్ని రూట్లలో ఉచిత ప్రయాణం అనుమతించినా, ఆ రూట్లు తక్కువ దూరం మాత్రమే ఉండడం వల్ల ఎక్కువ మంది ప్రయోజనం పొందలేకపోతున్నారు. ముఖ్యంగా, గ్రామీణ మహిళలు ఈ పథకం నుంచి ఎక్కువ ప్రయోజనం పొందుతారని అనుకున్నా, వారు తమ గమ్యానికి చేరుకునే వరకు అనేక ఇబ్బందులు ఎదుర్కొంటున్నారు. ప్రజల అంచనాలను దృష్టిలో పెట్టుకుని ఉచిత బస్సు పథకాన్ని అన్ని సర్వీసులకు వర్తింపజేయాలని చాలా మంది సూచిస్తున్నారు.

అలా చేస్తేనే హామీకి నిజమైన అర్థం వస్తుందని భావిస్తున్నారు. లేకపోతే, ఇది కేవలం పరిమిత ప్రయాణానికి మాత్రమే ఉపయోగపడే పథకంగా మిగిలిపోతుందని అంటున్నారు.ఇప్పుడు కూటమి నాయకులు, ప్రభుత్వం ఈ అంశంపై పునరాలోచన చేస్తారా లేదా అన్నది చూడాలి. ఎందుకంటే, ఒకవైపు ప్రజల్లో ఈ పథకం మీద ఆశలు పెరిగి ఉండగా, మరోవైపు అనేక ఆంక్షలు పెట్టడం వల్ల అసంతృప్తి పెరుగుతోంది. చివరికి, ఉచిత బస్సు పథకం నిజంగా అందరికీ అందుబాటులోకి వస్తేనే అది లక్ష్యాన్ని చేరుకున్నట్టవుతుంది అని అందరూ అంటున్నప్పటికీ కూటమి దీన్ని ఎంతవరకు ఆచరణలోకి తీసుకొస్తుందో చూడాల్సి ఉంది.