Free Bus Scheme: ఉచిత బస్సు స్కీమ్ ఎఫెక్ట్.. తగ్గిపోతున్న పురుష ప్రయాణికుల శాతం..

ఆంధ్రప్రదేశ్ కూటమి ప్రభుత్వం ఇటీవల మహిళల కోసం ప్రత్యేకంగా ప్రవేశపెట్టిన “స్త్రీ శక్తి” (Stree Shakti) పథకం పెద్ద ఎత్తున చర్చకు దారితీసింది. టీడీపీ అధినేత, ముఖ్యమంత్రి నారా చంద్రబాబు నాయుడు (Nara Chandrababu Naidu) గత ఎన్నికల ముందు ఇచ్చిన సూపర్-6 హామీల్లో ఇది ఒకటి. ఆయన అప్పట్లో అధికారంలోకి వస్తే మహిళలకు ఉచిత ఆర్టీసీ (APSRTC) బస్సు ప్రయాణ సౌకర్యం కల్పిస్తామని స్పష్టంగా చెప్పిన విషయం తెలిసిందే. ఇచ్చిన మాటను నిలబెట్టుకుంటూ, ప్రభుత్వం ఏర్పడిన 15 నెలల్లోనే ఆగస్టు 15న స్వాతంత్ర్య దినోత్సవం సందర్భంగా ఈ పథకాన్ని ప్రారంభించారు.

ప్రారంభం నుంచి ఇప్పటివరకు తొమ్మిది రోజులు పూర్తి కావడంతో, ఆర్టీసీ అధికారులు (APSRTC officials) తాజా గణాంకాలను విడుదల చేశారు. ఈ గణాంకాలు చూస్తే మహిళా ప్రయాణికుల సంఖ్య రోజురోజుకు గణనీయంగా పెరుగుతున్నట్లు తెలుస్తోంది. మొదటి రెండు రోజుల్లోనే మూడు లక్షల మహిళలు ఈ పథకం ద్వారా ప్రయాణించగా, తరువాతి రోజుల్లో ఆ సంఖ్య మరింత పెరుగుతూ వచ్చింది. ప్రస్తుతం 85 శాతం వరకు మహిళలు ఆర్టీసీ బస్సులను వినియోగిస్తున్నారని అధికారులు వెల్లడించారు.

ఇంతవరకు సాధారణంగా 60 శాతం వరకు మహిళలే బస్సులో ప్రయాణించేవారు. మిగిలిన 40 శాతం మంది పురుషులు ఉండేవారు. కానీ ఇప్పుడు పరిస్థితి మారింది. ఉచిత ప్రయాణ సదుపాయం రావడంతో మహిళలే అధికంగా బస్సులో ఉండటం ప్రారంభించారు. దీనివల్ల పురుషుల శాతం సగానికి పైగా తగ్గిపోయిందని అధికారులు పేర్కొన్నారు. అంటే, మహిళలు ఎక్కువ కావడంతో పురుషులు బస్సు ప్రయాణం తప్పించుకుంటున్నారని అర్థమవుతోంది.

దీనికి కొన్ని కారణాలు ఉన్నాయని విశ్లేషిస్తున్నారు. ముఖ్యంగా అన్ని సీట్లలోనూ మహిళలు కూర్చోవడం వల్ల పురుషులకు ఇబ్బంది కలుగుతుందని భావిస్తున్నారు. అంతేకాకుండా, బస్సు మొత్తం మహిళలతో నిండిపోవడంతో నిలబడి ప్రయాణించేందుకు కూడా పురుషులు ఇష్టపడటం లేదని చెబుతున్నారు. కొన్ని సందర్భాల్లో మహిళల మధ్య చిన్నపాటి ఘర్షణలు జరగడం కూడా పురుషులను వెనక్కు తగ్గించే అంశమైందని అధికారులు గుర్తించారు.

ఈ తొమ్మిది రోజుల వ్యవధిలో సుమారు రెండు కోట్ల మంది మహిళలు “స్త్రీ శక్తి” పథకం కింద ప్రయాణించినట్లు అంచనా. ఉచిత ప్రయాణాల ద్వారా 41.22 కోట్ల రూపాయల వ్యాపారం నమోదైందని, ఆ మొత్తాన్ని ప్రభుత్వం రీయింబర్స్‌మెంట్ రూపంలో ఆర్టీసీకి (APSRTC) అందించనుందని అధికారులు తెలిపారు.

ఈ పథకం మహిళలలో విస్తృత ఆదరణ పొందడమే కాకుండా, వారి రవాణా సౌకర్యాన్ని సులభతరం చేసింది. ముఖ్యంగా గ్రామీణ ప్రాంతాల నుండి పట్టణాలకు వెళ్లే మహిళలకు ఇది మరింత ఉపయుక్తంగా మారింది. మరోవైపు, పురుషుల సంఖ్య తగ్గిపోవడం కూడా ఒక కొత్త ధోరణిగా నిలుస్తోంది. మొత్తం మీద “స్త్రీ శక్తి” పథకం ప్రారంభ దశలోనే విస్తృత స్పందనను రాబట్టడం గమనార్హం. కానీ ప్రస్తుతం రాష్ట్రం ఉన్న పరిస్థితుల్లో ఈ బడ్జెట్ను ఎంతవరకు భరిస్తుంది ? ఈ పథకం ఎన్నాళ్లు కొనసాగుతుంది? అన్న విషయాలు కూడా ఆసక్తికరంగా మారింది..