Vangalapudi Anitha: తాటి చెట్లతో పాయకరావుపేట మత్స్యకారుల వినూత్న నిరసన.. కంగుతిన్న హోమ్ మినిస్టర్..

విశాఖపట్నం జిల్లా (Visakhapatnam District) పాయకరావుపేట (Payakaraopeta) ప్రాంతంలో సోమవారం సాయంత్రం ఊహించని సంఘటన చోటుచేసుకుంది. సాధారణంగా నిరసన అంటే నినాదాలు చేయడం, రోడ్లపై బైఠాయించడం మాత్రమేనని అందరికీ తెలిసిన విషయం. కానీ ఇక్కడి మత్స్యకారులు, గ్రామస్థులు మాత్రం భిన్నంగా స్పందించారు. ఏకంగా పది నుండి పదిహేను అడుగుల ఎత్తైన తాటిచెట్లను రహదారిపై పడవేసి వాహనాలను ఆపేశారు. ముఖ్యంగా ఈ నిరసనలో వారి లక్ష్యం హోం శాఖ మంత్రి వంగలపూడి అనిత (Vangalapudi Anitha) కాన్వాయ్. ఆమె పాయకరావుపేట నియోజకవర్గం ఎమ్మెల్యే కూడా కావడంతో స్థానికులు ఆగ్రహాన్ని వ్యక్తం చేశారు.

మంత్రి రాక సమాచారం తెలిసిన వెంటనే వందలాదిగా చేరుకున్న ప్రజలు రహదారిని దిగ్బంధించారు. పెద్ద తాటిచెట్లను రోడ్డుకు అడ్డంగా పెట్టి వాటి వెనుక కూర్చుని ఆందోళనను కొనసాగించారు. ఈ సడన్ నిరసనతో పోలీసులు కంగుతిన్నారు. కొద్దిసేపట్లోనే మంత్రి కాన్వాయ్ అక్కడికి చేరడంతో ఉద్రిక్తత పెరిగింది. ప్రజల ఆగ్రహాన్ని గమనించిన మంత్రి మొదట కాసేపు కారు బయటకు రాలేకపోయారు. అనంతరం పరిస్థితి అర్థం చేసుకుని, ప్రజల దగ్గరకు వెళ్లి మాట్లాడేందుకు ముందుకు వచ్చారు.

గ్రామస్థులు మాత్రం తమ సమస్యలను నేరుగా ఆమె ముందుంచారు. “ఇన్ని రోజులుగా మేము మా సమస్యల గురించి ఎంతగా చెబుతున్నా ఎవ్వరు పట్టించుకోవడం లేదా? మా భూములు పోతే మా జీవనోపాధి ఏమవుతుంది?” అంటూ నిలదీశారు. నినాదాలు చేస్తూ మంత్రిపై ఒత్తిడి తెచ్చారు. దీనికి ప్రతిస్పందనగా అనిత గారు ఈ వ్యవహారంపై ఒక కమిటీని ఏర్పాటు చేస్తామని చెప్పినా, అక్కడి ప్రజలు ఒప్పుకోలేదు. చివరికి ముఖ్యమంత్రితోనే చర్చిస్తానని హామీ ఇచ్చారు. అయినా స్థానికులు ససేమిరా అన్నట్లే ఉన్నారు.

ఈ వివాదం వెనుక కారణం పాయకరావుపేటలోని రాజయ్యపేట (Rajayyapeta) ప్రాంతంలో ప్రతిపాదించిన బల్క్ డ్రగ్ పార్క్ (Bulk Drug Park). ఔషధ తయారీ పరిశ్రమల కోసం ప్రభుత్వం భూములు సేకరించేందుకు యత్నిస్తోంది. ఇప్పటికే అక్కడ ఒక పార్క్ ఉందని, దానిని తొలగించాలని మత్స్యకారులు సంవత్సరాలుగా కోరుతున్నారు. కానీ ప్రభుత్వం దానిని విస్తరించేందుకు నిర్ణయం తీసుకోవడంతో స్థానికులు ఆగ్రహం వ్యక్తం చేస్తున్నారు. కేంద్రం నుంచి నిధులు వస్తున్న నేపథ్యంలో అధికార యంత్రాంగం ముందుకు వెళ్తుండగా, భూములు ఇవ్వమని ఒప్పుకోక ప్రజలు కఠిన వైఖరి తీసుకున్నారు.

ఇటీవలి కాలంలో కాకినాడ జిల్లా (Kakinada District) ఉప్పాడ (Uppada) ప్రాంతంలోనూ మత్స్యకారులు పెద్ద ఎత్తున ఆందోళన చేశారు. అక్కడ వారు ఉప ముఖ్యమంత్రి పవన్ కళ్యాణ్ (Pawan Kalyan) వచ్చేవరకు వెనక్కి తగ్గేది లేదని ప్రకటించారు. అదే విధంగా పాయకరావుపేట ప్రజలు కూడా స్పష్టమైన హామీ వచ్చే వరకు వెనక్కి తగ్గకూడదనే ధోరణి చూపిస్తున్నారు.

మొత్తానికి ప్రభుత్వం పరిశ్రమల అభివృద్ధి పేరుతో ముందుకు సాగుతున్నా, స్థానికుల ఆవేదన మాత్రం పెరుగుతూనే ఉంది. జీవనాధారం కోల్పోతామనే భయం, పర్యావరణంపై ఆందోళన మత్స్యకారులను వీధులపైకి తెచ్చింది. పైకి ప్రశాంతంగా ఉన్నట్లు కనిపించినా, లోపల ఈ సమస్యలు మరింత ముదురుతున్నాయి.