ఏపీ, తెలంగాణకు కరువు ముప్పు..?

భారత వాతావరణ శాఖ (IMD) దేశవ్యాప్తంగా వర్షపాతానికి సంబంధించి తీవ్ర ఆందోళనకరమైన సంచలన ప్రకటన విడుదల చేసింది. ఈ ఏడాది దేశంలో కరువు ముప్పు పొంచి ఉందని, నైరుతి ఋతుపవనాల (Monsoon) వర్షపాత అంచనాలను భారీగా తగ్గిస్తున్నట్లు వాతావరణ శాఖ స్పష్టం చేసింది. ఈసారి దేశంలో తీవ్ర కరువు పరిస్థితులు ఏర్పడేందుకు ఏకంగా 60 శాతం అవకాశం ఉందని ఐఎండీ అంచనా వేయడం వ్యవసాయ రంగాన్ని, ప్రజలను కలవరపెడుతోంది.

వాతావరణ శాస్త్రవేత్తల విశ్లేషణ ప్రకారం.. పసిఫిక్ మహాసముద్రంలో ఏర్పడిన బలమైన ‘ఎల్‌నినో’ (El Nino) ప్రభావం భారత ఋతుపవనాలపై తీవ్రంగా పడబోతోంది. దీనివల్ల రాబోయే ‘జూన్ – సెప్టెంబర్’ సీజన్‌లో సాధారణ వర్షపాతంలో కేవలం 90 శాతం మాత్రమే వర్షాలు కురిసే అవకాశం ఉంది. వర్షపాతం ఇంతలా పడిపోతే దేశంలోని ప్రధాన జలాశయాలు ఎండిపోయి, తాగునీటి ఎద్దడితో పాటు సాగునీటికి తీవ్ర కొరత ఏర్పడే ప్రమాదం ఉంది. ఋతుపవనాల రాక ఆలస్యం కావడం మరియు బలహీనపడటం వల్ల రాబోయే జూన్ నెలలో ఆంధ్రప్రదేశ్ (AP), తెలంగాణ సహా దేశంలోని పలు రాష్ట్రాల్లో ఎండలు ముదరనున్నాయి.

జూన్ అంతటా తీవ్రమైన వడగాల్పులు (Heatwaves) వీచే అవకాశం ఉందని ఐఎండీ హెచ్చరించింది. సాధారణం కంటే ఉష్ణోగ్రతలు చాలా ఎక్కువగా నమోదయ్యే అవకాశం ఉన్నందున ప్రజలు, ముఖ్యంగా రైతులు అప్రమత్తంగా ఉండాలని సూచించింది. ఐఎండీ ఇచ్చిన కరువు హెచ్చరికల నేపథ్యంలో ఆంధ్రప్రదేశ్ మరియు తెలంగాణ ప్రభుత్వాలు అప్రమత్తమవుతున్నాయి. వర్షాలు తగ్గితే ప్రత్యామ్నాయ పంటల ప్రణాళికలు, తాగునీటి సరఫరా నిర్వహణ మరియు నీటి పొదుపు చర్యలపై అధికారులు ముందస్తు వ్యూహాలు సిద్ధం చేస్తున్నారు. ఈ ఏడాది రుతుపవనాలపై ఆధారపడే ఖరీఫ్ సాగుపై ఈ ఎల్‌నినో ప్రభావం ఎలా ఉంటుందోనని అన్నదాతలు తీవ్ర ఆందోళన వ్యక్తం చేస్తున్నారు.