Chandrababu: నందమూరి కుటుంబ బంధాలు.. హరికృష్ణ జ్ఞాపకాలను తలచుకున్న సీఎం చంద్రబాబు..
- Published By: techteam
- August 29, 2025 / 05:05 PM IST
ఆంధ్రప్రదేశ్ ముఖ్యమంత్రి నారా చంద్రబాబు నాయుడు (Nara Chandrababu Naidu) అధికారిక ఎక్స్ (X) ఖాతా ఈరోజు ఒక ప్రత్యేకమైన భావోద్వేగపు పోస్టుతో ఆకర్షణగా మారింది. సాధారణంగా ప్రభుత్వ కార్యక్రమాలు, పరిపాలనలోనే బిజీగా ఉండే చంద్రబాబు, కుటుంబ అనుబంధాలను గుర్తుచేసుకుంటూ చేసిన ఈ ట్వీట్ రాజకీయ వర్గాల్లో చర్చనీయాంశంగా మారింది. నందమూరి హరికృష్ణ (Nandamuri Harikrishna) వర్ధంతి సందర్భంగా ఆయనను కీర్తిస్తూ చేసిన ఈ ట్వీట్ సోషల్ మీడియాలో విస్తృతంగా వైరల్ అవుతోంది.
చంద్రబాబు తన సందేశంలో హరికృష్ణను కేవలం బావగానే కాకుండా ఆత్మీయత, స్నేహం పంచిన వ్యక్తిగా పేర్కొన్నారు. కుటుంబ సభ్యులు మాత్రమే కాదు, పార్టీ కార్యకర్తలు, అభిమానులందరికీ హరికృష్ణ ఆప్యాయతను పంచిన మంచి మనిషి అని ఆయన గుర్తు చేశారు. ఈ మాటలు నందమూరి అభిమానుల్లో ప్రత్యేక స్పందన రేకెత్తించాయి.
నందమూరి హరికృష్ణ తెలుగుదేశం పార్టీ (TDP) ఆవిర్భావ దశల్లో కీలకపాత్ర పోషించారు. ఆయన తన తండ్రి, పార్టీ వ్యవస్థాపకుడు నందమూరి తారకరామారావు ( NTR) చేపట్టిన చైతన్య రథయాత్రలో డ్రైవర్‌గా వ్యవహరించి అందరి దృష్టిని ఆకర్షించారు. ఆ కాలంలో పార్టీకి హరికృష్ణ అందించిన సేవలు ఇప్పటికీ గుర్తుండిపోయేవి. 1995లో జరిగిన ఆగస్టు సంక్షోభ సమయంలో ఆయన తన బావ చంద్రబాబు పక్షాన నిలబడి రవాణాశాఖ మంత్రిగా పనిచేశారు. కానీ ఆరు నెలల్లో శాసనసభ సభ్యుడిగా ఎన్నిక కావాల్సిన అవసరం ఉండగా, అది సాధ్యంకాకపోవడంతో ఆయన మంత్రిత్వానికి రాజీనామా చేశారు. ఆ తర్వాత ‘అన్నా తెలుగుదేశం’ పేరుతో ప్రత్యేక పార్టీని స్థాపించి గుడివాడ (Gudivada) నుండి పోటీ చేశారు. అయితే ఎన్నికల్లో విజయం సాధించలేక, కొంతకాలం దూరంగా ఉన్నా తిరిగి తెలుగుదేశం పార్టీలో చేరి రాజ్యసభ సభ్యుడిగా కొనసాగారు.
హరికృష్ణ వ్యక్తిగత జీవితం, ఆయన రాజకీయ ప్రయాణం ఎత్తుపల్లాలతో నిండినా, ప్రజలతో మమేకమై ఉండే స్వభావం ఆయనను ప్రత్యేకంగా నిలబెట్టింది. ఆయన కుమారులు జూనియర్ ఎన్టీఆర్ (Jr NTR) కల్యాణ్ రామ్ (Kalyan Ram) తెలుగు సినిమాల్లో సత్తా చాటుతున్నారు. ఇటీవల జూనియర్ ఎన్టీఆర్ ,టీడీపీ పార్టీ మధ్య దూరం పెరిగిందనే చర్చలు సాగుతుండగా, చంద్రబాబు చేసిన ఈ ట్వీట్ మరోసారి నందమూరి కుటుంబ బంధాలను వెలుగులోకి తెచ్చింది.
ఇటీవలి కాలంలో జూనియర్ ఎన్టీఆర్ పై కొన్ని రాజకీయ నాయకులు చేసిన వ్యాఖ్యలు వివాదాస్పదమవగా, ఆయన అభిమానులు ఆగ్రహం వ్యక్తం చేశారు. ఇలాంటి సమయంలో చంద్రబాబు చేసిన హరికృష్ణ జ్ఞాపకాల ట్వీట్ అభిమానుల మనసును కొంత శాంతింపజేసిందని అంటున్నారు. రాజకీయంగా కూడా ఈ ట్వీట్ వెనుక ప్రత్యేకమైన సందేశం దాగి ఉందని పార్టీ వర్గాలు విశ్లేషిస్తున్నాయి.ఈ విధంగా, హరికృష్ణ వర్ధంతి సందర్భంలో చంద్రబాబు చేసిన ఈ పోస్ట్ ఒక వైపు కుటుంబ అనుబంధాన్ని గుర్తు చేస్తే, మరోవైపు తెలుగుదేశం పార్టీ చరిత్రలోని కొన్ని మధుర క్షణాలను తిరిగి గుర్తుకు తెచ్చింది.
