బెజవాడలో అర్ధరాత్రి సిబిఐ స్పీడ్..!

రాష్ట్రవ్యాప్తంగా తీవ్ర సంచలనం సృష్టించిన విజయవాడ రాణిగారి తోటకు చెందిన గాదె సాయికృష్ణ లాకప్ డెత్ కేసులో కేంద్ర దర్యాప్తు సంస్థ (CBI) తన విచారణను తీవ్రతరం చేసింది. ఆంధ్రప్రదేశ్ హైకోర్టు ఆదేశాల మేరకు రంగంలోకి దిగిన సీబీఐ అడిషనల్ ఎస్పీ నేతృత్వంలోని ప్రత్యేక బృందం విజయవాడ చేరుకుని దర్యాప్తును వేగవంతం చేసింది. ఈ క్రమంలోనే ఘటనకు ప్రధాన కేంద్రమైన కృష్ణలంక పోలీస్ స్టేషన్‌లో సీబీఐ అధికారులు అర్ధరాత్రి వరకు సుదీర్ఘంగా తనిఖీలు మరియు విచారణ చేపట్టడం బెజవాడ పోలీస్ వర్గాల్లో తీవ్ర కలకలం రేపుతోంది.

కృష్ణలంక పోలీస్ స్టేషన్‌లో సీబీఐ బృందం ఏకధాటిగా దాదాపు 6 గంటల పాటు విచారణ జరిపింది. ఈ విచారణలో భాగంగా సాయికృష్ణను అదుపులోకి తీసుకున్నప్పటి నుండి జరిగిన ప్రతి పరిణామాన్ని అధికారులు క్షుణ్ణంగా పరిశీలించారు. గతంలో ఈ కేసును దర్యాప్తు చేసిన రాష్ట్ర ప్రభుత్వ ప్రత్యేక విచారణ బృందం (SIT) సేకరించిన రికార్డులను, డాక్యుమెంట్లను ఇప్పటికే స్వాధీనం చేసుకున్న సీబీఐ, వాటి ఆధారంగా లోతుగా ఆరా తీసింది. స్టేషన్‌లో విచారణ సమయంలో సాయికృష్ణను ఎక్కడ ఉంచారు? థర్డ్ డిగ్రీ ఎక్కడ ప్రయోగించారు? అనే విషయాలపై కీలక ఆధారాలను సేకరించినట్లు సమాచారం.

పోలీసుల అక్రమ నిర్బంధం, చిత్రహింసల కారణంగా సాయికృష్ణ మరణించిన తర్వాత.. సాక్ష్యాలను మాయం చేసేందుకు పోలీసులు అనుసరించిన వ్యూహాలపై సీబీఐ ప్రధానంగా దృష్టి సారించింది. సాయికృష్ణ చనిపోయిన తర్వాత అతని మృతదేహాన్ని స్టేషన్ నుండి ఎక్కడికి తరలించారు? స్వర్గపురి శ్మశానవాటికలో రహస్యంగా ఎలా దహనం చేశారు? అనే పరిణామాలపై అప్పటి కృష్ణలంక సీఐ నాగరాజు మరియు ఇతర సిబ్బంది పాత్రపై ఆరా తీశారు. అంతేకాకుండా, స్టేషన్‌లోని సీసీటీవీ హార్డ్ డిస్క్‌లను మార్చడం, సాయికృష్ణ బతికే ఉన్నాడని నమ్మించేందుకు అతని ఫోన్‌ను వేరే ప్రాంతానికి పంపడం వంటి కుట్రలపై మరిన్ని వివరాలను సేకరిస్తున్నారు.