Bonda Uma: ప్రజలకంటే ప్రైవేట్ కార్యక్రమాలకే ప్రాధాన్యతా? విజయవాడ నేతల తీరుపై విమర్శలు

విజయవాడ (Vijayawada) వంటి రాజకీయంగా చైతన్యమున్న ప్రాంతాల్లో ఇటీవల ఒక రకమైన పరిస్థితి కనిపిస్తోంది. సీనియర్ నాయకులు తమ నియోజకవర్గాల్లో పదేళ్లకుపైగా కొనసాగుతుండటంతో ఒక ప్రత్యేకమైన ఆధిపత్యం నెలకొంటోంది. ప్రజలకు దగ్గరగా ఉండే నాయకులు గతంలో ఎక్కువగా ఉండేవారు. కానీ ఇప్పుడు పరిస్థితి మారిపోయింది. ప్రస్తుతం అధిక శాతం సీనియర్ నేతలు ప్రజల సమస్యలకంటే తమ కార్యకలాపాలకే ఎక్కువ ప్రాధాన్యం ఇస్తున్నట్టు చర్చలు సాగుతున్నాయి.

విజయవాడ సెంట్రల్ (Central) నియోజకవర్గం నుంచి ఎన్నికైన బొండా ఉమా (Bonda Uma) గతంలో మాస్ లీడర్‌గా మంచి గుర్తింపు పొందారు. పారిశ్రామికవేత్తగా మొదలుపెట్టి రాజకీయాల్లోకి వచ్చిన ఆయన 2014లో తొలిసారి ఎమ్మెల్యేగా విజయం సాధించారు. అప్పట్లో వైసీపీపై తీవ్ర విమర్శలు చేయడం వల్ల తెలుగుదేశం పార్టీ అధినేత చంద్రబాబు నాయుడు (Chandrababu Naidu) దృష్టిలో మంచి స్థానం సంపాదించుకున్నారు. అయితే మంత్రిపదవి ఆశించినా అది రాలేదు. తర్వాత 2019లో ఓటమిని ఎదుర్కొన్నారు. మళ్లీ 2024లో విజయం సాధించినా, ప్రజలకు అందుబాటులో లేకపోవడం, పార్టీ సీనియర్ నేతలతో సమన్వయం లేకపోవడం వల్ల విమర్శలు ఎదురవుతున్నాయి. ఆయన్ను కలవడం కూడా చాలా మందికి కష్టంగా మారిందని పలువురు అభిప్రాయపడుతున్నారు.

ఇదే తరహాలో తూర్పు నియోజకవర్గం నుంచి వరుసగా మూడుసార్లు గెలుస్తున్న గద్దె రామ్మోహన్ (Gadde Ramamohan) గురించి కూడా ప్రస్తుతం చర్చ జరుగుతోంది. ఆయన తక్కువ మాట్లాడే నేతగా పేరుగాంచారు. కానీ ఇటీవల పార్టీ కార్యక్రమాల నుంచి ఆయన దూరంగా ఉన్నట్టు సమాచారం. నియోజకవర్గంలో కాకుండా ఇతర పనుల్లో ఎక్కువగా గడుపుతున్నారన్న భావన పార్టీ కార్యకర్తల్లో ఉంది. ఇది పార్టీకి నెమ్మదిగా నష్టాన్ని కలిగించవచ్చని సీనియర్లు భావిస్తున్నారు.

ఇప్పటివరకు వీరి నియోజకవర్గాల్లో చంద్రబాబు ప్రారంభించిన “సుపరిపాలనలో తొలి అడుగు” కార్యక్రమం ప్రారంభం కాలేదు. ఇది కూడా వారిపై గాసిప్‌లకు కారణమవుతోంది. పార్టీకి అనుకూలంగా ఉన్నా, ప్రజలతో సంబంధాలు మెరుగుపరచకపోతే భవిష్యత్తులో సమస్యలు తప్పవన్నది టిడిపి లోపలే ఉన్న పలువురు నాయకుల అభిప్రాయం. ఇకపై వీరు తమ తీరును మార్చుకుంటారా ? వీరిపై అధిష్ఠానం ఎలా స్పందిస్తుంది అనేది చూడాల్సిందే