Chandra Babu: బీజేపీ అధ్యక్షుల నియామకం.. హాట్ టాపిక్ గా మారిన చంద్రబాబు..

రెండు తెలుగు రాష్ట్రాల్లో తాజాగా బీజేపీ (BJP) రాష్ట్ర అధ్యక్షుల నియామకం జరిగిన సంగతి తెలిసిందే. కానీ ఈ మార్పుల వెనుక ఆంధ్రప్రదేశ్ ముఖ్యమంత్రి చంద్రబాబు నాయుడు (Chandrababu Naidu) ప్రమేయం ఉందనే చర్చ రాజకీయ వర్గాల్లో జోరుగా సాగుతోంది. ఏదైనా కీలక మార్పు జరిగినపుడు చంద్రబాబు పేరు వినిపించడం సాధారణమైన విషయం. కూటమిగా ఏర్పడిన తర్వాత చంద్రబాబుపై ఇలాంటి ప్రచారాలు మరింత జోరుగా సాగుతున్నాయి.

ఆంధ్రప్రదేశ్‌లో బీజేపీ నూతన అధ్యక్షుడిగా పీవీఎన్ మాధవ్ (PVN Madhav) నియమితులవడం రాజకీయంగా ఆసక్తికరంగా మారింది. పురందేశ్వరి (Purandeswari) పదవి కాలం పూర్తయినా, ఆమె బదిలీ వెనుక చంద్రబాబు వ్యవహారం ఉందని ప్రతిపక్షాలు ఆరోపిస్తున్నాయి. మాధవ్‌ను అందరితో సమన్వయంగా పని చేసే నాయకుడిగా చంద్రబాబు సూచించారని, ఆ కారణంగా ఆయన ఎంపిక జరిగిందని ఓ వర్గం విశ్లేషిస్తోంది.

ఇదే సమయంలో తెలంగాణలోనూ బీజేపీ కొత్త అధ్యక్షుడిగా గారేపల్లి రామచంద్రరావు (Garepalli Ramachandra Rao) నియమితులవడం చర్చనీయాంశమైంది. అక్కడ కూడా చంద్రబాబు పేరు తెరపైకి వచ్చిందంటే రాజకీయంగా ఆయన ప్రభావం ఎంతదూరం వ్యాపించిందో తెలుస్తోంది. తెలంగాణ రాజకీయాల్లో చంద్రబాబు (Chandrababu) ముఖ్యపాత్ర పోషించనప్పటికీ, ఆయనను వ్యతిరేక దళాలు ఒక ప్రతీకగా చూపిస్తూ విమర్శలు చేస్తున్నాయి. ముఖ్యంగా బీఆర్ఎస్ (BRS) తరచూ ఆయన్ను టార్గెట్ చేస్తూ మాటల యుద్ధానికి దిగుతోంది.

తెలంగాణ ముఖ్యమంత్రి రేవంత్ రెడ్డి (Revanth Reddy) పై చంద్రబాబు ప్రభావం ఉందంటూ ప్రచారం సాగించడమేగాక, బీజేపీతో కలిసి ఆయన రాష్ట్రానికి నష్టం చేస్తారని బీఆర్ఎస్ ఆరోపిస్తోంది. మరికొందరు నేతలు అయితే తెలంగాణ బీజేపీలో పదవి ఆశించిన డీకే అరుణ (DK Aruna), ఈటల రాజేందర్ (Etela Rajender) లకు అవకాశం రాకపోవడాన్ని చంద్రబాబు వ్యతిరేకులుగా ఉండటమే కారణమని వ్యాఖ్యానిస్తున్నారు. ఇదంతా చూస్తే, చంద్రబాబు రాజకీయంగా ఏదైనా నిర్ణయం తీసుకున్నా, తీసుకోకపోయినా – దాని ప్రభావం రెండు రాష్ట్రాల్లో రాజకీయ చర్చలకు కేంద్రబిందువుగా మారుతోంది. ఆయన్ను ప్రశంసించే వాళ్లూ ఉన్నారు, విమర్శించే వాళ్లూ ఉన్నారు. అయినా, ఎప్పటికప్పుడు ఏదైనా కీలక పరిణామం చోటు చేసుకుంటే, చంద్రబాబు పేరును లైమ్ లైట్‌లోకి తీసుకురావడం ఒక ట్రెండ్‌ అయ్యింది అని మరికొందరు అభిప్రాయపడుతున్నారు.