Ambati Rambabu: గుంటూరు వెస్ట్ బాధ్యతలతో అంబటికి మరో ఛాలెంజ్.. జగన్ కీలక వ్యూహం

వైఎస్సార్ కాంగ్రెస్ పార్టీ (YSRCP)లో సీనియర్ నేత అయిన అంబటి రాంబాబు (Ambati Rambabu)కి మరోసారి కీలక బాధ్యతలు అప్పగిస్తూ పార్టీ అధినేత వైఎస్ జగన్ మోహన్ రెడ్డి (Y.S. Jagan Mohan Reddy) కీలక నిర్ణయం తీసుకున్నారు. ప్రస్తుతం గుంటూరు జిల్లా అధ్యక్షుడిగా ఉన్న అంబటికి గుంటూరు వెస్ట్ (Guntur West) అసెంబ్లీ నియోజకవర్గ సమన్వయ బాధ్యతలు అప్పగించారు. ఇది కేవలం ఒక నియామకం మాత్రమే కాదు, టీడీపీ (TDP) బలంగా ఉన్న ఓ నియోజకవర్గాన్ని తిరిగి పార్టీకి దక్కించుకోవాలనే వ్యూహాత్మక ప్లాన్‌లో భాగంగా చెబుతున్నారు.

గుంటూరు వెస్ట్ అసెంబ్లీ నియోజకవర్గం 2009లో ఏర్పడింది. ఆ ఎన్నికల్లో కాంగ్రెస్ గెలిచినప్పటికీ ఆ తరువాత మూడు సార్లు టీడీపీ విజయం సాధించింది. గడచిన ఎన్నికల్లో అక్కడ వైసీపీ తరఫున పోటీ చేసిన విడదల రజని (Vidadala Rajani) భారీ మెజార్టీతో ఓడిపోయారు. దీంతో ఆమెను చిలకలూరిపేటకి షిఫ్ట్ చేసిన జగన్, ఈ సారి గుంటూరు వెస్ట్ బాధ్యతలను అంబటి చేతిలో పెట్టారు. ప్రస్తుత ఎమ్మెల్యే గళ్లా మాధవి (Galla Madhavi), మేయర్ కోవెలమూడి రవీంద్ర (Kovelamudi Ravindra) వంటి నేతలు అక్కడ టీడీపీ బలాన్ని నిలబెట్టారు. నియోజకవర్గంలో బీసీలతో పాటు వైశ్య మరియు కమ్మ వర్గాలకు కూడా ఎక్కువ ఓటు బ్యాంక్ ఉండటం వల్ల అక్కడ గెలవటం తేలికకాదు.

అంబటి కృష్ణా జిల్లాకు చెందినవారు అయినా, గుంటూరు రాజకీయాల్లో నాలుగు దశాబ్దాలుగా చురుకుగా ఉన్నారు. ఆయన రాజకీయ ప్రయాణం 1988లో మొదలైంది. 1989లో రేపల్లె (Repalle) నుండి ఎమ్మెల్యేగా గెలిచారు. అనంతరం కొన్ని ఎన్నికల్లో ఓడిపోయినప్పటికీ, వైఎస్ రాజశేఖరరెడ్డికి అత్యంత సమీపంగా ఉండటం, ఆయన మరణం తర్వాత జగన్ కు మద్దతు ఇచ్చి వైసీపీ ఏర్పాటులో భాగం కావడం అంబటి ప్రయాణానికి మైలురాయిలుగా నిలిచాయి.

2014లో సత్తెనపల్లికి (Sattenapalli) మారిన అంబటి, 2019లో మంత్రి పదవిని కూడా చేపట్టారు. అయితే ఇటీవల జరిగిన ఎన్నికల్లో కన్నా లక్ష్మీనారాయణ చేతిలో ఓడిపోయారు. స్థానికేతరుడన్న ఆరోపణలతో పార్టీ ఆయనను సత్తెనపల్లిలో నుంచి తప్పించింది. ఇప్పుడు గుంటూరు వెస్ట్ బాధ్యతలు అప్పగించడం ద్వారా అంబటి రాజకీయంగా మళ్లీ కీలక పాత్ర పోషించబోతున్నారు. ప్రస్తుతం ఆయన టీడీపీ ప్రభుత్వంపై విమర్శలతో పాటు పార్టీ కార్యకర్తలపై ఉన్న కేసులపై పోరాటం చేస్తున్నారు. నల్లకోటుతో కోర్టుకు హాజరవుతూ, తన పిటిషన్లను స్వయంగా సమర్పిస్తూ, యాక్టివ్‌గా వ్యవహరిస్తున్నారు. ఈ నేపథ్యంలో అంబటికి కొత్త బాధ్యతలు ఇవ్వడం రాజకీయంగా ప్రాధాన్యతను సంతరించుకుంది. అయితే ప్రస్తుతం గట్టిగా ఉన్న టీడీపీ కేడర్‌ను అంబటి తట్టుకోగలరా అన్నది ఆసక్తికరంగా మారింది.