తినడానికి తిండి లేదు..రక్షణకు పాక్ వేలాది కోట్ల బడ్జెట్..!
- Published By: Srinivas Mohan
- June 14, 2026 / 09:10 AM IST
పాకిస్తాన్.. ప్రపంచంలోనే ఓ విఫలదేశం.. నాయకుల అవినీతి.. పెచ్చుమీరిన మిలటరీ జోక్యం.. వెరసి పాకిస్తాన్ లో సుపరిపాలన అనే పదం మాయమైంది. వచ్చిన కాసిన్ని నిదులు కూడా.. ఉగ్రవాదుల శిబిరాలు నిర్వహణకు వినియోగిస్తున్న దేశమది. అలాంటి దేశంలో ప్రజల పరిస్థితి ఎలా ఉంటుంది. ఒక్క రొట్టెముక్క.. ఒక్క గుడ్డు.. కాసిన్ని బ్రెడ్ ముక్కల కోసం వందల రూపాయలు వెచ్చిస్తున్నారు పాకిస్తానీలు. ఇలాంటి దేశంలో అధికారంలో ఉన్నవారెవరైనా ఏం చేయాలి.. దేశ ఆర్థిక వ్యవస్థను గాడిన పెట్టి.. ప్రజల్ని అభివృద్ధి దిశగా కార్యోన్ముఖుల్ని చేయాలి.
కానీ..పాకిస్తాన్ మాత్రం పొరుగున ఉన్న భారత్ తో పోల్చుకుంటూ.. తన రక్షణ బడ్జెట్ ను పెంచుకుంటూ పోతోంది. ఈ ఏడాది తన రక్షణ వ్యయాన్ని గణనీయంగా 3 వేల బిలియన్ల పాకిస్థానీ రూపాయలకు (సుమారు రూ.29 వేల కోట్లు) చేర్చింది. గత ఏడాది రక్షణ రంగానికి కేటాయించిన 2550 బిలియన్ల పాకిస్థానీ రూపాయలతో పోల్చితే ఇది 17.6 శాతం అధికం. 2026-27 బడ్జెట్ను జాతీయ అసెంబ్లీలో పాక్ ఆర్థిక, రెవెన్యూ మంత్రి మహమ్మద్ ఔరంగజేబు ప్రవేశపెట్టారు. ప్రభుత్వం రక్షణ శాఖ బడ్జెట్ను గణనీయంగా పెంచిందని ఈ సందర్భంగా ఆయన తెలియజేశారు. దేశ ఆర్థిక వృద్ధిరేటు 4 శాతంగా ఉన్నట్లు పేర్కొన్నారు. మొత్తం కేంద్ర బడ్జెట్ను దాదాపు 18,771 బిలియన్ల పాకిస్థానీ రూపాయలుగా అంచనా వేశారు. దీనిలో 8,054 బిలియన్ల పాకిస్థానీ రూపాయలను రుణాలు, వడ్డీ చెల్లింపుల కోసం కేటాయించారు. బడ్జెట్లో అభివృద్ధి కోసం కొత్త పథకాలేవీ ప్రకటించలేదు.
తీవ్రమైన ఆర్థిక సంక్షోభం, ద్రవ్యోల్బణం ఉన్నప్పటికీ, ప్రాంతీయ భద్రతా సవాళ్లు మరియు సరిహద్దు ఉద్రిక్తతల దృష్ట్యా షెహబాజ్ షరీఫ్ ప్రభుత్వం ఈ భారీ పెంపుదలను ప్రకటించింది.ప్రస్తుత అంతర్జాతీయ మార్కెట్ ప్రకారం పాకిస్తాన్ రక్షణ వ్యయం దాదాపు 10.8 బిలియన్ డాలర్లకు చేరుకుంది. చైనా భాగస్వామ్యంతో కొనుగోలు చేస్తున్న హంగోర్ తరగతి జలాంతర్గాములు మరియు సరిహద్దు రక్షణ కోసం కొనుగోలు చేస్తున్న క్షిపణులు, యుద్ధ విమానాల వాయిదాల చెల్లింపుల కోసం ఈ నిధులు అవసరమయ్యాయి.
పొరుగు దేశాలతో ఉన్న భద్రతా అస్థిరత మరియు అంతర్గత ఉగ్రవాద నిరోధక చర్యల దృష్ట్యా సైనిక సంసిద్ధతను పెంచుకోవాల్సి వచ్చిందని పాకిస్తాన్ ఆర్థిక మంత్రి ముహమ్మద్ ఔరంగజేబ్ పేర్కొన్నారు.సైనిక సిబ్బంది జీతాల పెరుగుదల, కార్యాచరణ ఖర్చులు (Operating Expenses) మరియు పెన్షన్ల భారం కూడా ఈ పెంపునకు దారితీశాయి. అంతర్జాతీయ ద్రవ్య నిధి (IMF) షరతులకు అనుగుణంగా పన్ను వసూళ్ల లక్ష్యాన్ని రూ. 15.26 ట్రిలియన్లకు పెంచడం వల్ల సామాన్యులు, జీతగాళ్లపై పన్నుల భారం తీవ్రమైంది.రక్షణ రంగానికి భారీగా నిధులు మళ్లించడం వల్ల దేశంలో విద్య, ఆరోగ్యం మరియు మౌలిక వసతుల అభివృద్ధి (Development Spending) బడ్జెట్ను ప్రభుత్వం గణనీయంగా తగ్గించాల్సి వచ్చింది.దేశంలో దాదాపు 36% పైగా కుటుంబాలు ఆహార కొరతను ఎదుర్కొంటున్న తరుణంలో ‘ప్రజా సంక్షేమం’ కంటే ‘సైనిక అవసరాలకే’ పాకిస్తాన్ ప్రాధాన్యత ఇస్తోందని అంతర్జాతీయ విశ్లేషకులు విమర్శిస్తున్నారు.
