షబ్బీర్ అలీకి ఏఐసీసీ షోకాజ్ నోటీసులు!
- Published By: Vasishta
- June 13, 2026 / 04:20 PM IST
తెలంగాణ కాంగ్రెస్ పార్టీలో తీవ్ర కలకలం రేపిన అంతర్గత వివాదం చివరకు అధిష్టానం వద్దకు చేరింది. టీపీసీసీ అధ్యక్షుడు మహేశ్ కుమార్ గౌడ్తో పాటు పార్టీ హైకమాండ్ను లక్ష్యంగా చేసుకుని తీవ్ర ఆరోపణలు చేసినట్లు ప్రచారంలో ఉన్న ఆడియో క్లిప్ వ్యవహారంపై ఏఐసీసీ తీవ్రంగా స్పందించింది. పార్టీ గౌరవానికి, క్రమశిక్షణకు భంగం కలిగించేలా వ్యవహరించారంటూ కాంగ్రెస్ సీనియర్ నాయకుడు, ప్రభుత్వ సలహాదారు మహ్మద్ అలీ షబ్బీర్కు ఏఐసీసీ క్రమశిక్షణ కమిటీ అధికారికంగా షోకాజ్ నోటీసులు జారీ చేసింది. పార్టీ అంతర్గత విషయాలను బహిరంగంగా చర్చకు పెట్టడంపై తీవ్ర అసంతృప్తి వ్యక్తం చేసిన అధిష్టానం, దీనిపై తక్షణమే వివరణ ఇవ్వాలని హుకుం జారీ చేసింది.
ఈ వివాదానికి ప్రధాన కేంద్రం సోషల్ మీడియాలో దావానలంలా వైరల్ అయిన ఒక ఆడియో క్లిప్. కామారెడ్డి నియోజకవర్గానికి చెందిన ఒక ముఖ్య నేతతో షబ్బీర్ అలీ ఫోన్లో మాట్లాడినట్లు చెబుతున్న ఈ సంభాషణ కాంగ్రెస్ పార్టీలో ఊహించని రాజకీయ అలజడిని సృష్టించింది. ఆ ఆడియోలో కాంగ్రెస్ అధిష్టానంపై, రాష్ట్ర నాయకత్వంపై అత్యంత ఘాటైన, వివాదాస్పద వ్యాఖ్యలు ఉన్నాయి. కాంగ్రెస్ పార్టీ పూర్తిగా అమ్ముడుపోయే పార్టీగా మారిందని, రాత్రింబగళ్లు కష్టపడి నమ్ముకున్న నిబద్ధత గల నాయకులను పక్కనబెట్టేస్తున్నారని సదరు ఆడియోలో ఆవేదన వ్యక్తం చేశారు. కేవలం పైసలు ఇచ్చిన వాళ్లకే పార్టీలో కీలక పదవులు దక్కుతున్నాయని, అర్హత లేకపోయినా ధనబలంతోనే నాయకులుగా చలామణి అవుతున్నారని ఆరోపించారు.
వైరల్ ఆడియోలో పదవుల కేటాయింపులపై చేసిన మరికొన్ని వ్యాఖ్యలు కాంగ్రెస్ శ్రేణుల్లో తీవ్ర చర్చకు దారితీశాయి. “డబ్బులు ఇచ్చి, పండబెట్టి పదవులు తీసుకుంటున్నారని”, టీపీసీసీ అధ్యక్షుడు మహేశ్ కుమార్ గౌడ్ ముడుపులు తీసుకుని పదవులను అమ్ముకుంటున్నారని ఆరోపణలు గుప్పించడం పార్టీని తీవ్ర రక్షణలో పడేసింది. ఈ ముడుపులన్నీ నేరుగా ఒక పెద్ద తలకాయకే అందుతున్నాయని, పదవుల పంపకాల వెనుక ఏం జరుగుతుందో తాను ప్రతి ఒక్క అంశాన్ని నిశితంగా గమనిస్తున్నానని ఆ ఆడియోలో పేర్కొన్నారు. మహిళలను సైతం కించపరిచేలా ఉన్నాయంటూ చెబుతున్న కొన్ని వ్యాఖ్యలు ఈ వివాదాన్ని మరింత రాజేసాయి.
ఈ ఆడియో లీక్ ఉదంతం వెనుక కామారెడ్డి జిల్లా కాంగ్రెస్లో నెలకొన్న తీవ్రమైన వర్గపోరు దాగి ఉంది. సీనియర్ నేత షబ్బీర్ అలీ వర్గానికి, అసెంబ్లీ ఎన్నికల ముందు పార్టీలో చేరిన టీపీసీసీ ప్రధాన కార్యదర్శి గడ్డం చంద్రశేఖర్ రెడ్డి వర్గానికి మధ్య గత కొంతకాలంగా ఆధిపత్య పోరు సాగుతోంది. ఇటీవలే చంద్రశేఖర్ రెడ్డిని క్రమశిక్షణ కమిటీ పిలిపించి వివరణ కోరగా, ఆయన షబ్బీర్ అలీ నాయకత్వ శైలి వల్లే గత రెండు దశాబ్దాలుగా కామారెడ్డిలో కాంగ్రెస్ గెలవలేకపోతోందని ఎదురుదాడి చేశారు. మరోవైపు, తమపై సోషల్ మీడియాలో తప్పుడు ప్రచారం జరుగుతోందని ఆరోపిస్తూ మాజీ మున్సిపల్ చైర్పర్సన్ గడ్డం ఇందుప్రియ జిల్లా ఎస్పీకి ఫిర్యాదు చేయడం స్థానికంగా రాజకీయ ఉద్రిక్తతలను పెంచింది.
రాష్ట్రంలో అధికారంలో ఉన్న తరుణంలో, టీపీసీసీ అధ్యక్షుడిపైనే అవినీతి ఆరోపణలు రావడం, అది కూడా సొంత పార్టీ సీనియర్ నేత నుంచి రావడంపై ఏఐసీసీ అధినాయకత్వం అత్యంత సీరియస్గా ఉంది. షబ్బీర్ అలీ అనుచరులు ఈ ఆడియోను మార్ఫింగ్ అని, తమ నాయకుడిని బద్నాం చేయడానికి ప్రత్యర్థి వర్గం చేసిన కుట్రగా కొట్టిపారేస్తున్నప్పటికీ, అధిష్టానం మాత్రం వెనక్కి తగ్గలేదు. క్రమశిక్షణ కమిటీ చైర్మన్ మల్లు రవి నేతృత్వంలో ఈ వ్యవహారాన్ని పరిశీలించిన అనంతరం ఏఐసీసీ ఈ షోకాజ్ నోటీసును జారీ చేసింది. ఈ నోటీసుకు షబ్బీర్ అలీ ఇచ్చే వివరణ ఆధారంగా కాంగ్రెస్ అధిష్టానం ఎలాంటి కఠిన చర్యలు తీసుకోబోతోందనేది ఇప్పుడు ఆసక్తికరంగా మారింది.
