మేరీల్యాండ్‌ లో ఘనంగా వైఎస్సార్‌ జయంతి వేడుకలు

అమెరికాలోని మేరీ ల్యాండ్‌లో దివంగ ముఖ్యమంత్రి డాక్టర్‌ వై.ఎస్‌.రాజశేఖరరెడ్డి జయంతి వేడుకలు ఘనంగా జరిగాయి. కులమతాలకు అతీతంగా మేరీ ల్యాండ్‌లోని ఎన్‌ఆర్‌ఐలందరూ ఒకేచోట చేరి వైఎస్సార్‌ 68వ జయంతి వేడుకలను అత్యంత వైభవంగా నిర్వహించారు. మహిళలకు పిల్లలకు ఆటల పోటీలు నిర్వహించారు. అనంతరం తెలుగు రాష్ట్రాల నుంచి అమెరికా వచ్చిన పెద్దలు మేరిల్యాండ్‌లోని ఎన్‌ఆర్‌ఐలకు వైఎస్సార్‌ పాలనని, ఆయన మడమ తిప్పని ఔన్నత్యాన్ని బడుగు, బలహీన, కార్మిక, శ్రామిక, రైతు వర్గాలకు ఆయన చేసిన మంచిపనులను వివరించారు.

అనంతరం వైఎస్సార్‌ జయంతి సందర్భంగా హోవార్డ్‌ కౌంటీ పుడ్‌ బ్యాంక్‌ కి భారీ స్థాయిలో ఆహారాన్ని వితరణగా ఇచ్చారు. వైఎస్సార్‌ మరణించినా ఆయన ఆశయాలను అమలు పరిచే విధంగా తమ సేవా కార్యక్రమాలు నిరంతరం కొనసాగిస్తామని మేరీల్యాండ్‌ వైఎస్సార్‌ అభిమానులు ప్రతిజ్ఞ చేశారు. ఇటువంటి కార్యక్రమాలు మున్నుందు మేరీల్యాండ్‌లో మరిన్ని చేసి తమ ప్రియతమ నాయకుడు రాజశేఖర్‌ రెడ్డి ఖ్యాతిని వ్యాప్తి చెందేలా కృషి చేస్తామన్నారు. రాజన్న ఆశయాలు కొనసాగించే ధైర్యం వైఎస్‌ఆర్‌సీపీ అధినేత, ప్రతిపక్షనేత వైస్‌ జగన్‌మోహన్‌ రెడ్డికి మాత్రమే సాధ్యమన్నారు. 2019లో వైఎస్‌ జగన్‌ మోహన్‌ రెడ్డిని ముఖ్యమంత్రి పీఠంపై నిలిపేందుకు తమ సహకారం ఎప్పుడు అందించడానికి సిద్ధమని మేరీల్యాండ్‌లోని ఎన్‌ఆర్‌ఐలు తెలిపారు.