మలేషియాలో అట్టహాసంగా తెలంగాణ రాష్ట్ర అవతరణ దశాబ్ది వేడుకలు
- Published By: techteam
- June 3, 2024 / 09:20 PM IST
మలేషియా తెలంగాణ అసోసియేషన్ (MYTA) ఆధ్వర్యంలో తెలంగాణ రాష్ట్ర అవతరణ దినోత్సవ వేడుకలు పైన్స్ కండొమినియం , బ్రిక్ ఫీల్డ్స్, కౌలాలంపూర్, మలేషియాలో అట్టహాసంగా జరిగాయి. “జయ జయహే తెలంగాణ జననీ జయకేతనం” గీతంతో కార్యక్రమం ప్రారంభమయింది అనంతరం జ్యోతి ప్రజ్వలన చేసి అందరు శుభాకాంక్షలు తెలుపుకున్నారు. తెలంగాణ అమర వీరులకు నివాళులర్పించి ఒక నిమిషం మౌనం పాటించారు. ఈ కార్యక్రమంలో మహిళలు, చిన్నారులతో పాటుగా భారీ సంఖ్యలో ప్రవాసీయులు పాల్గొన్నారు. తెలంగాణ సంస్కృతి వెల్లివిరిసేలా పలు సాంస్కృతిక కార్యక్రమములు, చిన్నారుల ఆట పాటలు ప్రేక్షకులను అలరించాయి.
ఈ కార్యక్రమంలో భాగంగా ప్రెసిడెంట్ సైదం తిరుపతి మాట్లాడుతూ.. తెలంగాణ రాష్ట్ర సాధన కోసం ప్రాణాలర్పించిన అమరులను, పోరాడి సాధించుకున్న తెలంగాణ నేడు దశాబ్ది ముగిసిన సందర్భంలో 60 ఏండ్ల పోరాట చరిత్రను ఈ సందర్భంగా గుర్తు చేశారు. అలాగే తెలంగాణ వచ్చిన తర్వాత ప్రారంభమైన మలేషియా తెలంగాణ అసోసియేషన్ కూడా పది సంవత్సరాలు పూర్తి చేసుకున్న తరుణంలో త్వరలో దశాబ్ధి ఉత్సవాలను నిర్వహించనున్నట్లు తెలిపారు. ఈ సందర్భంగా మలేషియా తెలంగాణ అసోసియేషన్ దశాబ్ది ఉత్సవాలు మూడు రోజుల పాటు జరపడానికి సన్నాహాలు ప్రారంభిస్తుందని తెలిపారు. అలాగే ‘మైట’ సేవా కార్యక్రమాలు మరింత విస్తృతం చేస్తున్నట్లు తెలియజేశారు.
ఈ కార్యక్రమాన్ని విజయవంతం చేసిన సభ్యులందరికీ ఆయన కృతజ్ఞతలు తెలియజేసారు. ఈ కార్యక్రమంలో ముఖ్య అతిథిగా భారత రాష్ట్ర సమితి మలేషియా అధ్యక్షులు చిట్టి బాబు గారు మరియు ప్రెసిడెంట్ సైదం తిరుపతి, డిప్యూటీ ప్రెసిడెంట్ చొప్పరి సత్య, వైస్ ప్రెసిడెంట్ బూరెడ్డి మోహన్ రెడ్డి, సెక్రటరీ సందీప్ కుమార్, ట్రేజరర్ మారుతి, జాయింట్ ట్రేజరర్ రవీందర్ రెడ్డి, ఎగ్జిక్యూటివ్ మెంబర్స్ సంతోష్, రవి వర్మ, కృష్ణ వర్మ, హరి ప్రసాద్, రాములు, సుందర్, కృష్ణ రెడ్డి.. ఉమెన్స్ వింగ్ ప్రెసిడెంట్ కిరణ్మయి, యూత్ ప్రెసిడెంట్ కిరణ్ గౌడ్, యూత్ వైస్ ప్రెసిడెంట్ రవితేజ.. కల్చరల్ వింగ్ మెంబర్స్ విజయ్ కుమార్, చందు, రామ కృష్ణ, రంజిత్, దివ్య, సాహితి, సాయిచరని, ఇందు.. మైగ్రెంట్ వింగ్ మెంబర్స్ సందీప్ గౌడ్, నరేందర్ రెడ్డి తదితరులు పాల్గొన్నారు.
