IT Serve Alliance Synergy: సినర్జీ 2025కి పూర్తయిన ఏర్పాట్లు
- Published By: techteam
- November 29, 2025 / 09:51 AM IST
అమెరికాలో అతి పెద్ద ఐటీ సంఘంగా ఐటీ సర్వ్‌ అలయన్స్‌కు గుర్తింపు ఉంది. అన్నీ ప్రతిష్టాత్మక ఐటీ కంపెనీలన్నీ ఇందులో సభ్యత్వాన్ని కలిగి ఉన్నాయి. ఐటీ కంపెనీల కూటమి వేదికగా ఉన్న ఐటీ సర్వ్‌ ఆలయన్స్‌ తన సభ్యులకోసం అవసరమైన నిర్ణయాలను తీసుకోవడంతోపాటు వాటి అమలుకు కృషి చేస్తుంది. ప్రతి ఏటా సినర్జీ పేరుతో మహాసభలను నిర్వహిస్తోంది. ఈ వేదిక లక్ష్యం ఐటీ సేవలు మరియు కన్సల్టింగ్‌ సంస్థల ప్రయోజనాలను పరిరక్షించడం, అగ్రశ్రేణి విద్యా వనరులను అందించడం మరియు అసమానమైన నెట్‌వర్కింగ్‌ అవకాశాలను సులభతరం చేయడం ద్వారా వాటికి శక్తినివ్వడం, పరిశ్రమలో సమగ్రత, వృత్తి నైపుణ్యం, ప్రతిభను ప్రోత్సహించడానికి, ఆవిష్కరణలను ముందుకు తీసుకెళ్లడానికి మరియు అత్యున్నత ప్రమాణాలను నెలకొల్పడానికి ఈ ఐటీ సర్వ్‌ అలయన్స్‌ కృషి చేస్తోంది.
దాంతోపాటు ఐటీ సేవల రంగంలో ముఖ్య శక్తిగా ఎదగటానికి అవసరమైన సహకారం, ఆవిష్కరణల విషయంలో తోడ్పాటు, సభ్యుల సంఖ్య పెరుగుదలకు కృషి చేస్తూనే తమ సంఘంలో ఉంటున్నవారి విజయాలకు అవసరమైన అనుకూల మైన వ్యాపార వాతావరణాన్ని సృష్టించడం లక్ష్యంగా పెట్టుకుని ఐటీ సర్వ్‌ పనిచేస్తోంది. ఐటీ పరిశ్రమ పురోగతికి తోడ్పాటును అందిస్తోంది. ఐటీ సర్వ్‌ తన 24 చాప్టర్ల ద్వారా అమెరికా అంతటా విస్తరించి ఉంది. ఈ కూటమిలో 2,300 మందికి పైగా సిఎక్స్‌ ఓలు, 2,000 పైగా కంపెనీలు సభ్యులుగా ఉన్నాయి. హెచ్‌ 1 బి వీసాల విషయంలో సభ్యులకు మద్దతుగా నిలవడం, విద్యా వనరులను అందించడం. సాటిలేని నెట్‌వర్కింగ్‌ అవకాశాలను కల్పించడానికి కూడా ఈ ఐటీ సర్వ్‌ అలయన్స్‌ కృషి చేస్తోంది. స్థానిక నెట్‌వర్కింగ్‌ కోసం నెలవారీ చాప్టర్‌ మీటింగ్‌లు, ప్రాంతీయ సమావేశాలు ఏర్పాటుచేసి సభ్యుల మధ్య చర్చలకు వేదికగా నిలుస్తోంది. ఇమ్మిగ్రేషన్‌, పన్ను/ఆర్థిక ప్రణాళిక ఇతర విషయాలపై సెమినార్‌ లను నిర్వహిస్తోంది. సభ్యుల మధ్య ఏర్పడే సమస్యల పరిష్కారానికి కూడా కృషి చేస్తోంది. సామాజిసేవల్లో భాగంగా వివిధ కార్యక్రమాలను కూడా ఐటీ సర్వ్‌ చేస్తోంది. స్కాలర్‌షిప్‌లు, యువపారిశ్రామిక వేత్తలకు ఆన్‌ లైన్‌ ద్వారా శిక్షణను సూచనలను అందిస్తోంది.
ముఖ్య అతిధులు
ఈ వేడుకల్లో పలువురు ప్రముఖులు పాల్గొంటున్నారు. అమెరికన్‌ ఎంట్రప్రెన్యూరర్‌, పొలిటిషియన్‌ వివేక్‌ రామస్వామి, పర్సిస్టెంట్‌ సిస్టమ్స్‌ సిఇఓ, ఎగ్జిక్యూటివ్‌ డైరెక్టర్‌ సందీప్‌ కల్రా, వెడ్‌బుష్‌ సెక్యూరిటీస్‌ మేనెజింగ్‌ డైరెక్టర్‌ డేనియల్‌ ఐవ్స్‌, టెన్నిస్‌ ఆటగాడు లియాండర్‌ పేస్‌, మాజీ మిస్‌ వరల్డ్‌ డయానా హైడెన్‌, మాజీ టెన్నిస్‌ ప్లేయర్‌ సానియా మీర్జా, పాల్‌ తదితరులు ఈ వేడుకల్లో పాల్గొననున్నారు.
వివేక్‌ రామస్వామి: ఎంట్రప్రెన్యూరర్‌గా, జాతీయ అంశాలపై రాజకీయ నాయకునిగా తన అనుభవాలను ఆయన ఈ సినర్జీ 2025లో పంచుకోనున్నారు.
డేనియల్‌ ఐవ్స్‌: సాంకేతిక మార్కెట్లు మరియు పెట్టుబడి పోకడలు గురించి మాట్లాడతారు.
సందీప్‌ కల్రా: డిజిటల్‌ ట్రాన్స్‌ఫర్మేషన్‌ (డిజిటల్‌ పరివర్తన) మరియు సుస్థిర వృద్ధిపై ప్రసంగిస్తారు.
లియాండర్‌ పేస్‌, సానియా మీర్జా: ఆటల పోటీల్లో తమ ప్రదర్శన అనుభవాలను పంచుకోనున్నారు.
డయానా హేడెన్‌: మహిళా నాయకత్వంపై తన దృక్పథాన్ని తెలియజేయనున్నారు.
పాల్‌ డోహెర్టీ: ప్రపంచవ్యాప్తంగా ప్రసిద్ధి చెందిన మరియు అవార్డు గెలుచుకున్న ఆర్కిటెక్ట్‌, వ్యూహకర్త, సాంకేతిక విషయాలపై పట్టు ఉన్న వ్యక్తి. ఈ సినర్జీ సదస్సులో ఎఐ, డిజటిల్‌ ట్రాన్ఫర్మేషన్‌ గురించి ప్రసంగించనున్నారు.
