ఉప్పెన తర్వాత ఐదేళ్ల గ్యాప్… బుచ్చిబాబు కలల ప్రాజెక్ట్ ‘పెద్ది’

ఉప్పెన(Uppena)తో తొలి సినిమాకే సంచలన విజయాన్ని అందుకున్న దర్శకుడు బుచ్చిబాబు సానా (Buchibabu sana), ఆ సక్సెస్ తర్వాత వెంటనే మరో ప్రాజెక్ట్‌ను ప్రారంభించకపోవడం అప్పట్లో ఇండస్ట్రీలో చర్చనీయాంశంగా మారింది. సాధారణంగా తొలి హిట్ తర్వాత డైరెక్ట‌ర్లు అవకాశాలను అందిపుచ్చుకునేందుకు వేగంగా ముందుకెళ్తుంటారు. కానీ బుచ్చిబాబు మాత్రం తనకు నచ్చిన కథను, తాను ఊహించిన హీరోతోనే తెరకెక్కించాలనే టార్గెట్ తో దాదాపు ఐదేళ్ల పాటు ఎదురు చూశారు. తాజాగా ఆయన వెల్లడించిన విషయాలు చూస్తే, ఈ గ్యాప్ వెనుక కేవలం ప్రాజెక్ట్ ఆలస్యం మాత్రమే కాకుండా ఒక దర్శకుడి పట్టుదల, నమ్మకం, లక్ష్యసాధన కోసం చేసిన ప్రయాణం దాగి ఉన్నట్టు తెలుస్తోంది.

పెద్ది కథను రామ్ చరణ్‌(Ram charan)కు వినిపించే అవకాశం రావడానికే రెండున్నరేళ్లు పట్టిందని బుచ్చిబాబు వెల్లడించారు. తన గురువు సుకుమార్(Sukumar) సహకారంతో చరణ్‌ను కలిసే అవకాశం దక్కిందని, కథ చెప్పే ముందు దత్తాత్రేయ స్వామిని ప్రార్థిస్తూ ఈ కథలో ఒక్క మార్పు కూడా చెప్పకుండా ఓకే కావాల‌ని మొక్కుకున్నానని చెప్పారు. ఆశ్చర్యకరంగా చరణ్ కథ విన్న వెంటనే ఎలాంటి మార్పులు సూచించకుండా అంగీకరించారని తెలిపారు. నేటి పాన్ ఇండియా సినిమా వాతావరణంలో కథలు అనేక మార్పులకు గురవడం సహజం కాగా, ఒక డైరెక్ట‌ర్ విజన్‌ను యథాతథంగా నమ్మడం అరుదైన విషయంగా సినీ వర్గాలు భావిస్తున్నాయి.

అందుకే పెద్ది బుచ్చిబాబు కెరీర్‌లో మరో సినిమా మాత్రమే కాదు, ఆయన కలల ప్రాజెక్ట్‌గా మారింది. తనపై రామ్ చరణ్(ram charan) ఉంచిన నమ్మకానికి తాను ఎప్పటికీ రుణపడి ఉంటానని డైరెక్ట‌ర్ చెప్పడం వెనుక ఉన్న ఎమోష‌న్ కూడా అదే. ఇప్పుడు ఈ సినిమా ఫలితం కోసం ఇండస్ట్రీ ఆసక్తిగా ఎదురుచూస్తోంది. ఉప్పెన తర్వాత వచ్చిన ఐదేళ్ల విరామం విజయంతో ముగిస్తే, అది కేవలం బాక్సాఫీస్ హిట్‌గా కాకుండా దర్శకుడి సహనం, హీరో విశ్వాసం కలిసి సాధించిన విజయగాథగా నిలిచిపోతుందని విశ్లేషకులు అభిప్రాయపడుతున్నారు.