జ్ఞానవేల్‌తో డాక్ట‌ర్‌గా సూర్య‌ కొత్త సినిమా

సూర్య(suriya) తాజా సినిమా వీరభద్రుడు(Veerabhadrudu) స‌క్సెస్ తో కెరీర్‌లో కొత్త ఊపు అందుకున్న కోలీవుడ్ స్టార్ హీరో సూర్య, వరుసగా విభిన్నమైన కథలపై దృష్టి పెడుతున్నట్టు తెలుస్తోంది. చాలా కాలంగా భారీ బాక్సాఫీస్ విజయానికి ఎదురుచూసిన సూర్యకు ఈ సినిమా కొత్త నమ్మకాన్ని ఇచ్చింది. ఇదే సమయంలో ఆయన తదుపరి ప్రాజెక్టులపై కూడా సినీ వర్గాల్లో ఆసక్తికరమైన చర్చ సాగుతోంది. ముఖ్యంగా జై భీమ్(Jai Bhim) వంటి విమర్శకుల ప్రశంసలు పొందిన సినిమాను అందించిన దర్శకుడు టీజే జ్ఞానవేల్‌(TJ Gnanavel)తో మరోసారి కలిసి పనిచేయబోతున్నారనే వార్తలు దక్షిణాది సినీ పరిశ్రమలో హాట్ టాపిక్‌గా మారాయి.

కోలీవుడ్ వర్గాల సమాచారం ప్రకారం, ఈసారి జ్ఞానవేల్ నిజజీవితంలో విశేష సేవలు అందించిన ఓ ప్రముఖ వైద్యుడి జీవిత కథను తెరపైకి తీసుకురావాలని భావిస్తున్నారని తెలుస్తోంది. చెన్నైకు చెందిన డాక్టర్ కృష్ణ వరదాచారి తిరువేంగడం(Krishna varadachari tiruvengadam) జీవితాన్ని ఆధారంగా చేసుకుని బయోపిక్ రూపొందించే ప్రయత్నాలు జరుగుతున్నాయనే ప్రచారం వినిపిస్తోంది. ఛాతీ సంబంధిత వ్యాధుల నిపుణుడిగా పేరొందిన ఆయన, వైద్య సేవలను సాధారణ ప్రజలకు అందుబాటులో ఉంచేందుకు చేసిన కృషితో ప్రత్యేక గుర్తింపు పొందారు. తక్కువ ఫీజుతో వేలాది మంది రోగులకు ట్రీట్‌మెంట్ అందించిన ఆయన సేవలు వైద్య రంగంలో ప్రత్యేక అధ్యాయంగా నిలిచాయి.

ప్రజాసేవకు ప్రతీకగా నిలిచిన డాక్టర్ తిరువేంగడంకు కేంద్ర ప్రభుత్వం పద్మశ్రీ పురస్కారం కూడా ప్రదానం చేసింది. ఆయన జీవితంలో ఎదురైన సవాళ్లు, వైద్య రంగంలో సాధించిన విజయాలు, సమాజంపై చూపిన ప్రభావం వంటి అంశాలను ఈ సినిమాలో ప్రధానంగా చూపించే అవకాశముందని సమాచారం. అయితే ఈ ప్రాజెక్టుపై ఇప్పటివరకు అధికారిక ప్రకటన వెలువడలేదు. ఒకవేళ ఈ వార్త నిజమైతే, మరోసారి నిజజీవిత పాత్రలో సూర్య తన నటనతో ప్రేక్షకులను ఆకట్టుకునే అవకాశం ఉందని సినీ విశ్లేషకులు అభిప్రాయపడుతున్నారు.