ఇప్పుడు చాక్లెట్ బాయ్ రామ్ కాదు, ఉస్తాద్ రామ్ పోతినేని

33వ పుట్టినరోజు జరుపుకుంటున్నా RAPO
వై వి యస్ చౌదరి ‘దేవదాసు’ సినిమాతో వెండితెరకు పరిచయమైన  హీరోగా పరిచయమైన రామ్ పోతినేని తొలి సినిమాతోనే తెలుగు ప్రేక్షకుల మనస్సు దోచుకున్నాడు.   ఈ రోజు (మే 15) తన 33వ పుట్టినరోజు జరుపుకుంటున్నారు. ఈ సందర్భంగా అతని సినిమా కెరీర్‌కి సంబంధించి పలు ఆసక్తికర విషయాలు తెలుసుకుందాం. ఒకప్పుడు ఆయన ఓ చాక్లెట్ బాయ్, రొమాంటిక్, క్లాస్ సినిమాలకు కేరాఫ్ అడ్రస్. కానీ, రెండేళ్ల క్రితం ఇస్మార్ట్ శంకర్‌గా, ఉస్తాద్‌గా పేరు సంపాదించుకున్నారు. అతనే హీరో రామ్ పోతినేని. 2006లో తన సినీ కెరీర్ ప్రారంభించిన రామ్, విజయవంతంగా తన సినిమా ప్రస్థానాన్ని కొనసాగిస్తున్నారు. 15 సంవత్సరాల సినీ కెరీర్‌లో ఎన్నో ఎత్తుపల్లాలను చూశారు రామ్ పోతినేని మే 15, 1988న మురళీ పోతినేని, పద్మశ్రీ దంపతులకు జన్మించారు. ప్రముఖ సినీ నిర్మాత ‘స్రవంతి’ రవికిశోర్ కు మేనల్లడు రామ్.  

2002లో తమిళంలో తెరకెక్కిన అడయాళం అనే షార్ట్ ఫిలిమ్‌తో రామ్ తన యాక్టింగ్ కెరీర్‌ని ప్రారంభించారు. ఈ షార్ట్ ఫిలిమ్‌లో రామ్ డ్రగ్స్‌కి బానిస అయిన ఓ కుర్రాడిగా నటించారు. ఆ తర్వాత వై.వీ.ఎస్.చౌదరీ డైరెక్షన్‌లో 2006లో రూపొందిన ‘దేవదాసు’ సినిమాతో అతను వెండితెరకు పరిచయం అయ్యారు. ఈ సినిమా హిట్‌తో రామ్‌కి తెలుగులో వరుసగా ఆఫర్లు వచ్చాయి. 2008లో శ్రీను వైట్ల దర్శకత్వంలో రామ్ నటించిన ‘రెడీ’ సినిమా బ్లాక్‌బస్టర్ హిట్‌గా నిలిచింది. ఈ సినిమాని హిందీలో స్టార్ హీరో సల్మాన్ ఖాన్ రీమేక్ చేశారు. అయితే ఆ తర్వాత రామ్‌కి పెద్దగా హిట్లు లభించలేదు. అతను నటించిన ‘మస్కా’, ‘రామరామ కృష్ణకృష్ణ’, ‘ఎందుకంటే ప్రేమంట’, ‘ఒంగోలు గిత్త’, ‘మసాలా’, ‘పండగ చేస్కో’, ‘హైపర్’, ‘హలో గురు ప్రేమ కోసమే’ తదితర సినిమాలు బాక్సాఫీస్ వద్ద ఫర్వాలేదు అనిపించాయి. అయితే రామ్ మాత్రం తన పట్టు వదలలేదు. విలక్షణమైన నటనతో అతను ప్రేక్షకులను మెప్పు పొందుతూనే వచ్చారు. ఆ సినిమాలన్నీ క్లాస్ మూవీస్ కావడంతో ఇక 2019లో పూరీ జగన్నాథ్ దర్శకత్వంలో రామ్ నటించిన ‘ఇస్మార్ట్ శంకర్’ పక్క మాస్  సినిమా గా బ్లాక్ బస్టర్ మూవీ అయ్యింది.  అప్పటివరకూ చాక్లెట్‌ బాయ్‌లా ఉన్న రామ్‌ను ఈ సినిమాలో పక్కా మాస్ హైదరాబాదీ రౌడీగా పూరీ చూపించారు. ఈ సినిమాతో రామ్ ఇమేజ్ పూర్తిగా మారిపోయింది. దీని తర్వాత రామ్ ఈ ఏడాది ప్రారంభం లో  ‘రెడ్’ అనే సినిమాతో ప్రేక్షకుల ముందుకు వచ్చారు.  ఈ సినిమాలో అతను తొలిసారిగా ద్విపాత్రాభినయం చేశాడు. చిత్రం యావరేజ్ గా నిలిచింది. ప్రస్తుతం రామ్ లింగుస్వామి దర్శకత్వంలో ఓ సినిమా చేస్తున్నారు. ఈ సినిమా భారీ సక్సెస్ సాధించాలని తెలుగుటైమ్స్.నెట్  కోరుకుంటూ..పుట్టినరోజు శుభాకాంక్షలు తెలుపుకుంటుంది.