ఆర్ఆర్ఆర్ సినిమా నా భాధ్యతను ఇంకా పెంచింది : పుట్టిన రోజు సందర్భంగా రామ్ చరణ్

ఆర్ఆర్ఆర్ సినిమా టాక్ డివైడ్ వున్నా కలెక్షన్స్ పరంగా బ్లాక్ బస్టర్‌గా నిలిచింది. కలెక్షన్లలో కొత్త కొత్త రికార్డులు క్రియేట్ చేయబోతోంది. మొదటి రోజే 223 కోట్లు కొల్లగొట్టేసింది. ఈ విజయంపై రామ్ చరణ్ తాజాగా స్పందించాడు. ఆర్ఆర్ఆర్ సినిమా బ్లాక్ బస్టర్ హిట్ అయింది. రాజమౌళి తన మీద పెట్టుకున్న నమ్మకాన్ని నిలబెట్టుకున్నాడు. ఎన్ని అంచనాలైనా పెట్టుకోండి.. దాన్ని మించేలా ఉంటుందన్న మాటలు నిజమయ్యాయి. ఒక్కో హీరోకు ఇచ్చిన ఎలివేషన్, చూపించిన తీరుకు అభిమానులే కాదు సగటు సినీ ప్రేక్షకుడు ఊగిపోయాడు. థియేటర్లో విజిల్స్ మోత మోగిపోయాయి. ఈలలు, గోలలతో థియేటర్లు దద్దరిల్లిపోతోన్నాయి.

మొత్తానికి ఆర్ఆర్ఆర్ సినిమా ఇండియన్ హిస్టరీలో ప్రభంజనం క్రియేట్ చేస్తోంది. మొదటి రోజే 223 కోట్ల గ్రాస్‌ను కొల్లగొట్టి అందరినీ ఆశ్చర్యపరిచింది. ఈ దెబ్బతో బాహుబలి మొదటి రోజు రికార్డు బద్దలైపోయింది. తన సినిమాల రికార్డులను తాను మాత్రమే బద్దలు కొట్టగలనని రాజమౌళి మరోసారి నిరూపించాడు. ఈ సినిమాలో రామ్ చరణ్‌ను కొన్ని మార్కులు ఎక్కువ పడతాయి. రామరాజు పాత్రలోని వేరియేషన్స్‌ను రామ్ చరణ్ అద్భుతంగా పోషించేశాడు. కళ్లతోనే నటించేశాడు. రామ్ చరణ్ నటనకు ఫిదా కానివారెవ్వరూ ఉండరు. కెరీర్ బెస్ట్ పర్ఫామెన్స్ అని అందరూ ముక్తకంఠంతో చెప్పేస్తున్నారు. ఈ సినిమా మెగా ఫ్యాన్స్‌కు ప్రత్యేకంగా నిలుస్తుంది. ఎందుకంటే ఈ రోజు (మార్చి 27) రామ్ చరణ్ బర్త్ డే. ఈ పుట్టినరోజుకు ఆర్ఆర్ఆర్ రూపంలో అదిరిపోయే బహుమతి అభిమానులకు లభించింది. ఇక రామ్ చరణ్‌కు సైతం ఈ బర్త్ డే జీవితంలో గుర్తుండిపోతుంది. అయితే రామ్ చరణ్ తాజాగా ఓ నోట్ విడుదల చేశాడు. ఆర్ఆర్ఆర్ సక్సెస్ పట్ల స్పందిస్తూ అన్ని భాషల్లో నోట్ విడుదల చేశాడు. రాజమౌళి గారి ఆర్ఆర్ఆర్ సినిమా పట్ల మీరు చూపిస్తున్న ప్రేమ, ఆదరణకు హృదయపూర్వక ధన్యవాదాలు. ఎంతో ఉత్సాహంగా ఈ సినిమా చూసిన అందరికీ నా కృతజ్ఞతలు.. ఈ అపూర్వమైన పుట్టినరోజు బహుమానాన్ని బాధ్యతతో స్వీకరిస్తాను అని చెప్పుకొచ్చాడు.