నేను ఎలాంటి దొంగతనం చేయలేదు! మంచువారి విషయాలన్నీ బయట పెడతా!! : సెల్ఫీ లో మంచు విష్ణు హెయిర్ డ్రెస్స‌ర్ నాగ శ్రీను

హీరో విష్ణు మంచు కార్యాల‌యంలో ఐదు ల‌క్ష‌ల విలువైన హెయిర్ డ్రెస్సింగ్, మేక‌ప్‌ సామాగ్రిని హెయిర్ డ్రెస్స‌ర్ నాగ శ్రీను దొంగ‌త‌నం చేశాడంటూ పెట్టిన కేసు కీలక మ‌లుపు తీసుకుంది. పోలీసులు కేసును ద‌ర్యాప్తు చేస్తున్నారు. మోహన్ బాబు, విష్ణు మంచులపై వారి హెయిర్ డ్రెస్సర్ రీసెంట్ ఇంటర్వ్యూలో మాట్లాడుతూ వారు తన కాలు చేయి తీసేయాలనుకుంటున్నారని, అలాా చేస్తే వారి సీక్రెట్స్ బయట పెడతానని అన్నారు.అయితే ఈలోపు హెయిర్ డ్రెస్స‌ర్ నాగ శ్రీను తాను ఎలాంటి దొంగ‌త‌నం చేయ‌లేద‌ని, త‌న‌ను మోహ‌న్ బాబు మోకాళ్ల‌పై కూర్చో పెట్టి ప‌ది మందిలో అవ‌మానించ‌డం వ‌ల్లే తాను ఉద్యోగం మానేశాన‌ని, కావాలంటే వీడియో ఫుటేజ చెక్ చేసుకోవ‌చ్చున‌ని తెలియ‌జేస్తూ ఓ వీడియో విడుద‌ల చేశారు. దీనికి సంబంధించిన నాగ శ్రీను ఓ ఇంట‌ర్వ్యూలోనూ మాట్లాడారు.

‘‘నా పర్సనల్ విషయంలో ఓ స‌మ‌స్య వ‌చ్చింది. దాన్ని నేను ప‌రిష్క‌రించుకున్నాను. దానికి సంబంధించి డిసెంబ‌ర్‌లోనే ఓసారి మోహ‌న్ బాబుగారు న‌న్ను దూషించారు. స‌రే! తండ్రి స‌మానుడ‌ని భ‌రించాను. ఇక ఇప్పుడు గొడ‌వ జ‌రిగిన రోజు నేను భోజ‌నం చేస్తుంటే న‌న్ను పిలిచి మోకాళ్లు మీద కూర్చోమ‌న్నారు. ‘అమ్మాయిల‌కు షెల్ట‌ర్ ఇస్తున్నావ‌ట’ అని అన్నారు. న‌న్ను కులం పేరుతో అమ్మ నా బూతులు తిట్టారు. నాది త‌ప్పు ఉంటే నిల‌బెట్టి అడ‌గ‌వ‌చ్చు. కానీ మోకాళ్ల‌పై కూర్చో పెట్టి తిట్ట‌డ‌మేంటి?. కావాలంటే సీసీ ఫుటేజ్ చెక్ చేసుకోవ‌చ్చు. ఫిబ్ర‌వ‌రి 17న మ‌ధ్యాహ్నం రెండు గంట‌ల‌కు ఇంటికి వ‌చ్చేశాను. అంద‌రూ ఫోన్స్ మీద ఫోన్స్ చేస్తున్నారు. నేను లిఫ్ట్ చేయ‌లేదు. మ‌రుస‌టి రోజు ఉద‌యం విష్ణు మంచు వచ్చి క‌ల‌వ‌మ‌ని అన్నారు. నేను వెళ్ల‌లేదు. దాంతో నాపై త‌ప్పుడు కేసు పెట్టారు. త‌ర్వాత రోజు నేనే ఫోన్ చేశాను.

‘విష్ణు అన్న నీ మీద చాలా కోపంగా ఉన్నారు. నిన్ను కొట్టిస్తారంట’ అని అన్నారు. నేను న‌మ్మిన బంటులా ఉన్నందుకు న‌న్ను కొట్టిస్తారా? అలా కొట్టిస్తే మీకు ఏమొస్తుంది. మా అమ్మ‌కు ఈ విష‌యం తెలియ‌గానే మ‌ళ్లీ బ్రెయిన్ స్ట్రోక్ వ‌చ్చింది. హాస్పిట‌ల్‌లో జాయిన్ చేయించాం. ఆమెకు ఏమైనా జ‌రిగితే ఎవ‌రిది బాధ్య‌త‌. నేను జాబ్ మానేస్తే.. మ‌రొక‌రిని అపాయింట్ చేసుకోండి. నన్ను ఇబ్బంది పెట్ట‌డం ఎందుకు. నేను దొంగ‌త‌నం చేయ‌లేదు అని చెప్ప‌డానికి నా ద‌గ్గ‌ర కొన్ని ఆధారాలున్నాయి. వాటిని నేను కూడా బ‌య‌పెడ‌తాను.