ఓటీటీలోకి వ‌చ్చేసిన జెట్‌లీ.. ఈసారైనా మెప్పిస్తుందా?

టాలీవుడ్‌లో ఈ ఇయ‌ర్ స‌మ్మ‌ర్ సీజన్ ఆశించిన స్థాయిలో బాక్సాఫీస్‌ను కదిలించలేకపోయింది. భారీ అంచనాలతో వచ్చిన కొన్ని సినిమాలు ప్రేక్షకులను నిరాశపరిచిన సందర్భాలు కూడా కనిపించాయి. అలాంటి సినిమాల్లో కమెడియన్ సత్య(Satya) హీరోగా నటించిన తొలి సినిమా జెట్‌లీ(Jet Lee) కూడా ఒకటి. కామెడీ టైమింగ్‌తో ప్రత్యేక గుర్తింపు తెచ్చుకున్న సత్య, హీరోగా ఎలా మెప్పిస్తాడో చూడాలని ప్రేక్షకులు ఆసక్తిగా ఎదురుచూశారు. ముఖ్యంగా మత్తు వదలరాతో సత్యకు మంచి బ్రేక్ ఇచ్చిన డైరెక్ట‌ర్ రితేష్ రానా(Ritesh Rana) ఈ సినిమాను తెరకెక్కించడంతో మూవీపై ప్రారంభం నుంచే ఆసక్తి పెరిగింది. అయితే థియేటర్లలో విడుదలైన తర్వాత మాత్రం సినిమా అంచనాలను అందుకోలేకపోయింది.

ఇప్పుడీ సినిమా ఓటీటీ వేదికగా మరోసారి ప్రేక్షకుల ముందుకు రావడం ఆసక్తికరంగా మారింది. ప్రముఖ ఓటీటీ సంస్థ జియో హాట్‌స్టార్(Jio Hotstar) ఈ సినిమాకు సంబంధించిన డిజిటల్ హక్కులను సొంతం చేసుకుని స్ట్రీమింగ్ ప్రారంభించింది. మొదట ఈ సినిమాను ఒక్క భాషలో మాత్రమే రిలీజ్ చేయాలని ప్లాన్ చేసినప్పటికీ, తాజాగా తెలుగు తో పాటు తమిళ్, మలయాళం, కన్నడ భాషల్లో కూడా అందుబాటులోకి తీసుకురావడం గమనార్హం. థియేటర్లలో ఆశించిన రెస్పాన్స్ రాక‌పోయినా, ఓటీటీ ప్రేక్షకులు ఈ సినిమాను ఎలా స్వీకరిస్తారన్నది ఇప్పుడు ఆసక్తికర చర్చగా మారింది.

ప్రస్తుతం ఓటీటీ ప్లాట్‌ఫార్మ్‌ల ద్వారా సినిమాలకు రెండో అవకాశం లభిస్తున్న పరిస్థితుల్లో జెట్‌లీకి కూడా అదే కలిసొస్తుందేమో చూడాలి. కథలో ఉన్న వినూత్న అంశాలు, సత్య యాక్టింగ్, రితేష్ రానా స్టైల్ టేకింగ్ వంటి అంశాలు థియేటర్లలో పూర్తిస్థాయిలో కనెక్ట్ కాకపోయినా, ఇంటి వద్ద చూసే ప్రేక్షకులకు కొత్త అనుభూతిని ఇవ్వొచ్చని సినీ వర్గాలు భావిస్తున్నాయి. ఈ సినిమాకు కాల భైర‌వ(Kaala Bhairava) సంగీతం అందించగా, మైత్రీ మూవీ మేక‌ర్స్(Mythri Movie Makers) నిర్మించారు.