తనపై వస్తున్న ఆ కామెంట్స్‌పై తనదైన స్టయిల్‌లో వార్నింగ్ ఇచ్చిన బాలయ్య

ఎన్నడూ లేనిది నందమూరి బాలకృష్ణ వివాస్పద మాటాలపై గత మూడు రోజుల నుంచి పెద్ద ఎత్తున వార్తల్లో నిలుస్తున్నారు. అక్కినేని…  తొక్కినేని….. అంటూ కామెంట్స్ చేసిన బాలయ్య.. తనపై వచ్చిన నెగటివ్ కామెంట్స్‌పై స్పందించారు. హిందూపురంలో పర్యటిస్తున్న నందమూరి బాలకృష్ణ. తనపై వస్తున్న ఆ కామెంట్స్‌పై తనదైన స్టయిల్‌లో వార్నింగ్ ఇచ్చారు. “అక్కినేని నాగేశ్వరరావుని తాను బాబాయ్ అని పిలిచేవాడినని గుర్తు చేసుకున్న బాలయ్య.. తన సొంత బిడ్డల కంటే తనని ఎక్కువ ప్రేమగా పలకరించేవారని చెప్పుకొచ్చారు. తన తండ్రి ఎన్టీఆర్ నుంచి క్రమశిక్షణ నేర్చుకున్నానని వెల్లడించిన బాలయ్య.. నాగేశ్వర రావు నుంచి పొగడ్తలకి దూరంగా ఉండటాన్ని నేర్చుకున్నానని వివరించారు.” ఓవరాల్‌గా తానేంటో ప్రజలకి తెలుసని.. కొంత మంది కావాలనే ట్రోల్ చేస్తున్నట్లు ఆరోపించారు.

నందమూరి బాలకృష్ణ తాను ఎమ్మెల్యేగా ప్రాతినిథ్యం వహిస్తున్న హిందూపురానికి ఈరోజు వెళ్లారు. అక్కడ కొన్ని కార్యక్రమాల్ని నిర్వహించారు. సరస్వతీ విద్యా మందిర్‌లో తన చేతుల మీదుగా కంప్యూటర్లని పంపిణీ చేశారు. అనంతరం వైసీపీ ప్రభుత్వంపై విమర్శలు గుప్పించిన బాలయ్య.. రాయలసీమలో ఉద్యోగ అవకాశాలు లేక యువత వలస వెళ్లిపోతున్నారని చెప్పుకొచ్చారు. అలానే పరిశ్రమలు కూడా రాష్ట్రానికి రావడం లేదని విమర్శించారు. ఈ క్రమంలో తన వయసు గురించి కొందరు కామెంట్స్ చేస్తుండటంపై కూడా బాలయ్య రియాక్ట్ అయ్యారు. ‘ఎవరైనా నా వయసు 60 ఏళ్లు అంటే వాడికి దబిడి దిబిడే’ అంటూ తనదైన స్టయిల్ వార్నింగ్ ఇచ్చారు. చదువు, ఉద్యోగాల గురించి కూడా మాట్లాడిన బాలయ్య.. చదువు పూర్తయిన తర్వాతే సినిమాల్లోకి రావాలని తన తండ్రి ఎన్టీఆర్ అప్పట్లో సూచించినట్లు గుర్తు చేసుకున్నారు. ఒకవేళ సినిమాల్లో రాణించలేకపోతే.. చదువు ఉంది కాబట్టి కనీసం ఉద్యోగమైనా చేసుకోగలవు అని ఆయన చెప్పారని వెల్లడించారు.