Amma Greatness : అమ్మ గొప్పతనాన్ని ఆవిష్క‌రించే ‘అమ్మ’

అమ్మ అంటే ఆలనా, అమ్మ అంటే ఆప్యాయత, అమ్మ అంటే అనురాగం. అలాంటి అమ్మ విలువను గుర్తిస్తూ తెరకెక్కుతున్న సందేశాత్మక షార్ట్ మూవీ ‘అమ్మ’ (Amma). ఏఏఆర్ ఫిలిం మేకర్స్ సమర్పణలో, ‘నాట్యమార్గం’ సహకారంతో ఈ షార్ట్ ఫిలిం.. మ‌ద‌ర్స్ డే సంద‌ర్భంగా మే 11న‌ ప్రేక్షకుల ముందుకు రాబోతోంది.

ఈ సినిమాలో ప్రముఖ నృత్యకారిణి అభినయశ్రీ ఇంద్రాణి దవలూరి తెర‌పై ‘అమ్మ’గా లాలించ‌బోతోంది. ఇంద్రాణి దవలూరి ప్ర‌ధాన పాత్ర‌లో న‌టించిన “అందెల రవమిది” మూవీ విడుద‌ల‌కు ముందే ప‌లు ప్ర‌తిష్టాత్మ‌క‌ అవార్డులు అందుకుంది. తాజాగా ‘అమ్మ’ మూవీలోనూ ప్ర‌ధాన పాత్ర‌లో న‌టించారు. తాజాగా ఇంద్రాణి న‌టించిన ‘అమ్మ’ షార్ట్ మూవీ విడుద‌ల‌కు సిద్ధ‌మవుతున్న సంద‌ర్భంగా ఆమె మాట్లాడుతూ, “ఏమీ యాచించని నిస్వార్థ ప్రేమమూర్తి అమ్మ. అలాంటి ఓ అమ్మ కథను చూపించే సందేశాత్మక చిత్రమే మా ‘అమ్మ’ మూవీ అని అన్నారు.

ఈ షార్ట్ మూవీకి కథ, స్క్రీన్‌ప్లే, మాటలు, దర్శకత్వం అందించిన హరీష్ బన్నాయ్ మాట్లాడుతూ, “మనకి కష్టం వస్తే కన్నీరు కార్చే అమ్మకే బాధ కలిగిస్తే ఆమె పడే ఆవేదన ఎలా ఉంటుంది? కొవ్వొత్తిలా కరిగి మనకు దారి చూపించే అమ్మకు మనం ఏమిచ్చి ఋణం తీర్చుకోగలం? ఇదే మా మూవీ సబ్జెక్ట్,” అని తెలిపారు.

ఈ చిత్రంలో ఇంద్రాణి దవలూరు, సాంబి, సుధా కొండపు, రీనా బొమ్మసాని త‌దిత‌రులు న‌టించారు. సంగీతం కె.వి. భరద్వాజ్ అందించగా, సినిమాటోగ్రఫీ కార్తీక్ కళ్లూరి సమకూర్చారు.

హరీష్ బన్నాయ్ దర్శకత్వంలో రూపొందిన ఈ షార్ట్ మూవీ అమ్మ గొప్పతనాన్ని, త్యాగాన్ని తెలియజేస్తూ ప్రేక్షకుల హృదయాలను తాకనుంది. త్వరలో విడుదల కానున్న ‘అమ్మ’ చిత్రం అప్పుడే మీడియాలో హాట్ టాపిక్‌గా మారింది.