Botsa Satyanarayana: అసెంబ్లీ లో బాలయ్య ప్రవర్తన పై బొత్సా అసహనం..

రాష్ట్ర రాజకీయాల్లో బాలకృష్ణ అసెంబ్లీ లో మాట్లాడిన మాటలు మరోసారి చర్చకు దారితీసాయి . తాజాగా తెలుగుదేశం పార్టీ (TDP) ఎమ్మెల్యే నందమూరి బాలకృష్ణ (Nandamuri Balakrishna) చేసిన వ్యాఖ్యలు పెద్ద దుమారాన్నే రేపాయి. ఆయన మాటల్లో ముఖ్యంగా మాజీ ముఖ్యమంత్రి వై.ఎస్. జగన్ మోహన్ రెడ్డి (Y. S. Jagan Mohan Reddy), సినీ పరిశ్రమలో అగ్రనటుడిగా, మాజీ కేంద్ర మంత్రిగా గుర్తింపు పొందిన చిరంజీవి (Chiranjeevi) పేర్లు రావడంతో వివాదం మరింత పెరిగింది. దీనిపై వైసీపీ (YCP) సీనియర్ నాయకుడు, రాష్ట్ర మంత్రి బొత్స సత్యనారాయణ (Botsa Satyanarayana) తీవ్రమైన అసహనం వ్యక్తం చేశారు.

బాలకృష్ణ చేసిన వ్యాఖ్యలు వినడానికే సిగ్గుగా ఉన్నాయని బొత్సా వ్యాఖ్యానించారు. ఒక మాజీ ముఖ్యమంత్రిని, ప్రజల మనసుల్లో అగ్రనటుడిగా నిలిచిన వ్యక్తిని ఈ విధంగా అవమానించడం అసహ్యకరమని ఆయన ఆగ్రహం వ్యక్తం చేశారు. సభా రికార్డుల్లోనే ఈ వ్యాఖ్యలు ఉన్నందున వాటిని తప్పించుకునే అవకాశం లేదని గుర్తుచేశారు. ఆయన దృష్టిలో ఇది కేవలం మాటలకే పరిమితం కాకుండా, అసెంబ్లీ గౌరవాన్ని తగ్గించే పని అని అన్నారు.

టీడీపీ నేతల్లో పెరుగుతున్న అహంభావాన్ని బొత్స ప్రశ్నించారు. కొంత కాలం క్రితం నారా లోకేష్ (Nara Lokesh) కూడా సభలో “మమ్మల్ని ఎవరేం చేయలేరు” అన్న రీతిలో వ్యాఖ్యానించారని గుర్తు చేశారు. అదే తీరు ఇప్పుడు బాలకృష్ణలో కూడా కనిపిస్తోందని ఆయన ఎద్దేవా చేశారు. అధికారం వచ్చిందని ఇలా ప్రవర్తించడం ప్రజాస్వామ్యానికి మంచిది కాదని వ్యాఖ్యానించారు.

చిరంజీవి పేరు ప్రస్తావిస్తూ అవమానకరంగా మాట్లాడినా, జనసేన పార్టీ (Jana Sena Party) మాత్రం ఇప్పటి వరకు స్పందించలేదని బొత్స ప్రస్తావించారు. దీనిని వారి విజ్ఞతకు వదిలేస్తున్నామని స్పష్టం చేశారు. అయినా సభా సంప్రదాయాలను కాపాడుకోవడం అందరి బాధ్యత అని ఆయన అభిప్రాయపడ్డారు. ఇక స్పీకర్ (Speaker) వైఖరిపై కూడా ఆయన అసంతృప్తి వ్యక్తం చేశారు. ఇంత పెద్ద వివాదాస్పద వ్యాఖ్యలు సభలో చోటుచేసుకున్నా, స్పీకర్ స్పందించకపోవడం విచారకరమని అన్నారు. సభ గౌరవాన్ని కాపాడే వ్యక్తి మౌనం వహించడం ఆశ్చర్యంగా ఉందని వ్యాఖ్యానించారు.

మరోవైపు మండలి చైర్మన్ (Council Chairman) అంశాన్ని కూడా బొత్స లేవనెత్తారు. ఒక దళితుడు ఆ స్థానంలో ఉన్నందుకే ప్రభుత్వ పెద్దలు ఆయనను అవమానించాలనే ప్రయత్నం చేస్తున్నారని ఆరోపించారు. రాజ్యాంగం ప్రతి ఒక్కరికి సమాన హక్కులు కల్పించిందని, వాటిని గౌరవించడం అన్ని నాయకుల కర్తవ్యమని చెప్పారు. మాజీ ముఖ్యమంత్రికీ గౌరవం ఇవ్వడం లేదని, సినీ పరిశ్రమలో విశేష గుర్తింపు తెచ్చుకున్న మాజీ కేంద్ర మంత్రికీ గౌరవం ఇవ్వడం లేదని ఆవేదన వ్యక్తం చేశారు. ప్రస్తుతం బాలకృష్ణ వ్యాఖ్యలు రాష్ట్ర అసెంబ్లీలో అధికార, ప్రతిపక్షాల మధ్య కొత్త వాదోపవాదాలకు కారణమవుతున్నాయి. ఈ వ్యవహారం రాబోయే రోజుల్లో రాజకీయ చర్చలను మరింత వేడెక్కించే అవకాశముంది.