ఏపీ సీనియర్ ఐఏఎస్ కు షాక్ ఇచ్చిన ప్రభుత్వం..!

ఆంధ్రప్రదేశ్‌లో గత వైఎస్సార్ కాంగ్రెస్ పార్టీ (YSRCP) హయాంనాటి క్విడ్ ప్రో కో మరియు అధికార దుర్వినియోగం ఉదంతాలపై ప్రస్తుత కూటమి ప్రభుత్వం కఠిన చర్యలకు ఉపక్రమించింది. ఇందులో భాగంగా, గత ప్రభుత్వాల కాలంలో పరిశ్రమలు, వాణిజ్య, మరియు గనుల శాఖ కార్యదర్శిగా బాధ్యతలు నిర్వహించిన సీనియర్ ఐఏఎస్ (IAS) అధికారి బి. కృపానందంపై క్రిమినల్ విచారణ జరిపేందుకు ఆంధ్రప్రదేశ్ ప్రభుత్వం అధికారికంగా అనుమతులు మంజూరు చేస్తూ ఉత్తర్వులు జారీ చేసింది. మనీలాండరింగ్ నిరోధక చట్టం (PMLA) కింద ఎన్‌ఫోర్స్‌మెంట్ డైరెక్టరేట్ (ED) నమోదు చేసిన ఎన్‌ఫోర్స్‌మెంట్ కేస్ ఇన్ఫర్మేషన్ రిపోర్ట్ (ECIR) కేసుకు సంబంధించి ఈ కీలక నిర్ణయం తీసుకున్నారు.

ఈ విచారణ ఉత్తర్వుల ప్రకారం.. కృపానందం తన అధికారిక పదవిని దుర్వినియోగం చేస్తూ, అప్పటి ప్రభుత్వ పెద్దలతో కలిసి అక్రమాలకు పాల్పడ్డారనే బలమైన ఆరోపణలు ఉన్నాయి. ముఖ్యంగా, పులివెందుల శాసనసభ్యుడు వైఎస్ జగన్ మోహన్ రెడ్డి సహా ఇతరులతో కుమ్మక్కై, నిబంధనలకు విరుద్ధంగా మైనింగ్ లీజుల కేటాయింపులు జరిపినట్లు దర్యాప్తు సంస్థలు గుర్తించాయి. వైఎస్సార్ కుటుంబానికి చెందిన ‘భారతి సిమెంట్స్’ సంస్థకు సుమారు 2,037 ఎకరాల భారీ సున్నపురాయి గనుల లీజును కట్టబెట్టే ప్రక్రియలో, ఇతర దరఖాస్తుదారులను పక్కనబెట్టి అక్రమ లబ్ధి చేకూర్చేలా ఆయన వ్యవహరించారని కేంద్ర దర్యాప్తు సంస్థలైన సీబీఐ, ఈడీ దాఖలు చేసిన ఛార్జ్‌షీట్లలో పేర్కొన్నారు.

గతంలో గుజరాత్ అంబుజా సిమెంట్స్ లిమిటెడ్ వంటి పెద్ద కంపెనీల మైనింగ్ లీజు పునరుద్ధరణ దరఖాస్తులను ఎలాంటి సరైన కారణాలు లేకుండా తిరస్కరించి.. ఆ లీజులను జగన్ మోహన్ రెడ్డికి చెందిన సంస్థకు బదిలీ చేసేలా నాటి మంత్రిమండలి ఆమోదం కూడా లేకుండానే కృపానందం ఫైళ్లు క్లియర్ చేశారనే ఆరోపణలపై ప్రస్తుతం పూర్తి స్థాయి విచారణ జరగనుంది. ఈ కేసులో ఈడీ అటాచ్‌మెంట్లు, సెంట్రల్ మైనింగ్ నిబంధనల ఉల్లంఘనలపై ఇప్పటికే తీవ్ర చర్చ జరుగుతుండగా.. ఇప్పుడు రాష్ట్ర ప్రభుత్వం కూడా విచారణకు లైన్ క్లియర్ చేయడంతో రాబోయే రోజుల్లో పలువురు బ్యూరోక్రాట్లు, రాజకీయ నేతలకు చట్టపరమైన ఇబ్బందులు తప్పవని విశ్లేషకులు భావిస్తున్నారు.