మధ్యంతర ఎన్నికల్లో ఓటమి భయం.. ట్రంప్ నోట వీటో మాట..!

అమెరికాలో జరగనున్న మధ్యంతర ఎన్నికల్లో అధికార రిపబ్లికన్లకు ఓటమి తప్పదా…? అధ్యక్షుడు ట్రంప్ నిర్ణయాలు ఆపార్టీ కొంప ముంచనున్నాయా..? ఈ విషయం ట్రంప్ ను సైతం ఆందోళనకు గురి చేస్తోందా..? ఇటీవల ట్రంప్ నోట వస్తున్న మాటలు చూస్తుంటే.. అమెరికన్లకు అదే అనుమానం వస్తోంది. ఎందుకంటే .. ఎప్పుడు తమ ఓటమి గురించి మాట్లాడని ట్రంప్.. ఒక్కసారిగా ఎందుకిలా మాట్లాడారు.. ?

అమెరికాలో జరగనున్న మధ్యంతర ఎన్నికల్లో ఒకవేళ రిపబ్లికన్లు ఓడిపోయి, డెమొక్రాట్లు కాంగ్రెస్‌లో ఆధిక్యం సాధిస్తే తన వ్యూహం ఎలా ఉంటుందో అధ్యక్షుడు డొనాల్డ్ ట్రంప్ వెల్లడించారు. డెమొక్రాట్లు ప్రతిపాదించే చట్టాలను అడ్డుకోవడానికి తన వీటో అధికారాన్ని విరివిగా ఉపయోగిస్తానని, తద్వారా వారిని చర్చలకు వచ్చేలా చేస్తానని హెచ్చరించారు. ఫ్లోరిడాలో ప్రచార ర్యాలీకి వెళ్లే ముందు వైట్‌హౌస్ సౌత్ లాన్‌లో ఆయన విలేకరులతో మాట్లాడారు.

ఈ ఎన్నికల్లో రిపబ్లికన్లు తప్పక గెలుస్తారని ట్రంప్ ధీమా వ్యక్తం చేశారు. అయితే, ఒకవేళ డెమొక్రాట్లు గెలిచి రాజకీయ ప్రతిష్టంభన ఏర్పడితే ఏం జరుగుతుందన్న ప్రశ్నకు ఆయన బదులిస్తూ “నేను ప్రతిదాన్నీ వీటో చేస్తాను. అప్పుడు డెమొక్రాట్లే ఒప్పందం కోసం నా వద్దకు వస్తారు” అని అన్నారు. రాజకీయ ప్రతిష్టంభన వల్ల అమెరికా ఆర్థిక వ్యవస్థకు నష్టం జరుగుతుందన్న ఆందోళనలను ఆయన కొట్టిపారేశారు.

“ఒకవేళ అలాంటి పరిస్థితి వస్తే, మీరు ‘వీటో’ చూస్తారు. అప్పుడు వాళ్లే వచ్చి పని ఎలా పూర్తి చేద్దామని అడుగుతారు. అప్పుడు మీరు ఒక ఒప్పందం చేసుకుంటారు” అని తన వ్యూహాన్ని ట్రంప్ వివరించారు. విభజిత ప్రభుత్వం ఏర్పడినా తన ప్రాధాన్యతలను ముందుకు తీసుకెళ్లగలనని ఆయన సూచించారు.

మధ్యంతర ఎన్నికల్లో రిపబ్లికన్ల విజయావకాశాలను మెరుగుపరిచేందుకు తాను ముమ్మర ప్రచారం చేస్తున్నట్లు ట్రంప్ తెలిపారు. తన ర్యాలీలకు భారీగా జనం వస్తున్నారని, ఇది అయోవా వంటి రాష్ట్రాల్లో అభ్యర్థులకు సాయపడుతోందని పేర్కొన్నారు. తన ప్రచార పర్యటనల వల్ల రాజకీయంగా ఎదురుదెబ్బ తగులుతుందన్న వాదనలను ఆయన తోసిపుచ్చారు. నవంబర్ ఎన్నికల ఫలితాల తర్వాత రాజకీయ నియంత్రణలో మార్పు వస్తే, కాంగ్రెస్‌తో ట్రంప్ ఎలా వ్యవహరించబోతున్నారనేదానికి ఈ వ్యాఖ్యలు అద్దం పడుతున్నాయి.