సింగపూర్, ఆగ్నేయాసియా బీఆర్ఎస్ నేతల ఆధ్వర్యంలో త్వరలో తెలంగాణ ఆవిర్భావ వేడుకలు!

సింగపూర్ పొరుగున ఉన్న ఆగ్నేయాసియా దేశాలలో స్థిరపడిన వేలాది మంది తెలంగాణ ప్రవాసులను ఏకం చేస్తూ మలేషియా వేదికగా ‘తెలంగాణ ఆవిర్భావ దినోత్సవ’ వేడుకలను అత్యంత ప్రతిష్టాత్మకంగా నిర్వహించేందుకు భారత్ రాష్ట్రీయ సమితి (BRS) ఎన్నారై విభాగం సర్వం సిద్ధం చేసింది. గతేడాది అమెరికాలోని డల్లాస్‌లో భారీ ఎత్తున నిర్వహించిన సంబరాల విజయవంతం తర్వాత, బీఆర్ఎస్ అంతర్జాతీయ పర్యటనల తదుపరి దశను ఆగ్నేయాసియాకు విస్తరించింది. మలేషియా, సింగపూర్ పరిసర ప్రాంతాలలోని తెలుగు సమాజాన్ని పెద్ద ఎత్తున భాగస్వామ్యం చేస్తూ రీజియన్‌లోనే ఇది ఒక అతిపెద్ద కమ్యూనిటీ ఈవెంట్‌గా నిలవనుందని నిర్వాహకులు ప్రకటించారు.

వేడుకల ప్రధాన వివరాలు:

తేదీ: జూన్ 6, 2026

వేదిక: మలేషియా ఎక్స్‌టర్నల్ ట్రేడ్ డెవలప్‌మెంట్ కార్పొరేషన్ (MATRADE) కన్వెన్షన్ సెంటర్, మలేషియా.

హాజరు: సింగపూర్, మలేషియా ఇతర పొరుగు దేశాల నుండి సుమారు 2,500 నుండి 3,000 మంది ప్రతినిధులు హాజరవుతారని అంచనా.

సాంస్కృతిక కార్యక్రమాలు..
ఈ ప్రతిష్టాత్మక వేడుకలను బీఆర్ఎస్ ఎన్నారై-మలేషియా, మలేషియా తెలంగాణ అసోసియేషన్ (MYTA) సంయుక్తంగా నిర్వహిస్తున్నాయి. ఈ కార్యక్రమానికి బీఆర్ఎస్ వర్కింగ్ ప్రెసిడెంట్ కేటీ రామారావుతో పాటు పలువురు సీనియర్ పార్టీ నాయకులు ముఖ్య అతిథులుగా విచ్చేయనున్నారు. తెలంగాణ సంస్కృతి, సంప్రదాయాలు ప్రతిబింబించేలా కాకతీయ కళాతోరణం, తెలంగాణ అమరవీరుల స్మారక చిహ్నాల నమూనాలను వేదిక వద్ద ప్రత్యేకంగా ఏర్పాటు చేస్తున్నారు. వీటితో పాటు తెలంగాణ సంప్రదాయ వంటకాలతో కూడిన విందును కూడా సిద్ధం చేస్తున్నారు.

గ్లోబల్ ఔట్‌రీచ్ ప్లాన్…
ఈ సందర్భంగా బీఆర్ఎస్ ఎన్నారై గ్లోబల్ కోఆర్డినేటర్ మహేష్ బిగాల మాట్లాడుతూ.. ప్రపంచవ్యాప్తంగా వివిధ ఖండాలలో ఉన్న తెలంగాణ డయాస్పోరాను అనుసంధానించే వ్యూహంలో భాగంగా డల్లాస్ తర్వాత మలేషియాను ఎంచుకున్నట్లు తెలిపారు. మలేషియాలో దాదాపు ఐదు తరాలుగా సుదీర్ఘ తెలుగు ఉనికి ఉందని, గతంలో మాజీ సీఎం కేసీఆర్ నిర్వహించిన ప్రపంచ తెలుగు మహాసభల్లోనూ ఇక్కడి అసోసియేషన్ పెద్ద ఎత్తున పాల్గొందని గుర్తుచేశారు. మలేషియాను కేంద్రంగా చేసుకోవడం ద్వారా సింగపూర్ వంటి దేశాల్లోని ఎన్నారైలను సులభంగా రీచ్ కాగలుగుతామని ఆయన ఆశాభావం వ్యక్తం చేశారు.

పార్టీ పునర్వ్యవస్థీకరణ, సభ్యత్వ నమోదు…
ప్రస్తుతం 53 దేశాలలో బలమైన ఎన్నారై విభాగాలను కలిగి ఉన్న బీఆర్ఎస్, అంతర్జాతీయ ఉనికిని కనీసం 75 దేశాలకు విస్తరించాలని లక్ష్యంగా పెట్టుకుంది. ఇటీవల ఎన్నారై కమిటీలను రద్దు చేసిన నేపథ్యంలో, జూన్, జులై నెలల్లో ప్రపంచవ్యాప్త సభ్యత్వ నమోదు (Global Membership Drive) కార్యక్రమాన్ని చేపట్టనున్నారు. ఆ తర్వాతే సరికొత్త అంతర్జాతీయ కమిటీలను ఏర్పాటు చేస్తారు. మలేషియా సదస్సు విజయవంతం అనంతరం తదుపరి భారీ ఈవెంట్‌ను లండన్‌లో నిర్వహించనున్నారు. ఆపై ఆస్ట్రేలియా లేదా న్యూజిలాండ్, సౌత్ ఆఫ్రికా గల్ఫ్ దేశాలలో ప్రతి ఆరు నెలలకు ఒకసారి ఇలాంటి పెద్ద ఎత్తున సమ్మేళనాలు నిర్వహించి గ్లోబల్ నెట్‌వర్క్‌ను బలోపేతం చేయనున్నట్లు మహేష్ బిగాల స్పష్టం చేశారు.