సెన్సార్ మార్పుల‌కు ఒప్పుకున్న పెద్ది మేక‌ర్స్

టాలీవుడ్‌లో భారీ అంచనాల మధ్య విడుదలకు సిద్ధమవుతున్న పెద్ది(Peddi) సినిమా ఇప్పుడు చివరి దశ ప్రమోషన్స్‌లో దూసుకుపోతోంది. ఇప్పటికే ట్రైలర్‌తో సోషల్ మీడియాలో సంచలనం సృష్టించిన ఈ విలేజ్ బ్యాక్ డ్రాప్ స్పోర్ట్స్ డ్రామా తాజాగా సెన్సార్ కార్యక్రమాలను కూడా పూర్తి చేసుకుంది. జూన్ 4న గ్రాండ్ రిలీజ్‌కు రెడీ అవుతున్న ఈ సినిమాకు సెన్సార్ బోర్డు నుంచి కొన్ని చిన్న మార్పుల సూచనలు వచ్చినట్లు ఇండస్ట్రీ వర్గాల్లో చర్చ జరుగుతోంది. ముఖ్యంగా ఇప్పటికే భారీ హిట్‌గా మారిన చికిరి చికిరి(Chikiri Chikiri) సాంగ్‌లోని కొన్ని పదాలపై అభ్యంతరం వ్యక్తం చేయడంతో మేకర్స్ వెంటనే మార్పులకు అంగీకరించినట్లు సమాచారం. అలాగే సినిమాలోని కొన్ని మాస్ డైలాగ్స్‌లో ఉన్న కఠిన పదాలను మ్యూట్ చేసినట్లు తెలుస్తోంది.

ఇక ప్రమోషన్స్ విషయంలో మాత్రం మేకర్స్ ఎక్కడా రాజీ పడటం లేదు. ఈ రాత్రి భోపాల్‌లో జరగబోయే భారీ ఈవెంట్ కోసం ప్రత్యేక ఏర్పాట్లు చేసినట్లు తెలుస్తోంది. మ్యూజిక్ డైరెక్ట‌ర్ ఏఆర్ రెహమాన్(A. R. Rahman) తన టీమ్‌తో కలిసి లైవ్ పర్ఫార్మెన్స్ ఇవ్వనున్నార‌నే వార్త అభిమానుల్లో మరింత ఉత్సాహాన్ని పెంచుతోంది. ఇప్పటికే ఈ సినిమా మ్యూజిక్‌కు వచ్చిన రెస్పాన్స్‌ను దృష్టిలో పెట్టుకుని, ఈ ఈవెంట్‌ను జాతీయ స్థాయిలో వైరల్ చేయాలనే ప్లాన్‌తో నిర్మాతలు భారీగా ఖర్చు చేస్తున్నట్లు సమాచారం.

డైరెక్ట‌ర్ బుచ్చిబాబు సాన‌(Buchi Babu Sana) తెరకెక్కిస్తున్న ఈ సినిమాలో రామ్ చ‌ర‌ణ్(Ram Charan) పూర్తి గ్రామీణ నేపథ్యంలో కనిపించనుండగా, బాలీవుడ్ బ్యూటీ జాన్వీ క‌పూర్(Janhvi Kapoor) హీరోయిన్‌గా నటిస్తోంది. గ్రామీణ క్రీడల నేపథ్యంలో భావోద్వేగాలు, యాక్షన్, మాస్ ఎలిమెంట్స్ మిళితమైన ఈ సినిమా బాక్సాఫీస్ వద్ద భారీ ఓపెనింగ్స్ నమోదు చేస్తుందనే అంచనాలు ట్రేడ్ వర్గాల్లో బలంగా వినిపిస్తున్నాయి.