సూర్య‌50 కు క్రేజీ డైరెక్ట‌ర్?

తమిళ స్టార్ హీరో సూర్య‌(Suriya) ప్రస్తుతం కెరీర్‌లో అత్యంత బిజీ దశను ఆస్వాదిస్తున్నారు. ఇటీవల విడుదలైన కరుప్పు(karuppu) మంచి విజయాన్ని నమోదు చేయడంతో సూర్య మార్కెట్ మరింత బలపడిందనే అభిప్రాయాలు ఇండస్ట్రీ వర్గాల్లో వినిపిస్తున్నాయి. ఈ విజయోత్సాహం మధ్య ఆయన తదుపరి సినిమా విశ్వనాథ్ అండ్ సన్స్(Viswanath and sons) విడుదలకు సిద్ధమవుతోంది. ఆగస్టులో ప్రేక్షకుల ముందుకు రానున్న ఈ సినిమాపై ఇప్పటికే మంచి అంచనాలు నెలకొన్నాయి. మరోవైపు, డైరెక్ట‌ర్ జీతూ మాధ‌వ‌న్(Jithu Madhavan) దర్శకత్వంలో తెరకెక్కుతున్న #Suriya47 షూటింగ్‌లో సూర్య ప్రస్తుతం బిజీగా ఉన్నారు. ఈ ప్రాజెక్ట్ పూర్తైన వెంటనే ఆయన మరో క్రేజీ చిత్రమైన #Suriya48ను ప్రారంభించనున్నట్లు సమాచారం.

#Suriya48 కోసం సూర్య, డైరెక్ట‌ర్ టీజే జ్ఞాన‌వేల్(T. J. Gnanavel)తో చేతులు కలపనున్నారు. సామాజిక అంశాలతో పాటు కమర్షియల్ ఎలిమెంట్స్‌ను సమతుల్యంగా మేళవించే డైరెక్ట‌ర్‌గా జ్ఞానవేల్‌కు ప్రత్యేక గుర్తింపు ఉంది. దీంతో ఈ కాంబినేషన్‌పై అభిమానుల్లో ఆసక్తి నెలకొంది. అయితే ఈ రెండు ప్రాజెక్ట్‌ల కంటే ఎక్కువ చర్చను రేపుతున్నది సూర్య కెరీర్‌లో మైలురాయిగా నిలవనున్న 50వ సినిమా. ఈ ప్రతిష్టాత్మక ప్రాజెక్ట్‌కు సంబంధించి ప్రస్తుతం పలు ఆసక్తికరమైన ఊహాగానాలు కోలీవుడ్‌లో చక్కర్లు కొడుతున్నాయి.

ప్రత్యేకంగా డైరెక్ట‌ర్ నెల్స‌న్ దిలీప్ కుమార్(Nelson Dilipkumar) పేరు #Suriya50తో బలంగా వినిపిస్తోంది. సూర్య-నెల్సన్ కాంబినేషన్ రూపుదిద్దుకుంటే అది భారీ స్థాయి ప్రాజెక్ట్‌గా మారే అవకాశముందని సినీ వర్గాలు భావిస్తున్నాయి. అయితే నెల్సన్ ప్రస్తుతం జైల‌ర్2(Jailer2) పనుల్లో బిజీగా ఉండటంతో పాటు, ర‌జినీకాంత్(Rajinikanth) మరియు క‌మ‌ల్ హాస‌న్(Kamal Haasan) కలిసి నటించే మల్టీస్టారర్ సినిమాకు కూడా కమిట్ అయినట్లు ప్రచారం జరుగుతోంది. ఇదే సమయంలో ఎన్టీఆర్(NTR)తో ఓ భారీ యాక్షన్ డ్రామాపై కూడా డిస్క‌ష‌న్స్ సాగుతున్నాయని టాక్. ఈ నేపథ్యంలో #Suriya50కు నెల్సన్ గ్రీన్ సిగ్నల్ ఇస్తారా లేదా అన్నది ఇప్పుడు అభిమానులు ఆసక్తిగా ఎదురుచూస్తున్న ప్రశ్నగా మారింది.