US Aid: యూఎస్‌ ఎయిడ్‌ కాంట్రాక్టుల్లో 90 శాతం రద్దు!

అమెరికా అంతర్జాతీయ విదేశీ సహాయ నిధి ( యూఎస్‌ ఎయిడ్‌)కు ఇప్పటికే మంగళం పాడిన డొనాల్డ్‌ ట్రంప్‌(Donald Trump) సర్కారు, దానికి సంబంధించి ప్రపంచవ్యాప్తంగా ఏకంగా 90 శాతానికి పైగా కాంట్రాక్టుల (Contract)ను రద్దు చేస్తున్నట్లు తాజాగా ప్రకటించింది. ఈ దెబ్బతో 6,200 కాంట్రాక్టుల్లో 54 బిలియన్‌ డాలర్ల విలువైన 5,800  పై చిలుకు ఒక్కసారిగా బుట్టదాఖలయ్యాయి. యూఎస్‌ ఎయిడ్‌ కాంట్రాక్టుల మొత్తం విలువ 60 బిలియన్‌ డాలర్లని సర్కారు వెల్లడిరచింది. యూఎస్‌ ఎయిడ్‌ రద్దును సవాలు చేస్తూ పలు స్వచ్ఛంద సంస్థలు ఇప్పటికే కోర్టుల తలుపులు తట్టాయి. సదరు కాంట్రాక్టులకు సంబంధించి నిలిపేసిన బిలియన్ల  కొద్దీ డాలర్లను తక్షణం విడుదల చేయాల్సిందిగా డిస్ట్రిక్ట్‌ కోర్టు ( District Court ) జడ్జి ఒకరు తీర్పు ఇచ్చారు. కానీ దానిపై ట్రంప్‌ యంత్రాంగం సుప్రీంకోర్టు (Supreme Court) కు వెళ్లింది. దిగువ కోర్టు తీర్పుపై సుప్రీంకోర్టు  స్టే విధించింది. ప్రపంచవ్యాప్తంగా పలు దేశాల్లో వివిధ  అభివృద్ధి, సంక్షేమ కార్యక్రమాలకు దన్నుగా నిలిచే  యూఎస్‌ ఎయిడ్‌ కార్యక్రమాన్ని అమెరికా 60 ఏళ్లకు పైగా కొనసాగిస్తున్న సంగతి తెలిసిందే.