Y.S. Sharmila: కూటమి లో రైతుల సమస్యలపై షర్మిల పోరాటం..

ఇవాళ ఆంధ్రప్రదేశ్ కాంగ్రెస్ కమిటీ అధ్యక్షురాలు వైఎస్ షర్మిల (Y. S. Sharmila) రైతుల సమస్యలపై చేసిన నిరసన కార్యక్రమం విజయవాడ (Vijayawada)లో ఉద్రిక్తతకు దారి తీసింది. ఉదయం ఆంధ్రరత్న భవన్‌ నుంచి ట్రాక్టర్‌పై బయలుదేరిన ఆమె ముఖ్యమంత్రి నారా చంద్రబాబు నాయుడు (N. Chandrababu Naidu)ను కలుసుకోవాలని ప్రకటించారు. కానీ కొద్ది దూరం వెళ్ళగానే పోలీసులు అడ్డుకోవడంతో అక్కడ కాంగ్రెస్ కార్యకర్తలు, పోలీసులు ఒకరిపై ఒకరు తోపులాటకు దిగారు.

ఈ సందర్భంగా షర్మిల మాట్లాడుతూ, రాష్ట్రంలో రైతుల పరిస్థితి దారుణంగా ఉందని ఆవేదన వ్యక్తం చేశారు. కనీస మద్దతు ధర దక్కక రైతులు ఆత్మహత్యలకు పాల్పడుతున్నారని, దేశంలో రైతుల ఆత్మహత్యల విషయంలో ఆంధ్రప్రదేశ్ మూడో స్థానంలో ఉండటం ప్రభుత్వానికి అవమానకరమని అన్నారు.

వైఎస్ రాజశేఖర రెడ్డి (Y. S. Rajasekhara Reddy) హయాంలో వ్యవసాయం బలపడిందని, ఆయన తొలి నిర్ణయం ఉచిత విద్యుత్ అమలు కావడమేనని ఆమె పేర్కొన్నారు. అలాగే అప్పట్లో రైతుల రుణాలను రద్దు చేయడం ద్వారా వారికి ఊరట కల్పించారని వివరించారు. ఆ రోజుల్లో రైతు నిజమైన రారాజుగా నిలిచాడని అన్నారు.

ప్రస్తుతం రైతుల పరిస్థితి పూర్తిగా దెబ్బతిన్నదని షర్మిల ఆరోపించారు. వ్యవసాయానికి ఎటువంటి రక్షణ లేకుండా, సబ్సిడీలు కూడా తొలగించబడ్డాయని ఆమె తెలిపారు. ఎన్నికల సమయంలో చంద్రబాబు చేసిన హామీలు ఏవీ అమలుకాలేదని, రైతులకు మద్దతు ధరలు అందక మోసపోతున్నారని విమర్శించారు.

తన వాదనకు ఉదాహరణలు ఇస్తూ, షర్మిల టమాటా ధర కిలోకు రెండు రూపాయలకే పడిపోయిందని, ఉల్లికి క్వింటాలు 50 రూపాయలకే రైతులు అమ్ముకోవాల్సి వస్తోందని అన్నారు. మిర్చి పంటకు 12 వేల రూపాయలు ఇస్తామని చెప్పినా ఆరు వేలకూ దక్కలేదని పేర్కొన్నారు. జొన్నలకు కనీస మద్దతు ధర 3,300 రూపాయలు ఉన్నా, రైతులకు రెండు వేల రూపాయలు కూడా రాలేదని విమర్శించారు.

అదేవిధంగా, పొగాకు, అరటి, పత్తి, పప్పు పంటలకు కూడా గిట్టుబాటు ధరలు దొరకలేదని ఆమె ఆరోపించారు. అరటి పంటకు టన్నుకు 30 వేల రూపాయలు ఇవ్వాలని ప్రకటించిన ప్రభుత్వం 15 వేలకూ ఇవ్వలేకపోయిందని అన్నారు. పెసర, మినుములు, వేరుసెనగ వంటి పంటలకు కూడా తగిన ధరలు లభించలేదని పేర్కొన్నారు. మొత్తం మీద, రైతులు ఎదుర్కొంటున్న ఇబ్బందులను పట్టించుకోని ప్రభుత్వం వారికి భరోసా ఇవ్వలేకపోతుందన్నది షర్మిల ఆరోపణ. రైతుల సమస్యలను వెంటనే పరిష్కరించి, గిట్టుబాటు ధరలు కల్పించాలని ఆమె కఠినంగా డిమాండ్ చేశారు. దీని పై కూటమి ఎలా స్పందిస్తుందో చూడాలి.