Nara Lokesh: చంద్రబాబు, వైఎస్సార్ ప్రభావం..లోకేష్, జగన్‌ల భిన్న శైలి..

భారతీయ సంప్రదాయంలో గురువు స్థానం అత్యున్నతంగా పరిగణించబడింది. గురువును బ్రహ్మ, విష్ణు, మహేశ్వరులతో పోలుస్తారు. పిల్లలకు మొదటి గురువు తల్లే అవుతుంది. ఆమె తర్వాత తండ్రి తన అనుభవాలను పంచుతూ పిల్లల జీవితానికి మార్గదర్శకుడిగా నిలుస్తాడు. ముఖ్యంగా తండ్రి వృత్తినే కొడుకు ఎంచుకున్నప్పుడు తండ్రే నిజమైన గురువు అవుతాడు. ఈ కోణంలో చూస్తే నారా లోకేష్‌ (Nara Lokesh) కి ఆయన తండ్రి నారా చంద్రబాబు నాయుడు (Nara Chandrababu Naidu) గురువుగా నిలిచారని చెప్పవచ్చు. గురుపూర్ణిమ సందర్భంగా లోకేష్ కూడా ఈ విషయాన్ని బహిరంగంగా అంగీకరించారు.

లోకేష్ ప్రకారం తన జీవితం మొత్తంలో నాన్నే మార్గదర్శి అని స్పష్టంగా చెప్పారు. తండ్రి చూపిన దారిలోనే తాను నడుస్తున్నానని, తనకు లభించిన ప్రోత్సాహం, సహాయం అన్నీ చంద్రబాబు నుంచే వచ్చాయని అన్నారు. రాజకీయాల్లో ఆయన ఎప్పుడూ తండ్రి సలహాలను అనుసరించానని చెప్పారు. వాస్తవానికి బాహ్య ప్రపంచంలోనూ చంద్రబాబు అనేక మందికి గురువుగా నిలిచి వారిని ఉన్నత స్థాయికి చేర్చారు. అలాంటి నాయకుడు ఇంట్లోనే గురువుగా ఉండటం లోకేష్‌కి అదృష్టమని చెప్పక తప్పదు.

గత పదేళ్ల రాజకీయాలను వెనక్కి తిరిగి చూస్తే చంద్రబాబు తన వారసుడిగా లోకేష్‌ను సన్నద్ధం చేసిన తీరు స్పష్టమవుతుంది. అవసరమైన సమయంలో పదవులు ఇస్తూ, బాధ్యతలు అప్పగిస్తూ లోకేష్‌కు బలమైన రాజకీయ పునాది వేశారు. అయితే తండ్రి ఇచ్చిన అవకాశాలను సద్వినియోగం చేసుకోవడం, తన భవిష్యత్తుకు పునాదులు వేసుకోవడం లోకేష్ సమర్థత అని విశ్లేషకులు అంటున్నారు.

ఇక్కడ సహజంగానే వైఎస్సార్ (YS Rajasekhara Reddy) కుటుంబం, జగన్ మోహన్ రెడ్డి (Jagan Mohan Reddy) ప్రస్తావన వస్తుంది. ఎందుకంటే తెలుగు రాష్ట్రాల్లో ఈ రెండు కుటుంబాలే అత్యంత ప్రముఖమైనవి. 2009లో వైఎస్సార్ ముఖ్యమంత్రిగా ఉన్నప్పుడు జగన్ కడప (Kadapa) నుంచి కాంగ్రెస్ (Congress) తరఫున లోక్‌సభకు ఎన్నికై రాజకీయ జీవితాన్ని ప్రారంభించారు. ఆ సమయంలో తండ్రి చలవతోనే ఆయన రాజకీయ ప్రవేశం సులభమైంది. కానీ వైఎస్సార్ అనుకోకుండా మరణించడంతో జగన్ తక్కువ కాలంలోనే తనను తాను సర్దుబాటు చేసుకోవాల్సి వచ్చింది.

జగన్ తన తండ్రి ప్రభావాన్ని సంక్షేమ పథకాలలో ప్రతిబింబింపజేశారు. పేదల పట్ల వైఎస్సార్ చూపిన దయ, సంక్షేమ దృక్పథం జగన్ పాలనలోనూ స్పష్టంగా కనిపించింది. కానీ రాజకీయ వ్యూహాల విషయంలో మాత్రం జగన్ తనదైన శైలిని ఎంచుకున్నారు. వైఎస్సార్ అందరితో చర్చించి నిర్ణయాలు తీసుకునేవారు. జగన్ మాత్రం ఎక్కువగా స్వయంగా నిర్ణయాలు తీసుకుంటారని టాక్. వైఎస్సార్ వద్ద పట్టుదల, వెనకడుగు రెండూ ఉండేవి. కానీ జగన్ పట్టుదలకే ఎక్కువ ప్రాధాన్యం ఇస్తారని అంటారు. మొత్తం చూస్తే, లోకేష్ తన తండ్రి గురుత్వాన్ని సద్వినియోగం చేసుకుంటూ ముందుకు సాగుతుంటే, జగన్ మాత్రం తన తండ్రి వారసత్వాన్ని తీసుకొని సొంత పంథాను ఏర్పరచుకున్నాడు. అందుకే ఈ ఇద్దరి రాజకీయ శైలులు భిన్నంగా కనిపిస్తున్నాయి.