Discombulator: అమెరికా రహస్య ఆయుధం ‘డిస్కాంబోబులేటర్’…!

వెనెజువెలాపై సీక్రెట్ ఆపరేషన్‌ ను అమెరికా కొన్ని గంటల్లోలోనే సక్సెస్ ఫుల్‌గా పూర్తి చేసింది. ఒక్క బుల్లెట్ పేల్చకుండా, ఓప్రాణం తీయకుండానే… దేశాధ్యక్షుడు మదురో దంపతులను తీసుకెళ్లిపోయింది. ఇంత జరుగుతున్నా..వెనెజువెలా ఏం చేసింది..? అధ్యక్షుడ్ని కాపాడుకోలేనంత దయనీయ స్థితిలో ఆ దేశం ఉందా? నిజానికి వెనెజులా వద్ద చైనా, రష్యాకు చెందిన అత్యాధునిక ఆయుధాలున్నాయి. కానీ అమెరికా ఉపయోగించిన రహస్య ఆయుధం ముందు వెనెజులా ఎందుకు నిలవలేకపోయింది.

రహస్య ఆయుధం పేరు …డిస్కాంబోబులేటర్..

వెనెజువెలాపై రహస్య ఆయుధం ప్రయోగించామని అమెరికా అధ్యక్షుడు ట్రంప్ కొన్ని రోజుల కిందట ప్రకటించారు. తాజాగా ఆ రహస్య ఆయుధం పేరు వెల్లడించారు. దాని పేరు డిస్కాంబోబులేటర్. అమెరికా వద్ద పల్స్-ఎనర్జీ ఆయుధం ఉందనే వాదనలకు నిజం చేకూరుస్తూ, దాని పేరును ప్రకటించారు. అంతకుమించి మాట్లాడ్డానికి తనకు అధికారం లేదని కూడా ట్రంప్ చెప్పారు కూడా.

వెనెజులాలోని కరాకస్ లోకి అమెరికా సైనిక హెలికాప్టర్లు ప్రవేశించినప్పుడు ఒక్కసారిగా విద్యుత్ సరఫరా నిలిచిపోయింది. టెలీ కమ్యూనికేషన్స్ పనిచేయకుండా పోయాయి. దీనికి అమెరికా వద్ద ఉన్న ఈ రహస్య ఆయుధమే కారణమని చెబుతారు.

అంతేకాదు, వెనెజులా అధ్యక్ష భవనంలోకి ప్రవేశించినప్పుడు వందల మంది సాయుధులున్నారు. కానీ వాళ్లెవ్వరూ ఆయుధాలు ఉపయోగించలేకపోయారు. కొంతమంది కళ్లు తిరిగి పడిపోయారు. మరికొంతమందికి చెవులు, ముక్కుల నుంచి రక్తం వచ్చింది. ఇంకొంతమంది వాంతులు చేసుకున్నారు.

అలా సెక్యూరిటీ మొత్తం నిర్వీర్యం అయిన తర్వాత అమెరికా సైనికులు దర్జాగా అధ్యక్ష భవనంలోకి అడుగుపెట్టారు. ఒక్క తూటా కూడా పేలకుండా మదురోను, ఆయన భార్యను అరెస్ట్ చేసి తీసుకెళ్లిపోయారు. ఈ ఆపరేషన్ జరిగిన తర్వాత కోలుకోవడానికి వెనెజులా అధికార యంత్రాంగానికి కొన్ని గంటలు పట్టింది. అప్పటికే మదురోను దేశం దాటించి, అమెరికా సరిహద్దులకు తీసుకెళ్లాయి బలగాలు.

ప్రస్తుతం ఈ సీక్రెట్ వెపన్ పై జోరుగా చర్చ సాగుతోంది. ఇకపై దేశాలపై దాడులు చేసేటప్పుడు అమెరికా ఈ రహస్య ఆయుధాన్ని వాడుతుందని చాలామంది భావిస్తున్నారు. ఈ భయాల్ని మరింత పెంచుతూ, డ్రగ్స్ అక్రమ రవాణా చేసే వారిపై దాడులు మరింత విస్తరిస్తామని, అవసరమైతే మెక్సికో వరకు చర్యలు ఉంటాయని ట్రంప్ హెచ్చరించారు.