డేటా సెంటర్లకు 80 బిలియన్ డాలర్ల పన్ను రాయితీ..? డెమోక్రాట్ల ప్రచారంలో అసలు కథ ఇదే!!

అమెరికాలో ఎన్నికల ప్రచారం వేడెక్కుతోంది. ఇప్పటికే ఎన్నో సమస్యలతో సతమతమవుతున్న రిపబ్లికన్లను మరింత ఇబ్బందుల్లోకి నెట్టేందుకు డెమోక్రాట్లకు ఇప్పుడు మరో కొత్త అంశం దొరికింది. అదే.. డేటా సెంటర్లకు ఇచ్చినట్లు చెబుతున్న పన్ను రాయితీలు! అది కూడా చిన్న మొత్తం కాదు. 80 బిలియన్ డాలర్లు అంచే ఇండియన్ కరెన్సీలో రూ.7 లక్షల కోట్లు!

ఇంత డబ్బును AI కంపెనీలకు అమెరికా ప్రభుత్వం పన్ను రాయితీగా ఇచ్చేసిందా? ఇదే నిజమైతే చిన్న విషయం కాదు. కానీ, ఈ మొత్తం గురించి జరుగుతున్న ప్రచారంలో ఓ ఆసక్తికరమైన ట్విస్ట్ ఉంది. డెమోక్రాట్లు రిపబ్లికన్లను ఇరుకునపెట్టేందుకు ఉపయోగిస్తున్న ఈ అంకె వెనుక అసలు కథ వేరే ఉందని Washington Post వాదిస్తోంది. మరి నిజంగా ఏం జరిగింది? కంపెనీలకు భారీ ప్రయోజనం కలిగిందా? లేక సాధారణ పన్ను నిబంధననే ఎన్నికల ప్రచారంలో మరోలా చూపిస్తున్నారా?

రూ.7 లక్షల కోట్ల లెక్క ఎక్కడి నుంచి వచ్చింది?

అమెరికాలో AI రంగం ఇప్పుడు విపరీతమైన వేగంతో విస్తరిస్తోంది. ChatGPT లాంటి AI సేవలు పనిచేయాలంటే వెనుక భారీ కంప్యూటింగ్ వ్యవస్థలు ఉండాలి. వేల సంఖ్యలో సర్వర్లు, వాటిని నడిపించే పరికరాలు, వాటికి నిరంతరం విద్యుత్ అందించే వ్యవస్థలు అవసరం. వీటన్నింటినీ ఉంచే భారీ భవనాలనే మనం డేటా సెంటర్లు అంటాం. టెక్ కంపెనీలు ఇలాంటి కేంద్రాల కోసం బిలియన్ల డాలర్లు ఖర్చు చేస్తున్నాయి. ఈ సమయంలో అమెరికా ప్రభుత్వం తీసుకొచ్చిన పన్ను నిబంధనలు రాజకీయ వివాదానికి దారితీశాయి.

2025లో ట్రంప్ ప్రభుత్వం ఆమోదించిన One Big Beautiful Bill చట్టం ప్రకారం, అర్హత ఉన్న కొన్ని వ్యాపార పెట్టుబడుల ఖర్చును కంపెనీలు పన్నుల లెక్కల్లో ముందుగానే మినహాయించుకోవచ్చు. ఈ నిబంధన వల్ల డేటా సెంటర్లలో భారీగా పెట్టుబడులు పెడుతున్న కంపెనీలకు కూడా ప్రయోజనం కలుగుతుంది. ఈ ప్రయోజనాన్ని ఆధారంగా చేసుకుని డెమోక్రాట్లు రిపబ్లికన్లపై విమర్శలు చేస్తున్నారు.

కొందరు 20 బిలియన్ డాలర్లు, మరికొందరు 70 బిలియన్ డాలర్లు, ఇంకొందరు 80 బిలియన్ డాలర్ల పన్ను రాయితీలంటూ ప్రచారం చేస్తున్నారు. ఇంత పెద్ద అంకె వినగానే ప్రభుత్వం ఏకంగా ఆ డబ్బును కంపెనీలకు ఇచ్చేసిందేమో అనిపిస్తుంది. కానీ అసలు విషయం తెలుసుకోవాలంటే పన్నుల లెక్కలు ఎలా పనిచేస్తాయో కొంచెం అర్థం చేసుకోవాలి.

కంపెనీకి డబ్బు ఇచ్చినట్టేనా? అసలు ఇక్కడే ఉంది ట్విస్ట్!

ఒక కంపెనీ రూ.100 కోట్లు పెట్టి యంత్రాలు కొనుగోలు చేసిందనుకుందాం. ఆ ఖర్చును పన్నుల లెక్కల్లో ఒకేసారి మినహాయించుకునే అవకాశం లేకపోతే, కొన్ని సంవత్సరాల పాటు విడతలవారీగా మినహాయించుకోవాల్సి రావచ్చు. కానీ అర్హత ఉన్న పెట్టుబడులకు కొత్త నిబంధనల ప్రకారం ఆ ఖర్చును ముందుగానే మినహాయించుకునే అవకాశం ఉంటుంది. దీంతో ఆ ఏడాది కంపెనీ చెల్లించాల్సిన పన్ను తగ్గవచ్చు. ఆ డబ్బు కంపెనీ దగ్గరే ఉండటంతో, దాన్ని మరో పెట్టుబడికి ఉపయోగించుకోవచ్చు. అంటే కంపెనీకి నిజంగానే ఆర్థిక ప్రయోజనం కలుగుతుంది. అయితే, ప్రభుత్వం ఆ కంపెనీకి అంతే మొత్తంలో నగదు ఇచ్చినట్లు మాత్రం కాదు.

ఇక్కడ మరో ముఖ్యమైన విషయం కూడా ఉంది. ఒక కంపెనీకి ఈ ఏడాది ఎక్కువ పన్ను మినహాయింపు లభిస్తే, భవిష్యత్తులో మినహాయించుకునే ఖర్చు తగ్గవచ్చు. అందువల్ల ఈరోజు లభించిన ప్రయోజనాన్ని మొత్తం శాశ్వత పన్ను రాయితీగా లెక్కించడం సరైన పద్ధతి కాదు. అయితే, పన్ను చెల్లింపును ముందుకు జరపడం వల్ల కంపెనీకి ప్రయోజనం లేదని అనుకోవడమూ తప్పే. ఈరోజు చేతిలో ఉన్న డబ్బును పెట్టుబడులకు ఉపయోగించుకోవచ్చు కాబట్టి, సమయం మారడం కూడా ఆర్థికంగా విలువైనదే. అందుకే ఈ లెక్కలో ఎంత ప్రయోజనం నిజంగా లభించింది, ఎంత భాగం కేవలం పన్ను మినహాయింపు సమయం మారడం వల్ల వచ్చింది అన్నది విడిగా చూడాలి.

డేటా సెంటర్లకు మాత్రమే ఈ ప్రయోజనం ఇస్తున్నారా?

ఇదే Washington Post కథనంలోని ప్రధాన అంశం. ఈ పన్ను విధానం డేటా సెంటర్లకు మాత్రమే ప్రత్యేకంగా రూపొందించింది కాదు. ఇతర రంగాల్లో అర్హత ఉన్న పెట్టుబడులకు కూడా వర్తిస్తుంది. ఒక తయారీ కంపెనీ యంత్రాలు కొనుగోలు చేసినా, మరో వ్యాపార సంస్థ అర్హత ఉన్న పరికరాలపై పెట్టుబడి పెట్టినా, నిబంధనలకు అనుగుణంగా ఇదే తరహా ప్రయోజనం పొందవచ్చు. ప్రస్తుతం AI రంగం వేగంగా విస్తరిస్తూ ఉండటంతో డేటా సెంటర్లు భారీగా సర్వర్లు, కంప్యూటింగ్ పరికరాలు కొనుగోలు చేస్తున్నాయి. అందువల్ల ఈ విధానం వల్ల ఆ రంగానికి కలిగే ప్రయోజనం కూడా పెద్ద మొత్తంలో కనిపించవచ్చు.

కానీ, ఒక సాధారణ పన్ను విధానం వల్ల డేటా సెంటర్లకు ప్రయోజనం కలిగిందని చెప్పడం వేరు, ప్రభుత్వం ప్రత్యేకంగా డేటా సెంటర్ల కోసమే బిలియన్ల డాలర్ల రాయితీ ఇచ్చిందని చెప్పడం వేరు. ఈ రెండింటినీ కలిపేయడమే తప్పుదోవ పట్టించే ప్రచారమని Washington Post వాదిస్తోంది. అంటే డేటా సెంటర్లకు ఎలాంటి ప్రయోజనం కలగలేదని కాదు. ఆ ప్రయోజనాన్ని ఎలా వర్ణిస్తున్నారు, ఎలా లెక్కిస్తున్నారు అన్నదే ఇక్కడ కీలకం.

మరి టెక్ కంపెనీలు నిజంగానే భారీగా ఆదా చేస్తున్నాయా?

అవును, పన్ను మినహాయింపుల వల్ల కంపెనీలకు గణనీయమైన ప్రయోజనం కలగవచ్చు. పెద్ద టెక్ కంపెనీలు డేటా సెంటర్ల కోసం వేల కోట్ల డాలర్లు ఖర్చు చేస్తున్నప్పుడు, పన్నుల లెక్కల్లో ఖర్చులను ముందుగానే మినహాయించుకోవడం వల్ల వాటి నగదు ప్రవాహానికి పెద్ద ఊరట లభిస్తుంది. ఆ డబ్బును కొత్త సర్వర్లు కొనడానికి, మరిన్ని డేటా సెంటర్లు నిర్మించడానికి లేదా AI సేవలను విస్తరించడానికి ఉపయోగించుకోవచ్చు.

అయితే, ఈ కంపెనీలకు లభిస్తున్న ప్రయోజనాలన్నింటినీ డేటా సెంటర్లకు ప్రత్యేకంగా ఇచ్చిన రాయితీలుగా పరిగణించలేం. ఒక కంపెనీకి అనేక రకాల పన్ను ప్రయోజనాలు ఉండవచ్చు. వాటిలో ఏది ఏ చట్టం వల్ల వచ్చింది, ఎంత మొత్తం కేవలం డేటా సెంటర్ల పెట్టుబడులకు సంబంధించినది, ఎంత మొత్తం ఇతర వ్యాపార కార్యకలాపాలకు సంబంధించినది అన్నది విడిగా లెక్కించాలి. ఈ వివరాలు లేకుండా ఒక భారీ మొత్తాన్ని తీసుకుని మొత్తం డేటా సెంటర్లకు ఇచ్చిన రాయితీగా ప్రచారం చేయడం వల్ల అసలు లెక్కలు మరుగునపడే ప్రమాదం ఉంది.

అమెరికా ప్రభుత్వానికి నష్టం లేదా?

ఇక్కడే మరో ముఖ్యమైన ప్రశ్న ఎదురవుతుంది. కంపెనీలు ముందుగానే పన్ను మినహాయింపులు పొందితే ప్రభుత్వానికి తక్షణం వచ్చే పన్నుల ఆదాయం తగ్గవచ్చు. అంతేకాదు, పన్ను చట్టంలో మార్పుల వల్ల ప్రభుత్వ ఆదాయంపై దీర్ఘకాలిక ప్రభావం కూడా ఉండవచ్చు. కాబట్టి ఈ విధానం వల్ల ప్రభుత్వానికి ఎలాంటి ఖర్చూ లేదని చెప్పడం సరికాదు. అయితే, ఆ ఖర్చు ఎంత అన్నది లెక్కించేటప్పుడు కేవలం ఈ ఏడాది తగ్గిన పన్నుల ఆదాయాన్ని మాత్రమే చూడకూడదు. భవిష్యత్తులో వచ్చే పన్నుల ఆదాయాన్ని, కంపెనీల పెట్టుబడుల్లో కలిగే మార్పులను కూడా పరిగణనలోకి తీసుకోవాలి.

ఇలాంటి పన్ను విధానాలను ప్రభుత్వం ఎందుకు అమలు చేస్తుంది? కంపెనీలు పెట్టుబడులు పెట్టడానికి ప్రోత్సాహం లభిస్తుందని, కొత్త వ్యాపారాలు, ఉద్యోగాలు, సాంకేతిక అభివృద్ధి పెరుగుతాయని ప్రభుత్వాలు భావిస్తాయి. కానీ, ఆ ప్రయోజనం నిజంగా ఎంతవరకు ప్రజలకు చేరుతుంది అన్నది వేరే ప్రశ్న. పెట్టుబడులు పెరిగితేనే ఉద్యోగాలు పెరుగుతాయని హామీ లేదు. కంపెనీలు ఇప్పటికే పెట్టాలని నిర్ణయించుకున్న పెట్టుబడులకు కూడా పన్ను ప్రయోజనం లభిస్తే, ఆ మినహాయింపు వల్ల అదనంగా ఎంత పెట్టుబడి వచ్చిందో తెలుసుకోవడం ముఖ్యం.

AI కంపెనీలకు లాభం.. సామాన్యులకు ఏమిటి?

డేటా సెంటర్లు నిర్మించడానికి భారీ పెట్టుబడులు అవసరం. వాటిని నడపడానికి విద్యుత్, నీరు, భూమి, రహదారులు, ఇతర మౌలిక సదుపాయాలు కావాలి. ఒక ప్రాంతంలో పెద్ద డేటా సెంటర్ ఏర్పాటైతే ఉద్యోగాలు, స్థానిక వ్యాపారాలకు అవకాశాలు రావచ్చు. అదే సమయంలో విద్యుత్ వినియోగం పెరగడం, నీటి వనరులపై ఒత్తిడి, మౌలిక సదుపాయాల ఖర్చులు వంటి సమస్యలూ ఎదురవచ్చు. అందువల్ల కంపెనీలకు పన్ను ప్రయోజనాలు ఇవ్వడం మంచిదా కాదా అన్నది కేవలం కంపెనీలకు ఎంత ఆదా అయిందనే కోణంలో నిర్ణయించలేం.

ప్రభుత్వం ఇచ్చే పన్ను ప్రయోజనం వల్ల కొత్త పెట్టుబడులు వస్తున్నాయా? స్థానిక ప్రజలకు ఉద్యోగాలు, ఇతర ప్రయోజనాలు అందుతున్నాయా? పన్నుల రూపంలో ప్రభుత్వానికి భవిష్యత్తులో తిరిగి ఆదాయం వస్తుందా? పర్యావరణం, విద్యుత్, నీటి వనరులపై పడే భారానికి తగిన ఏర్పాట్లు చేస్తున్నారా? ఇలాంటి ప్రశ్నలకు సమాధానాలు అవసరం. ఈ అంశాలపై రిపబ్లికన్లను విమర్శించడానికి డెమోక్రాట్లకు నిజమైన కారణాలు ఉండవచ్చు. కానీ, ఒక సాధారణ పన్ను విధానాన్ని ప్రత్యేక రాయితీగా చూపించడం వల్ల ఆ చర్చలోని అసలు విషయాలు పక్కకు వెళ్లిపోవచ్చు.

మరి Washington Post చెబుతున్నదే నిజమా?

అందులో డెమోక్రాట్ల ప్రచారాన్ని విమర్శిస్తూ, డేటా సెంటర్లకు ప్రత్యేకంగా ఇచ్చిన పన్ను రాయితీలుగా ఈ మొత్తాలను చూపించడం తప్పుదారి పట్టించేదని వాదించారు. అయితే, ఈ వాదనను అర్థం చేసుకోవడం అంటే పన్ను విధానం వల్ల కంపెనీలకు లభించే ప్రయోజనాలను పూర్తిగా కొట్టిపారేయడం కాదు. పన్ను మినహాయింపులు కంపెనీలకు నిజమైన ఆర్థిక ప్రయోజనాన్ని కలిగిస్తాయి. ప్రభుత్వ ఆదాయంపైనా ప్రభావం చూపవచ్చు. కానీ, ఆ ప్రభావాన్ని ఎలా లెక్కించాలి, దానిలో ఎంత భాగం డేటా సెంటర్లకు మాత్రమే సంబంధించినది అన్నదే అసలు చర్చ.

—సూర్య ప్రకాష్ జోశ్యుల