భారీగా పెరిగిన వంటనూనెల దిగుమతులు.. ఇరాన్ యుద్ధంతో భవిష్యత్తులో సవాళ్లే?

దేశంలో వంటనూనెల (Cooking Oil) వినియోగం, దిగుమతుల లెక్కలు ఆసక్తికరంగా మారాయి. గత నెల (మార్చి) లో మన దేశ వంటనూనెల దిగుమతులు వార్షిక ప్రాతిపదికన 12 శాతం మేర భారీ వృద్ధిని నమోదు చేసి 11.73 లక్షల టన్నులకు చేరుకున్నాయి. అయితే పశ్చిమాసియాలో రాజుకున్న యుద్ధ వాతావరణం, అంతర్జాతీయంగా పెరుగుతున్న రవాణా ఖర్చుల కారణంగా రాబోయే నెలల్లో ఈ దిగుమతులు తగ్గే ప్రమాదం ఉందని ప్రముఖ పరిశ్రమల సంఘం ‘సాల్వెంట్ ఎక్స్‌ట్రాక్టర్స్ అసోసియేషన్ ఆఫ్ ఇండియా‘ (SEA) విశ్లేషించింది.

పామాయిల్ జోరు..
సమీక్షించిన నివేదిక ప్రకారం.. గతేడాది మార్చిలో 10.45 లక్షల టన్నులుగా ఉన్న ఎడిబుల్ ఆయిల్ (Cooking Oil) దిగుమతులు, ఈ ఏడాది మార్చి నాటికి 11.73 లక్షల టన్నులకు ఎగబాకాయి. ఇందుకు ప్రధానంగా ‘ముడి పామాయిల్’ (Crude Palm Oil) దిగుమతులు భారీగా పెరగడమే కారణం. ఇది గత ఏడాదితో పోలిస్తే 3.43 లక్షల టన్నుల నుంచి ఏకంగా 6.74 లక్షల టన్నులకు (దాదాపు రెట్టింపు) చేరింది. అయితే నాన్-ఎడిబుల్ (వంటకు వినియోగించని) నూనెల దిగుమతులు మాత్రం 27,742 టన్నుల నుంచి 13,401 టన్నులకు పరిమితం కావడం గమనార్హం. 2025-26 మార్కెటింగ్ సంవత్సరం (నవంబర్-అక్టోబర్) తొలి ఐదు నెలలను పరిగణనలోకి తీసుకుంటే.. మొత్తం వెజిటబుల్ నూనెల దిగుమతులు 8 శాతం పెరిగి 65.72 లక్షల టన్నులుగా నమోదయ్యాయి.

నెలవారీ క్షీణతకు కారణాలివే
వార్షిక ప్రాతిపదికన వృద్ధి కనిపించినప్పటికీ.. నెలవారీగా చూస్తే మాత్రం ఫిబ్రవరి (12.92 లక్షల టన్నులు) తో పోలిస్తే మార్చిలో (Cooking Oil) దిగుమతులు 10 శాతం మేర తగ్గాయి. దీనికి ప్రధానంగా అంతర్జాతీయ మార్కెట్లో ధరలు భగ్గుమనడం, డాలర్‌తో పోలిస్తే రూపాయి మారకం విలువ క్షీణించడమే కారణమని ఎస్‌ఈఏ పేర్కొంది. అంతేకాకుండా ప్రస్తుతం దేశీయంగా ‘ఆవాల పంట’ (Mustard Crop) ఆశాజనకంగా చేతికి వస్తుండటం వల్ల కూడా విదేశీ దిగుమతులపై కాస్త ఒత్తిడి తగ్గింది. మన అవసరాలకు సరిపడా స్థానిక పంట మార్కెట్లో అందుబాటులో ఉండటం కొంత ఊరటనిచ్చే అంశం.