Rushikonda Palace: రుషికొండపై తుది నిర్ణయానికి అడుగులు.. కీలక ప్రతిపాదనలు..

విశాఖ నగరంలోని రుషికొండ (Rushikonda)పై నిర్మించిన విలాసవంతమైన భవనాల వినియోగం ఇప్పుడు రాష్ట్ర రాజకీయాల్లో కీలక అంశంగా మారింది. ఈ భవనాలపై ఆంధ్రప్రదేశ్ ప్రభుత్వం (Andhra Pradesh Government) త్వరలో స్పష్టమైన నిర్ణయం తీసుకునే దిశగా కదులుతోందని సమాచారం. గత వైఎస్సార్‌సీపీ పాలనలో (YSR Congress Party) పర్యాటక ప్రాజెక్టుల పేరిట సుమారు రూ.450 కోట్లతో ఈ నిర్మాణాలు చేపట్టారు. అప్పట్లో ఇవి పర్యాటక అవసరాల కోసమేనని చెప్పినా, వాస్తవానికి అప్పటి ముఖ్యమంత్రి నివాసం, క్యాంపు కార్యాలయం కోసమే నిర్మించారనే విమర్శలు తీవ్రంగా వినిపించాయి.

అధికారం మారిన తర్వాత ఈ భవనాలను ఎలా వినియోగించాలన్నదానిపై ప్రభుత్వం పెద్ద ఎత్తున చర్చలు జరుపుతోంది. ముఖ్యమంత్రి నారా చంద్రబాబు నాయుడు (N. Chandrababu Naidu), ఉప ముఖ్యమంత్రి పవన్ కల్యాణ్ (Pawan Kalyan) సహా మంత్రివర్గ సభ్యులు పలుమార్లు సమావేశమై ఆలోచనలు పంచుకున్నారు. అసెంబ్లీ వేదికగా కూడా ఈ అంశం చర్చకు వచ్చినా, ఒక తుది నిర్ణయానికి రావడం మాత్రం కష్టంగా మారింది.

ఈ నేపథ్యంలో మంత్రివర్గ ఉపసంఘాన్ని ఏర్పాటు చేసి, ప్రజాభిప్రాయం సేకరించాలని ప్రభుత్వం నిర్ణయించింది. పర్యాటక శాఖ (Tourism Department) ఆదేశాల మేరకు వివిధ వర్గాల నుంచి అభిప్రాయాలు తీసుకుంది. ఒకప్పుడు రుషికొండపై ఉన్న పున్నమి రిసార్ట్స్ ప్రభుత్వానికి ఏటా కోట్ల రూపాయల ఆదాయం ఇచ్చేవని, వాటిని తొలగించి నిర్మించిన ఈ భవనాల వల్ల మాత్రం ఆదాయం లేకపోగా, నెలకు లక్షల రూపాయలు నిర్వహణ ఖర్చులుగా వెచ్చించాల్సి వస్తోందని అధికారులు చెబుతున్నారు.

ఇదే సమయంలో ప్రైవేటు రంగం నుంచి ఆసక్తికరమైన ప్రతిపాదనలు ముందుకొచ్చాయి. టాటా (Tata), ఆట్మాస్ఫియర్ కోర్ (Atmosphere Core), హెచ్సీఎల్ (HCL), హెచ్ఈఐ హోటల్స్ (HEI Hotels) వంటి సంస్థలు ఈ భవనాలను లీజుకు తీసుకోవడానికి ఆసక్తి చూపినట్లు ఉపసంఘం ప్రభుత్వానికి నివేదించింది. అంతేకాదు, కొన్ని అంతర్జాతీయ సంస్థలు కూడా ముందుకు రావడంతో ప్రభుత్వం ముందు ఎంపికలు పెరిగాయి.

గత 18 నెలలుగా స్పష్టత లేని ఈ అంశంపై ఇప్పుడు ఒక దిశ కనిపిస్తోందని అంటున్నారు. భవనాలు వృథాగా ఉండకుండా వినియోగంలోకి తేవడం, నెలనెలా వచ్చే ఖర్చును తగ్గించడం, అలాగే ప్రభుత్వానికి ఆదాయం వచ్చేలా ఒప్పందాలు రూపొందించడం లక్ష్యంగా ప్రతిపాదనలు సిద్ధం చేస్తున్నారు. ఈ నెలాఖరులో జరగనున్న కేబినెట్ సమావేశంలో ఈ అంశాన్ని చర్చించేందుకు ఉపసంఘం నిర్ణయించినట్లు తెలుస్తోంది. అంతకుముందు సీఎం తో ప్రత్యేకంగా చర్చించి తుది రూపు ఇవ్వాలని భావిస్తున్నారు.

మొత్తానికి గతంలో తీవ్ర విమర్శలకు కారణమైన రుషికొండ ప్యాలెస్ భవనాల భవితవ్యం త్వరలో తేలనుందని అంచనా. ప్రజలకు దర్శనానికి తెరవాలన్న ఆలోచన కూడా పరిశీలనలో ఉన్నా, అది ప్రభుత్వానికి భారంగా మారే అవకాశమే ఎక్కువననే అభిప్రాయం వినిపిస్తోంది. అందుకే ప్రైవేటు నిర్వహణకే ప్రభుత్వం మొగ్గుచూపుతున్నట్టు రాజకీయ వర్గాలు భావిస్తున్నాయి. ఈ నెలాఖరులో వచ్చే నిర్ణయం ఏమిటన్నది ఇప్పుడు అందరిలోనూ ఆసక్తిని రేపుతోంది.