Maha Shivaratri: శివనామస్మరణతో మారుమోగుతున్న క్షేత్రాలు.. పోటెత్తిన భక్తజనం

Maha Shivaratri: మహా శివరాత్రి పర్వదినం సందర్భంగా తెలుగు రాష్ట్రాల్లో ఆధ్యాత్మిక వెల్లువ విరిసింది. పల్లె నుంచి పట్నం దాకా ఉన్న ప్రతి శైవక్షేత్రం భక్తులతో పోటెత్తింది. వేకువజాము నుంచే భక్తులు పవిత్ర స్నానాలు ఆచరించి, ‘హర హర మహాదేవ’ అంటూ ముక్కంటిని దర్శించుకుంటున్నారు.

శ్రీశైలంలో వైభవంగా పుష్ప పల్లకి సేవ:
దక్షిణ కాశీ శ్రీశైలంలో మహాశివరాత్రి బ్రహ్మోత్సవాలు పతాక స్థాయికి చేరుకున్నాయి. ఉత్సవాల్లో భాగంగా ఆరో రోజైన శనివారం రాత్రి శ్రీ భ్రమరాంబా సమేత మల్లికార్జున స్వామివారు ‘పుష్ప పల్లకి’ పై కొలువుదీరి భక్తులకు కనువిందు చేశారు. టన్నుల కొద్దీ దేశీ, విదేశీ సుగంధ పుష్పాలతో దేదీప్యమానంగా అలంకరించిన పల్లకిపై ఆదిదంపతుల రూపం భక్తులను మంత్రముగ్ధులను చేసింది. ఈ అపురూప ఘట్టాన్ని వీక్షించేందుకు దేశం నలుమూలల నుంచి భక్తులు వేలాదిగా తరలివచ్చారు.

వేములవాడలో భక్తుల సందడి:
రాజన్న సిరిసిల్ల జిల్లా వేములవాడలో శ్రీ రాజరాజేశ్వర స్వామి వారి జాతర అత్యంత వైభవంగా జరుగుతోంది. స్వామివారికి ఎంతో ప్రీతికరమైన ‘కోడె మొక్కులు’ చెల్లించుకునేందుకు భక్తులు క్యూ లైన్లలో గంటల తరబడి వేచి ఉన్నారు. ఆలయ అర్చకులు స్వామివారికి మహాన్యాస పూర్వక రుద్రాభిషేకాలు నిర్వహిస్తున్నారు. భక్తుల రద్దీతో వేములవాడ పురవీధులన్నీ శివమయమయ్యాయి.

ఏడుపాయల, కాళేశ్వరంలో ఆధ్యాత్మిక వెల్లువ:

ఏడుపాయల: మెదక్ జిల్లాలోని ఏడుపాయల వనదుర్గ మాత క్షేత్రం భక్తులతో కిటకిటలాడుతోంది. మంజీరా నది ఏడు పాయలుగా చీలి ప్రవహించే చోట భక్తులు పుణ్యస్నానాలు ఆచరించి శివయ్యకు మొక్కులు చెల్లించుకుంటున్నారు.

కాళేశ్వరం: జయశంకర్ భూపాలపల్లి జిల్లాలోని కాళేశ్వరం ముక్తేశ్వర స్వామి ఆలయానికి తెలంగాణతో పాటు మహారాష్ట్ర, ఛత్తీస్‌గఢ్ నుంచి భక్తులు తరలివచ్చారు. గోదావరి, ప్రాణహిత నదుల సంగమ తీరంలో స్నానాలు ఆచరించి స్వామిని దర్శించుకుంటున్నారు.

జాగరణకు సిద్ధమైన భక్తకోటి:
చిన్న, పెద్ద ఆలయాలన్నీ విద్యుత్ దీపాల వెలుగులతో కళకళలాడుతున్నాయి. మహిళలు, యువతులు భక్తితో దీపాలు వెలిగించి ఉపవాస దీక్షలు చేపట్టారు. రాత్రంతా జరిగే లింగోద్భవ కాల పూజలు, జాగరణ కార్యక్రమాల కోసం ఆలయాల వద్ద నిర్వాహకులు భారీ ఏర్పాట్లు చేశారు.