హెచ్-1బీ వీసా నిబంధనలు మరింత కఠినం..?

ప్రతిభావంతుల కలల మార్గం.. అమెరికా వెళ్లాలనుకునేవారి ఆశలమార్గం.. హెచ్-1బీ వీసాకు గడ్డురోజులేనా..? ఎెందుకంటే కొద్దిరోజులుగా అమెరికాలో హెచ్-1బీ వీసాను.. అధ్యక్షుడు ట్రంప్ టార్గెట్ చేశారు. హెచ్-1బీ వీసా కొత్తదరఖాస్తు దారులకు ఏకంగా లక్షడాలర్ల ఫీజు విధించారు. దీనికి తోడు హెచ్-1బీ వీసాపై నిపుణులను నియమించేవారి డేటాను ప్రభుత్వశాఖలు పరిశీలిస్తున్నాయి. ఎవరైనా తప్పుడు మార్గం అవలంభిస్తే, వారిని శిక్షిస్తామని ఇప్పటికే అధికారులు హెచ్చరికలు సైతం జారీ చేశారు.

ఇదిలా ఉండగా…హెచ్-1బీ వీసా కార్యక్రమం భవిష్యత్తును ప్రశ్నార్థకం చేస్తూ రిపబ్లికన్ పార్టీ సభ్యులు కాంగ్రెస్‌లో ఒక కొత్త బిల్లును ప్రవేశపెట్టారు. కాంగ్రెస్‌ సభ్యుడు ఎలీ క్రేన్ బుధవారం సభలో ప్రవేశపెట్టిన ఈ బిల్లు, హెచ్-1బీ వీసా విధానంలో సమూల మార్పులను ప్రతిపాదించింది. దీని ప్రకారం, కొత్తగా హెచ్-1బీ వీసాల జారీని మూడేళ్లపాటు పూర్తిగా నిలిపివేయాలని ప్రతిపాదించారు. ఈ విరామ సమయంలో వీసా వ్యవస్థను పూర్తిస్థాయిలో ప్రక్షాళన చేయవచ్చని బిల్లు మద్దతుదారులు చెబుతుండగా, ఇది అమెరికాలోని కంపెనీలు, విద్యార్థులు, ఉద్యోగులపై తీవ్ర ప్రభావం చూపుతుందని విమర్శకులు ఆందోళన వ్యక్తం చేస్తున్నారు.

బిల్లులోని కీలక ప్రతిపాదనలు :

“ఎండ్ హెచ్-1బీ వీసా అబ్యూస్ యాక్ట్ ఆఫ్ 2026” పేరుతో ప్రవేశపెట్టిన ఈ బిల్లులో అత్యంత కఠినమైన నిబంధనలు ఉన్నాయి. ఈ బిల్లు చట్టంగా మారితే, 1952 నాటి ఇమిగ్రేషన్ అండ్ నేషనాలిటీ చట్టాన్ని సవరించాల్సి ఉంటుంది.

మూడేళ్ల విరామం:

కొత్తగా హెచ్-1బీ వీసాల జారీని మూడేళ్ల పాటు నిలిపివేస్తారు. ఈ కాలంలో ఇప్పటికే వీసాపై ఉన్నవారు క్రమంగా దేశం విడిచి వెళ్లాల్సి ఉంటుంది.

వీసాల కోటా తగ్గింపు: ప్రస్తుతం ఏటా 65,000 వీసాలు జారీ చేస్తుండగా, ఆ సంఖ్యను 25,000కు పరిమితం చేయాలి. ప్రస్తుతం ఉన్న మినహాయింపులను కూడా తొలగించాలి.

కనీస వేతనం:

హెచ్-1బీ ఉద్యోగికి కనీస వార్షిక వేతనం 2 లక్షల డాలర్లు (సుమారు రూ. 1.66 కోట్లు) ఉండాలి.

లాటరీ రద్దు:

ప్రస్తుత లాటరీ విధానాన్ని రద్దు చేసి, అత్యధిక వేతనం ఉన్న‌ వారికి ప్రాధాన్యత ఇచ్చే విధానాన్ని తీసుకురావాలి.

నిషేధాలు:

హెచ్-1బీ వీసాదారుల జీవిత భాగస్వాములు, పిల్లలకు ఇచ్చే డిపెండెంట్ వీసాలను నిషేధించాలి. అలాగే, వీసాదారులు శాశ్వత నివాసం (గ్రీన్ కార్డ్) కోసం దరఖాస్తు చేసుకోకుండా నిరోధించాలి. ఆప్షనల్ ప్రాక్టికల్ ట్రైనింగ్ (OPT) కార్యక్రమాన్ని కూడా రద్దు చేయాలి.

అమెరికన్లకే తొలి ప్రాధాన్యత:

ఈ బిల్లును ప్రవేశపెట్టిన ఎలీ క్రేన్ మాట్లాడుతూ.. “విదేశీయులకు బదులు అమెరికన్లకే ఉద్యోగాల్లో తొలి ప్రాధాన్యత ఇవ్వాలి. ప్రస్తుత హెచ్-1బీ విధానం అమెరికన్ల ఉద్యోగ అవకాశాలను దెబ్బతీస్తోంది. మా ప్రభుత్వం భారీ కార్పొరేషన్ల లాభాల కోసం కాకుండా కష్టపడి పనిచేసే పౌరుల కోసం పనిచేయాలి” అని వ్యాఖ్యానించారు. ఇతర రిపబ్లికన్ సభ్యులు కూడా చౌకగా లభించే విదేశీ కార్మికులతో అమెరికన్లను భర్తీ చేస్తున్నారని, ఈ మోసాన్ని అరికట్టాలంటూ ఇదే విధమైన అభిప్రాయాలు వ్యక్తం చేశారు.

ప్రస్తుతానికి ఈ బిల్లు కేవలం సభలో ప్రవేశపెట్టబడింది. ఇది చట్టంగా మారాలంటే కాంగ్రెస్ ఉభయ సభల ఆమోదం పొంది, అధ్యక్షుడు సంతకం చేయాల్సి ఉంటుంది. ఈ ప్రక్రియకు చాలా సమయం పట్టే అవకాశం ఉంది.