రాజ‌మౌళి సినిమాకు వాట‌ర్ షాక్

సూపర్ స్టార్ మహేష్ బాబు(mahesh babu)- దర్శకధీరుడు రాజ‌మౌళి(rajamouli) కాంబినేషన్‌లో తెరకెక్కుతున్న భారీ ప్రాజెక్ట్ వారణాసి షూటింగ్‌కు అనూహ్యమైన అడ్డంకి ఎదురైన‌ట్టు తెలుస్తోంది. సినిమాలో కీలకమైన అండర్‌వాటర్ యాక్షన్ సీక్వెన్స్ కోసం సుమారు 15 లక్షల లీటర్ల నీటిని, అంటే దాదాపు 150 ట్యాంకర్ల నీటిని వినియోగించేందుకు చిత్ర యూనిట్ అనుమతి కోరింది. అయితే ప్రస్తుతం నగరంలో నెలకొన్న తీవ్ర నీటి కొరత పరిస్థితుల దృష్ట్యా అధికారులు ఈ అభ్యర్థనను తిరస్కరించినట్లు సమాచారం. ప్రజల ప్రాథమిక అవసరాలే ముందుగా తీర్చాల్సిన బాధ్యత తమదని అధికారులు స్పష్టం చేసినట్లు తెలుస్తోంది.

ఇప్పటికే ఎండల తీవ్రత పెరిగి నగరంలో తాగునీటి సమస్య మరింత ఉధృతమవుతున్న నేపథ్యంలో, ఇలాంటి భారీ నీటి వినియోగానికి అనుమతి ఇవ్వడం సాధ్యం కాదని అధికారులు పేర్కొన్నట్లు టాక్ వినిపిస్తోంది. దీంతో వారణాసి టీమ్ ప్లాన్ చేసిన షూటింగ్ షెడ్యూల్‌పై ప్రభావం పడే అవకాశాలు కనిపిస్తున్నాయి. ముఖ్యంగా ఈ అండర్‌వాటర్ సీక్వెన్స్ సినిమాకు హైలైట్‌గా భావిస్తున్న నేపథ్యంలో, ఈ మార్పు మేకర్స్‌కు సవాల్‌గా మారింది.

ఇప్పుడీ పరిస్థితిలో మేక‌ర్స్ ప్రత్యామ్నాయ మార్గాలపై దృష్టి సారించినట్లు సమాచారం. ఇతర ప్రాంతాల్లో షూటింగ్ నిర్వహించడం లేదా సెట్స్‌లో టెక్నాలజీ సహాయంతో సీన్ రూపొందించడం వంటి ఆప్షన్లు పరిశీలిస్తున్నట్లు తెలుస్తోంది. భారీ బడ్జెట్‌తో తెరకెక్కుతున్న ఈ సినిమాకు ఇలాంటి అనుకోని అడ్డంకులు ఎదురైనా, క్వాలిటీ విషయంలో రాజీ పడకుండా ముందుకు వెళ్లాలన్నదే మేకర్స్ లక్ష్యంగా కనిపిస్తోంది. దీంతో వారణాసి షూటింగ్‌కు సంబంధించిన తదుపరి అప్‌డేట్స్‌పై సినీ వర్గాల్లో ఆసక్తి నెలకొంది.