పడయప్ప2 పై రజనీ ఫైనల్ డెసిషన్ ఇదేనా?

రజనీకాంత్(Rajinikanth) ప్రస్తుతం వరుస సినిమాలతో బిజీగా ఉన్నా, ఆయన కెరీర్‌కు సంబంధించిన మరో ఆసక్తికరమైన చర్చ కోలీవుడ్‌లో హాట్ టాపిక్‌గా మారింది. ఇటీవల జైలర్2(Jailer2)లో తన పార్ట్ షూటింగ్ ను పూర్తి చేసిన సూపర్ స్టార్, ప్రస్తుతం అశ్వత్ మారిముత్తు(Ashwath Marimuthu) దర్శకత్వంలో తెరకెక్కుతున్న ధర్మన్(Dharman) షూటింగ్‌లో పాల్గొంటున్నారు. ఇదే సమయంలో కమల్ హాసన్‌(Kamal Haasan)తో కలిసి నెల్సన్ దిలీప్‌కుమార్(Nelson Dileep Kumar) రూపొందించనున్న భారీ మల్టీస్టారర్ కూడా లైన్లో ఉంది. ఈ ప్రాజెక్టుల తర్వాత రజనీ రిటైర్మెంట్ ప్రకటిస్తారనే ప్రచారం జరిగినప్పటికీ, తాజా సమాచారం ప్రకారం ఆయనకు అలాంటి ఆలోచన లేదని తెలుస్తోంది. కొత్త కథలను వింటూనే, స్పెష‌ల్ ప్రాజెక్టులపై కూడా దృష్టి పెడుతున్నట్లు ఇండస్ట్రీ వర్గాలు చెబుతున్నాయి.

ఈ నేపథ్యంలో రజనీకాంత్ కెరీర్‌లో అత్యంత గుర్తింపు పొందిన సినిమాల్లో ఒకటైన పడయప్ప(Padayappa)కు సీక్వెల్ తీసుకొచ్చే అవకాశంపై కూడా చర్చ జరిగినట్లు సమాచారం. డైరెక్ట‌ర్ కె.ఎస్. రవికుమార్‌(KS Ravikumar)తో కలిసి ఈ అంశంపై ప్రాథమిక స్థాయిలో స్టోరీ డిస్క‌ష‌న్స్ జరిగినప్పటికీ, రూపొందిన కథ పూర్తి స్థాయిలో సంతృప్తి కలిగించలేదని టాక్ వినిపిస్తోంది. క్లాసిక్‌గా నిలిచిన సినిమాకు సీక్వెల్ అంటే ప్రేక్షకుల అంచనాలు మరింత ఎక్కువగా ఉంటాయని భావించిన రజనీ, స్ట్రాంగ్ స్టోరీ లేకుండా ముందుకు వెళ్లకూడదనే నిర్ణయానికి వచ్చినట్లు తెలుస్తోంది. దీంతో ప్రస్తుతం ఈ ప్రాజెక్టును తాత్కాలికంగా పక్కన పెట్టినట్లు ప్రచారం సాగుతోంది.

ఈ వార్త సోషల్ మీడియాలో కూడా విస్తృత చర్చకు దారితీసింది. పడయప్పలాంటి చిరస్మరణీయ సినిమాను అలాగే వదిలేయడం మంచిదని అభిమానుల్లో చాలామంది అభిప్రాయపడుతున్నారు. క్లాసిక్ సినిమాలకు సీక్వెల్స్ ఎప్పుడూ అదే స్థాయి ప్రభావం చూపించలేవని, ఇటీవల కొన్ని సీక్వెల్స్ ఎదుర్కొన్న ఫలితాలను ఉదాహరణగా చూపిస్తూ కామెంట్లు చేస్తున్నారు. అయితే ఈ ప్రాజెక్టుపై ఇప్పటివరకు ఎలాంటి అధికారిక ప్రకటన రాలేదు. భవిష్యత్తులో మరింత బలమైన కథ సిద్ధమైతే పడయప్ప2(Padayappa2) మళ్లీ చర్చలోకి వస్తుందా లేదా అనే ఆసక్తి మాత్రం అభిమానుల్లో కొనసాగుతోంది.