హైడ్రాపై హైకోర్టు ధిక్కరణ ఆరోపణలు.. కేంద్ర హోం శాఖకు చేరిన ఫిర్యాదు

HYDRAA: తెలంగాణలో సంచలనం సృష్టిస్తున్న ‘హైడ్రా’ (HYDRAA) కార్యకలాపాలు ఇప్పుడు వివాదాస్పదంగా మారాయి. హైకోర్టు ఇచ్చిన మధ్యంతర ఉత్తర్వులను బేఖాతరు చేస్తూ హైడ్రా ముందుకు వెళ్తోందని బాధితులు ఆందోళన వ్యక్తం చేస్తున్నారు. ముఖ్యంగా రంగారెడ్డి జిల్లా శేరిలింగంపల్లి మండలంలోని సీయోట్ మారుతీ హిల్స్ కాలనీలో కోర్టు ఆదేశాలకు విరుద్ధంగా తవ్వకాలు జరుపుతున్నారని కాలనీ రెసిడెంట్ వెల్ఫేర్ అసోసియేషన్ ఆరోపించింది.

కోర్టు ఆదేశాల ఉల్లంఘన..
బషీర్‌బాగ్‌లో జరిగిన సమావేశంలో అసోసియేషన్ ప్రతినిధులు మాట్లాడుతూ.. 1990-92 మధ్య ప్రైవేటు పట్టా భూములను కొనుగోలు చేసి, అన్ని అనుమతులతో కాలనీని అభివృద్ధి చేశామని తెలిపారు. అయితే, 2016లో ఎఫ్‌టీఎల్ (FTL) పరిధిని తప్పుగా చూపడం వల్ల 86 మంది ప్లాట్ యజమానులు తీవ్రంగా నష్టపోతున్నారని వివరించారు. ఈ విషయంలో జనవరి 5న హైకోర్టు ఎటువంటి తవ్వకాలు చేపట్టవద్దని మధ్యంతర ఉత్తర్వులు ఇచ్చినప్పటికీ, హైడ్రా వాటిని లెక్కచేయకుండా పనులు కొనసాగిస్తోందని వారు పేర్కొన్నారు.

కమిషనర్‌పై కేంద్ర హోం శాఖకు ఫిర్యాదు..
మరోవైపు, హైడ్రా కమిషనర్ రంగనాథ్‌పై కేంద్ర హోం శాఖకు ఫిర్యాదు అందింది. సివిల్ సర్వీస్ నిబంధనలు-1968ని కమిషనర్ ఉల్లంఘించారని బీఆర్ఎస్ నేత ఎడ్ల సుధాకర్ రెడ్డి కేంద్ర హోం శాఖ అదనపు కార్యదర్శి రాకేశ్‌కుమార్ సింగ్‌కు ఫిర్యాదు చేశారు. అంబర్‌పేట మండలం సర్వే నంబర్ 563/1లోని బతుకమ్మకుంట భూవివాదం కోర్టు విచారణలో ఉండగా, ఆ అంశాలపై మీడియా ముందు తప్పుడు కథనాలు ప్రచారం చేస్తూ తన ప్రతిష్టను దెబ్బతీస్తున్నారని ఆయన ఫిర్యాదులో పేర్కొన్నారు. కోర్టు పరిధిలో ఉన్న అంశాలను బహిరంగంగా చర్చించడం నిబంధనలకు విరుద్ధమని ఆయన విమర్శించారు. బాధితులకు న్యాయం చేయాలని , కోర్టు తీర్పులను గౌరవించాలని పలువురు డిమాండ్ చేస్తున్నారు.