భారత్‌లో పెట్టుబడులకు ఇదే సరైన సమయం.. ఇన్వెస్టర్లకు గోయల్ పిలుపు

భారతదేశంలో పెట్టుబడులు పెట్టడానికి ఇదే అత్యంత అనువైన సమయమని కేంద్ర వాణిజ్య, పరిశ్రమల శాఖ మంత్రి పీయూష్ గోయల్ (Piyush Goyal) స్పష్టం చేశారు. ఫ్రాన్స్‌లో జరిగిన ‘భారత్ ఇన్నోవేట్స్ 2026’ కార్యక్రమంలో పాల్గొన్న ఆయన.. దేశీయ కార్పొరేట్ సంస్థలు, వెంచర్ క్యాపిటల్ (VC) ఫండ్‌లు, ఇన్వెస్టర్లను ఉద్దేశించి కీలక వ్యాఖ్యలు చేశారు. దేశంలోని స్టార్టప్‌లు, కొత్త ఆవిష్కరణల్లో పెట్టుబడులు పెట్టడాన్ని ఇక ఏమాత్రం ఆలస్యం చేయవద్దని పిలుపునిచ్చారు.

స్టార్టప్ ఎకోసిస్టమ్ రెడీ: భారత స్టార్టప్ వ్యవస్థ ఇప్పుడు ఒక సరికొత్త దశకు చేరుకుందని మంత్రి (Piyush Goyal) పేర్కొన్నారు. పెట్టుబడులకు అనుకూలమైన విధానాలు, విస్తృతమైన మార్కెట్ అవకాశాలు, ప్రభుత్వ మద్దతు వ్యవస్థలు ఇప్పుడు పూర్తిగా సిద్ధంగా ఉన్నాయని తెలిపారు.

టెస్టింగ్ గ్రౌండ్‌గా భారత్: తయారీ (Manufacturing) రంగ సంస్థలు స్టార్టప్‌లతో భాగస్వామ్యాలను పెంచుకోవాలని సూచించారు. తద్వారా భారతదేశాన్ని సరికొత్త ఉత్పత్తులు, ఆధునిక సాంకేతికతలకు ఒక అద్భుతమైన ‘పరీక్షా వేదిక’గా మార్చాలన్నారు.

డీప్‌టెక్‌కు రూ. 10,000 కోట్ల దన్ను: స్టార్టప్‌లకు అండగా నిలిచేందుకు ప్రభుత్వం తీసుకువచ్చిన రూ. 10,000 కోట్ల ‘ఫండ్ ఆఫ్ ఫండ్స్’ (Fund of Funds) రెండో విడతలో అత్యధిక భాగాన్ని డీప్‌టెక్ సంస్థలు, కొత్త ఆవిష్కర్తల కోసమే ప్రత్యేకంగా కేటాయించనున్నట్లు ఆయన (Piyush Goyal) ఒక కీలక ప్రకటన చేశారు.

సమిష్టి కృషితో వేగంగా ఫలితాలు: దేశంలోని విశ్వవిద్యాలయాలు, పరిశోధనా సంస్థలు, పరిశ్రమలు కలిసికట్టుగా పనిచేస్తే.. ఒక కొత్త ఆవిష్కరణను మార్కెట్‌లోకి తీసుకురావడానికి పట్టే సమయం భారీగా తగ్గుతుందని ఆయన అభిప్రాయపడ్డారు.

సొంతగూటికి టెక్ నిపుణులు, స్టార్టప్‌లు
ప్రపంచంలోనే అతిపెద్ద వినియోగదారుల మార్కెట్లలో ఒకటైన భారత్‌లో కొత్త బిజినెస్ మోడల్స్‌కు అపారమైన అవకాశాలు ఉన్నాయని, పెట్టుబడిదారులను మార్కెట్‌తో అనుసంధానించడంలో ప్రభుత్వం పూర్తి సహకారం అందిస్తుందని మంత్రి భరోసా ఇచ్చారు. అలాగే, భారత్ ఇటీవల వివిధ దేశాలతో కుదుర్చుకున్న స్వేచ్ఛా వాణిజ్య ఒప్పందాల (FTA) ప్రయోజనాలను దేశీయ పరిశ్రమలు పూర్తిగా సద్వినియోగం చేసుకోవాలని కోరారు. ముఖ్యంగా, విదేశాల్లో స్థిరపడి కార్యకలాపాలు నిర్వహిస్తున్న భారతీయ స్టార్టప్‌లు, పరిశోధకులు, టెక్ ప్రొఫెషనల్స్‌ను తిరిగి సొంతగూటికి (భారత్‌కు) రప్పించే మార్గాలపై ప్రభుత్వం కసరత్తు చేస్తోందని, దీనిపై పరిశ్రమ నిపుణుల సూచనలను కోరుతున్నట్లు ఆయన (Piyush Goyal) వెల్లడించారు.