ఆంత్రోపిక్‌తో చేతులు కలిపిన విప్రో.. ‘సెంటర్ ఆఫ్ ఎక్సలెన్స్’ ఏర్పాటు!

దేశీయ ఐటీ సేవల దిగ్గజం ‘విప్రో’ (Wipro) ఆర్టిఫిషియల్ ఇంటెలిజెన్స్ (AI) రంగంలో తన వ్యాపార వ్యూహాన్ని మరింత ముమ్మరం చేసింది. ప్రపంచ ప్రసిద్ధ ఏఐ పరిశోధనా సంస్థ ‘ఆంత్రోపిక్’ (Anthropic) భాగస్వామ్యంతో, ఆ సంస్థకు చెందిన ‘క్లాడ్ ఏఐ మోడల్స్’ కోసం ప్రత్యేకంగా ఒక ‘అప్లైడ్ ఏఐ సెంటర్ ఆఫ్ ఎక్సలెన్స్’ (CoE) ను ప్రారంభించింది. బెంగళూరులోని విప్రో ఇన్నోవేషన్ హబ్‌లో ఏర్పాటైన ఈ సెంటర్.. కంపెనీ కొత్తగా ప్రారంభించిన ‘ఏఐ-నేటివ్ బిజినెస్ అండ్ ప్లాట్‌ఫామ్స్’ యూనిట్‌లో ఒక కీలక భాగంగా సేవలందించనుంది.

కీలక రంగాల్లో ఏఐ ఆవిష్కరణలు
ఈ సరికొత్త సెంటర్ ఆఫ్ ఎక్సలెన్స్ ద్వారా వివిధ గ్లోబల్ పరిశ్రమల్లో ఏఐ ఆధారిత ఉత్పత్తులు, సేవల అభివృద్ధిని వేగవంతం చేయాలని విప్రో (Wipro) లక్ష్యంగా పెట్టుకుంది. బ్యాంకింగ్, ఆరోగ్య సంరక్షణ (Healthcare), విమానయాన, తయారీ (Manufacturing), వినియోగదారుల (Retail) రంగాలపై ఈ సెంటర్ ప్రధానంగా దృష్టి సారిస్తుంది. విప్రో ఇప్పటికే తన అంతర్గత ఫైనాన్స్, హెచ్ఆర్, సేల్స్ విభాగాల్లో క్లాడ్ ఏఐ మోడల్స్‌ను విజయవంతంగా వాడుతోంది. ఇప్పుడు ఇదే సాంకేతికతను తమ అంతర్జాతీయ క్లయింట్ల దైనందిన వ్యాపార ప్రక్రియల్లో కూడా విస్తృతంగా అమలు చేయాలని యోచిస్తోంది.

ప్రత్యేక ఇంజినీర్ల బృందం
ఏఐ సేవలను క్లయింట్లకు మరింత వేగంగా చేరువచేసేందుకు విప్రో (Wipro) ఒక భారీ మానవ వనరుల ప్రణాళికను సిద్ధం చేసింది. రాబోయే 18 నెలల కాలంలో తమ సంస్థకు చెందిన 10,000 మంది ఫ్రంట్‌లైన్ ఐటీ ప్రొఫెషనల్స్‌కు క్లాడ్ ఏఐ మోడల్స్‌పై ప్రత్యేక శిక్షణ ఇవ్వడంతో పాటు సర్టిఫికేషన్ కూడా అందించనుంది. ప్రపంచవ్యాప్తంగా ఉన్న తమ క్లయింట్ల కోసం ‘ఫార్వర్డ్ డిప్లాయిడ్ ఇంజినీర్లు’ (Forward Deployed Engineers) అనే ప్రత్యేక ఏఐ నిపుణుల బృందాన్ని విప్రో రంగంలోకి దించుతోంది. ఈ ఇంజినీర్లు నేరుగా క్లయింట్ల ఆఫీసుల్లోనే ఉంటూ, వారి వ్యాపార కార్యకలాపాల్లో ఏఐ సాంకేతికతను వేగంగా ఇంటిగ్రేట్ చేయడంలో సహాయపడతారు.

బిజినెస్ ఆటోమేషన్ వైపు విప్రో
“ఆర్టిఫిషియల్ ఇంటెలిజెన్స్‌ను కేవలం ల్యాబ్స్ లో జరిగే ప్రయోగాత్మక టెక్నాలజీగా కాకుండా.. క్లయింట్లకు ప్రత్యక్ష వ్యాపార ఫలితాలను, లాభాలను అందించే ఒక శక్తివంతమైన సాధనంగా మార్చడమే మా ప్రధాన లక్ష్యం” అని విప్రో (Wipro) సీఈఓ శ్రీని పల్లియా స్పష్టం చేశారు. ప్రస్తుత డిజిటల్ మార్కెట్లో ఏఐ ఆధారిత కన్సల్టింగ్ సేవలకు డిమాండ్ పెరుగుతున్న నేపథ్యంలో.. ఈ సరికొత్త వ్యూహంతో కంపెనీని మరింత అభివృద్ధి చేయాలని యాజమాన్యం పట్టుదలతో ఉంది.