సీఎం పీఠంపై విజయ్.. ఏకగ్రీవంగా మద్దతు తెలిపిన కాంగ్రెస్!

తమిళనాడు (Tamil Nadu) రాజకీయాలు క్షణక్షణానికీ అనూహ్య మలుపులు తిరుగుతున్నాయి. అసెంబ్లీ ఎన్నికల ఫలితాల్లో ద్రవిడ పార్టీల ఆధిపత్యానికి గండికొట్టి, ఏకంగా 108 స్థానాలను కైవసం చేసుకున్న దళపతి విజయ్ (Thalapathy Vijay) నేతృత్వంలోని ‘తమిళగ వెట్రి కజగం’ (TVK) పార్టీ.. ఇప్పుడు అధికార పీఠాన్ని అధిరోహించడానికి పూర్తిగా మార్గం సుగమమైంది. మ్యాజిక్ ఫిగర్‌కు అవసరమైన అదనపు స్థానాల కోసం టీవీకే ఎదురుచూస్తున్న వేళ, జాతీయ పార్టీ కాంగ్రెస్ (Congress) ఊహించిన విధంగానే దళపతికి బాసటగా నిలిచింది. రాష్ట్రంలో టీవీకే నేతృత్వంలో ప్రభుత్వం ఏర్పాటు కావడానికి తమ సంపూర్ణ మద్దతు ఇస్తున్నట్లు కాంగ్రెస్ పార్టీ అధికారికంగా ప్రకటించి, రాజకీయ వర్గాల్లో పెను సంచలనం సృష్టించింది.

1. ఇవి కూడా చదవండి

   • తమిళనాడులో కొత్త పొత్తు? సీఎం విజయ్ తో జట్టు కట్టనున్న వైకో?
   • ఇక సమాజ్ వాదీ వంతు.. ఆ పార్టీలో చీలిక వస్తే… రాజకీయాలు ఎలా మారతాయి?

ప్రజలు మార్పు కోరుకున్నారు: కార్తీ చిదంబరం
ఈ చారిత్రక పరిణామంపై కాంగ్రెస్ (Congress) ఎంపీ కార్తీ చిదంబరం (Karti Chidambaram) బుధవారం కీలక వ్యాఖ్యలు చేశారు. “తమిళనాడు ప్రజలు దశాబ్దాల ద్రవిడ రాజకీయాలతో విసిగిపోయి, రాష్ట్రంలో స్పష్టమైన మార్పును కోరుకున్నారు. వారి ఆకాంక్షలకు అనుగుణంగానే ఈ నిర్ణయం తీసుకున్నాం. టీవీకే సింగిల్ లార్జెస్ట్ పార్టీగా 108 స్థానాలు గెలుచుకుంది. తమిళ ప్రజలు విజయ్ నాయకత్వంలోనే ప్రభుత్వాన్ని బలంగా కోరుకుంటున్నారు. మెజార్టీకి (118 స్థానాలు) అవసరమైన మద్దతు కోసం టీవీకే అధికారికంగా మమ్మల్ని సంప్రదించింది. దీనిపై కాంగ్రెస్ పార్టీలోని అన్ని వేదికల్లో, అగ్రనేతలతో సుదీర్ఘంగా చర్చించిన తర్వాత.. టీవీకేకు ఏకగ్రీవంగా మద్దతు ఇవ్వాలని తీర్మానించాం” అని ఆయన వివరించారు.

లౌకిక ప్రభుత్వ ఏర్పాటుకే ప్రాధాన్యత
రాష్ట్రంలో బీజేపీ మద్దతుతో కూడిన ప్రభుత్వం ఏర్పడకుండా అడ్డుకోవడమే తమ ప్రధాన లక్ష్యమని కాంగ్రెస్ (Congress) స్పష్టం చేసింది. “ప్రజలు కేవలం మార్పునే కాదు, అన్ని వర్గాలను సమానంగా చూసే లౌకిక ప్రభుత్వాన్ని కోరుకుంటున్నారు. అందుకే తమిళనాడులో ఒక స్థిరమైన, బలమైన లౌకిక ప్రభుత్వం ఏర్పడటానికి మేము పూర్తి సహాయసహకారాలు అందిస్తున్నాము” అని కార్తీ చిదంబరం స్పష్టం చేశారు.

లేఖ రాసిన విజయ్.. అధిష్టానం ఓకే!
కాంగ్రెస్ (Congress) రాష్ట్ర వ్యవహారాల ఇన్‌చార్జి గిరీష్ చోడంకర్ కూడా ఈ పొత్తుపై అధికారికంగా స్పష్టతనిచ్చారు. మద్దతు కోరుతూ టీవీకే స్వయంగా తమ పార్టీ జాతీయ అధ్యక్షుడు మల్లికార్జున ఖర్గేకు (Mallikarjun Kharge) లేఖ రాసిందని ఆయన వెల్లడించారు. ఈ లేఖపై మంగళవారం సాయంత్రం ఢిల్లీలోని కాంగ్రెస్ హైకమాండ్ సుదీర్ఘంగా చర్చించి, తుది నిర్ణయాన్ని పీసీసీకి అప్పగించిందని తెలిపారు. మొత్తం 234 స్థానాలున్న తమిళనాడు అసెంబ్లీలో మెజార్టీకి కావాల్సిన 10 సీట్ల కోసం టీవీకే.. కాంగ్రెస్ (5 స్థానాలు)తో పాటు కమ్యూనిస్టులు వంటి ఇతర చిన్న పార్టీలతో కలిసి పటిష్టమైన సంకీర్ణ ప్రభుత్వాన్ని (Coalition Government) ఏర్పాటు చేసేందుకు సన్నాహాలు ముమ్మరం చేస్తోంది. దీంతో తమిళనాడు నూతన ముఖ్యమంత్రిగా దళపతి విజయ్ ప్రమాణస్వీకారం చేయడం ఇక లాంఛనమేనని రాజకీయ విశ్లేషకులు అంచనా వేస్తున్నారు.