మంటలను ఆర్పే ‘ఫైర్ బ్లాంకెట్’.. ఇది ఇంట్లో ఉంటే మీరు సేఫ్!

Fire Blankets: సాధారణంగా ఎక్కడైనా నిప్పు అంటుకోగానే అందరం కంగారుపడి నీళ్లు చల్లడమో లేదా ఇసుక వేయడమో చేస్తుంటాం. కానీ, కొన్నిసార్లు ఆ పద్ధతులు మంటలను ఇంకాస్త పెంచే ప్రమాదం ఉంది. ఇలాంటి సమయాల్లో ప్రాణాలను, ఆస్తులను కాపాడటానికి ‘ఫైర్ బ్లాంకెట్లు’ పనిచేస్తాయి. ఒక చిన్న దుప్పటి మంటలను ఎలా మాయం చేస్తుందో, అసలు దీని వెనుక ఉన్న సైన్స్ ఏంటో తెలిస్తే మీరు ఆశ్చర్యపోతారు. నిమిషాల వ్యవధిలో అగ్నిని అదుపు చేసే ఈ రక్షణ కవచాన్ని ఎలా వాడాలి? దీని ప్రత్యేకతలు ఏంటో ఇప్పుడు చూద్దాం..

ఫైర్ బ్లాంకెట్లు..
అగ్నిప్రమాదం జరిగినప్పుడు మంటలు ఎగిసిపడటానికి ప్రాణవాయువు (ఆక్సిజన్) ప్రధాన కారణం. ఈ ఫైర్ బ్లాంకెట్లు మంటలపై పడగానే ఆక్సిజన్ సరఫరాను పూర్తిగా నిలిపివేస్తాయి. ఫలితంగా మంటలు తక్షణమే అదుపులోకి వస్తాయి. ఐరోపా, అమెరికా వంటి దేశాల్లో వీటి వాడకం చాలా ఎక్కువ. మన దేశంలో కూడా వీటిపై అవగాహన పెంచుకుంటే ప్రమాద తీవ్రతను తగ్గించవచ్చని అగ్నిమాపక నిపుణులు సూచిస్తున్నారు.

సాధారణ దుప్పట్లకు, వీటికి తేడా ఏంటి?
సాధారణ దుప్పట్లు 100 నుండి 200 డిగ్రీల ఉష్ణోగ్రత వద్దే కాలిపోతాయి. కానీ, ఈ ప్రత్యేక ఫైర్ బ్లాంకెట్లు వాటి తయారీని బట్టి 500 నుండి 1000 డిగ్రీల సెల్సియస్ వేడిని కూడా తట్టుకోగలవు. ఇవి వాడటానికి చాలా సులభంగా ఉండటమే కాకుండా, అగ్నిని నిరోధించే (హీట్ రెసిస్టెన్స్) సామర్థ్యాన్ని కలిగి ఉంటాయి. వంట గదిలో తలెత్తే ఆయిల్ మంటల నుండి పారిశ్రామిక ప్రమాదాల వరకు ఇవి ఎంతో రక్షణనిస్తాయి.

రకాలను బట్టి ఉపయోగాలు..
మార్కెట్లో విభిన్న రకాల ఫైర్ బ్లాంకెట్లు అందుబాటులో ఉన్నాయి. సాధారణ ఫైబర్ గ్లాస్ బ్లాంకెట్లు 500-580 డిగ్రీల వేడిని తట్టుకుంటాయి, ఇవి ఇళ్లకు అనువైనవి. అలాగే సిలికాన్ కోటెడ్ బ్లాంకెట్లు రసాయన మంటలను ఆర్పడానికి, ల్యాబ్‌లలో వాడటానికి ఉపయోగపడతాయి. అత్యంత శక్తివంతమైన వూల్ ఫైర్ బ్లాంకెట్లు 1000 డిగ్రీల ఉష్ణోగ్రతను సైతం తట్టుకుని పరిశ్రమల్లో రక్షణ కవచంలా పనిచేస్తాయి.

నిపుణుల హెచ్చరిక..
మంటలు వ్యాపించడంలో ఆక్సిజన్ పాత్ర అత్యంత కీలకం. అగ్నిప్రమాదం జరిగిన వెంటనే ఆక్సిజన్‌ను కట్టడి చేయడం ద్వారా మంటలు ఇతర ప్రాంతాలకు పాకకుండా అడ్డుకోవచ్చని, అందుకు ఈ బ్లాంకెట్లు ఉత్తమ సాధనాలని నిపుణులు పేర్కొన్నారు.